18, 11… ಟಿ20 ವಿಶ್ವಕಪ್​ ಬೆನ್ನಲ್ಲೇ 2026ರ ಐಪಿಎಲ್​ಗೂ ಬೇಡವಾಯ್ತು ಚಿನ್ನಸ್ವಾಮಿ ಸ್ಟೇಡಿಯಂ! | IPL 2026

IPL 2026: ಮುಂಬರುವ ಟಿ20 ವಿಶ್ವಕಪ್​ ಫೈನಲ್​ಗೆ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣವನ್ನು (M Chinnaswamy Stadium) ಆಯ್ಕೆ ಮಾಡಬೇಕಿದ್ದ ಬಿಸಿಸಿಐ, ಇದೀಗ ಬೆಂಗಳೂರನ್ನು ಲೆಕ್ಕಕ್ಕೆ ಪರಿಗಣಿಸದೆ, ಫೈನಲ್​ ಆತಿಥ್ಯ ವಹಿಸಲು ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣವನ್ನು ಆಯ್ಕೆ ಮಾಡಿಕೊಂಡಿದೆ. ಇದರ ಬೆನ್ನಲ್ಲೇ 2026ರ ಐಪಿಎಲ್​ ಪಂದ್ಯಗಳಿಗೂ ಚಿನ್ನಸ್ವಾಮಿ ಸ್ಟೇಡಿಯಂ ಅನ್ನು ಕೈಬಿಡಲು ನಿರ್ಧರಿಸಲಾಗಿದೆ ಎಂದು ಕ್ರಿಕೆಟ್​ ವರದಿಗಳು ಸೂಚಿಸಿವೆ.

18ನೇ ಆವೃತ್ತಿ ಗೆದ್ದ ಆರ್​ಸಿಬಿ ವಿಜಯೋತ್ಸವದಲ್ಲಿ ಸಂಭವಿಸಿದ ಕಾಲ್ತುಳಿತಕ್ಕೆ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣ ಸಾಕ್ಷಿಯಾಯಿತು. ಅಂದಿನಿಂದ ಈ ಸ್ಡೇಡಿಯಂನತ್ತ ತಿರುಗಿ ನೋಡದ ಬಿಸಿಸಿಐ, ಇಲ್ಲಿ ಯಾವುದೇ ಪಂದ್ಯಗಳನ್ನಾಡಿಸಲು ಇಚ್ಛಿಸುತ್ತಿಲ್ಲ. ಇದು ಮುಂಬರುವ ಐಪಿಎಲ್​ ಆವೃತ್ತಿಗೂ ಅನ್ವಯವಾಗಿದೆ. ವರದಿಗಳ ಪ್ರಕಾರ, ಕಾಲ್ತುಳಿತ ಸಂಭವಿಸಿದ ಬಳಿಕ ಕೀಡಾಂಗಣದಲ್ಲಿ ಪಂದ್ಯಗಳನ್ನು ಆಯೋಜಿಸಲು ಅಧಿಕಾರಿಗಳಿಂದ ಅನುಮತಿ ಲಭಿಸಿಲ್ಲ. ಈ ಎಲ್ಲ ಬೆಳವಣಿಗೆಗಳ ನಡುವೆ 2026ರ ಐಪಿಎಲ್​ ಪಂದ್ಯಗಳಿಗೆ ಅಡ್ಡಿಯಾಗಲು ಪುಷ್ಠಿ ನೀಡಿರುವುದು ಐಸಿಸಿ ಪುರುಷರ ಟಿ20 ವಿಶ್ವಕಪ್​ ಟೂರ್ನಿಯಿಂದ ಬೆಂಗಳೂರನ್ನು ಕೈಬಿಟ್ಟಿರುವುದು.

ಪ್ರತಿವರ್ಷ ಐಪಿಎಲ್‌ನಲ್ಲಿ, ಎಂ.ಚಿನ್ನಸ್ವಾಮಿ ಕ್ರೀಡಾಂಗಣವು ತನ್ನ ಫ್ರಾಂಚೈಸಿಯ 7 ಲೀಗ್ ಪಂದ್ಯಗಳನ್ನು ಆಯೋಜಿಸುತ್ತದೆ. ಇದರೊಟ್ಟಿಗೆ 2014 ಮತ್ತು 2016ರಲ್ಲಿ ಐಪಿಎಲ್ ಫೈನಲ್ ಪಂದ್ಯಗಳನ್ನೂ ಆಯೋಜಿಸಿತ್ತು. ಹೀಗಿರುವಾಗ 2025ರ ಜೂನ್​ 04ರಂದು ಸಂಭವಿಸಿದ ಕಾಲ್ತುಳಿತ ದುರಂತ ಸದ್ಯ ಬೆಂಗಳೂರು ಸ್ಟೇಡಿಯಂಗೆ ದೊಡ್ಡ ಕಪ್ಪು ಚುಕ್ಕೆಯಾಗಿದೆ. ಈ ಭೀಕರ ದುರಂತದಲ್ಲಿ 11 ಅಭಿಮಾನಿಗಳು ಸಾವಿಗೀಡಾಗಿದ್ದು, ಅತೀವ ದುಃಖಕ್ಕೆ ಕಾರಣವಾಯಿತು. ಇದೊಂದು ದುರ್ಘಟನೆಯಿಂದ ಚಿನ್ನಸ್ವಾಮಿ ಕ್ರೀಡಾಂಗಣವನ್ನು ಆಯ್ಕೆ ಮಾಡದಿರಲು ಅಧಿಕಾರಿಗಳು ನಿರ್ಧರಿಸಿರುವುದು ನಿಜಕ್ಕೂ ಬೇಸರದ ಸಂಗತಿಯೇ.

2025ರ ಜೂನ್​ 03ರಂದು ಐಪಿಎಲ್ 18ನೇ ಆವೃತ್ತಿಯ​ ಟ್ರೋಫಿ ಎತ್ತಿಹಿಡಿದ ಆರ್​ಸಿಬಿ, ಲೀಗ್ ಇತಿಹಾಸದಲ್ಲಿ ತನ್ನ ಚೊಚ್ಚಲ ಕಪ್​ಗೆ ಮುತ್ತಿಟ್ಟಿತು. ಗೆದ್ದ ಮರುದಿನವೇ ಜೂ.04ರಂದು ಬೆಂಗಳೂರಿಗೆ ಆಗಮಿಸಿದ ಫ್ರಾಂಚೈಸಿ ಆಟಗಾರರು, ರಾಜ್ಯ ಸರ್ಕಾರ ಹಮ್ಮಿಕೊಂಡಿದ್ದ ಸನ್ಮಾನ ಕಾರ್ಯಕ್ರಮಕ್ಕೆ ಆಗಮಿಸಿ, ದೊಡ್ಡ ಕಾಲ್ತುಳಿತ ಘಟನೆಗೆ ಪರೋಕ್ಷವಾಗಿ ಸಾಕ್ಷಿಯಾಯಿತು. ಈ ಭೀಕರ ಘಟನೆಯಲ್ಲಿ 11 ಅಭಿಮಾನಿಗಳು ಮೃತಪಟ್ಟ ಹಿನ್ನೆಲೆ ಆರ್​ಸಿಬಿ ಮಾಲೀಕರು, ಆಯೋಜಕರ ವಿರುದ್ಧ ಕೇಸ್​ ದಾಖಲಾಯಿತು. ಪ್ರಕರಣ ಕೋರ್ಟ್​ ಮೆಟ್ಟಿಲೇರಿತು. ಈ ಘಟನೆಯಿಂದ ಫ್ರಾಂಚೈಸಿ ಮತ್ತು ಕ್ರೀಡಾಂಗಣಕ್ಕೆ ಒಂದು ಕಪ್ಪುಚುಕ್ಕೆ ಅಂಟಿರುವುದಂತು ಸ್ಪಷ್ಟ ಎಂದೇ ಹೇಳಬಹುದು,(ಏಜೆನ್ಸೀಸ್).