ನೀವು ಇದುವರೆಗೂ ನೋಡಿರದ ವಿಚಿತ್ರ ರನೌಟ್​? ಡ್ರಿಂಕ್ಸ್​ ಬ್ರೇಕ್​ಗೆ ಹೋದ ಈಶ್ವರನ್​ಗೆ ಶಾಕ್​! ಅಷ್ಟಕ್ಕೂ ರಣಜಿಯಲ್ಲಿ ಆಗಿದ್ದೇನು?

ನವದೆಹಲಿ: ನಿನ್ನೆ (ಜ.22) ಕಲ್ಯಾಣಿ ಕ್ರೀಡಾಂಗಣದಲ್ಲಿ ನಡೆದ ಬೆಂಗಾಲ್ ಮತ್ತು ಸರ್ವಿಸಸ್​ ನಡುವಿನ ರಣಜಿ ಟ್ರೋಫಿ ಪಂದ್ಯದಲ್ಲಿ ಅಭಿಮನ್ಯು ಈಶ್ವರನ್​ ವಿಚಿತ್ರ ರೀತಿಯಲ್ಲಿ ಪೆವಿಲಿಯನ್​ ಸೇರಿದ್ದು ಸದ್ಯ ಹಲವರ ಅಚ್ಚರಿ ಹಾಗೂ ಗೊಂದಲಕ್ಕೆ ಕಾರಣವಾಗಿದೆ.

ಪಂದ್ಯದ ನಡುವೆ ಡ್ರಿಂಕ್ಸ್ ಸೇವಿಸಲು ಕ್ರೀಸ್​ನಿಂದ ಹೊರಹೋದ ಅಭಿಮನ್ಯು ಈಶ್ವರನ್ ಅವರನ್ನು ರನ್​ಔಟ್ ಎಂದು ಘೋಷಿಸಲಾಯಿತು. ಇದರಿಂದ ಅಚ್ಚರಿಗೆ ಒಳಗಾದ ಬೆಂಗಾಲ್ ಪಡೆಯ ಬ್ಯಾಟರ್​, ಒಂದು ನಿಮಿಷ ಏನಾಗ್ತಿದೆ ಎಂಬುದನ್ನು ಅರ್ಥೈಸಿಕೊಳ್ಳಲು ಕೆಲ ಸಮಯ ತೆಗೆದುಕೊಂಡರು. ಬಂಗಾಳ ತಂಡವು ಬ್ಯಾಟಿಂಗ್ ಮಾಡುವಾಗ 41ನೇ ಓವರ್‌ನ ಕೊನೆಯ ಎಸೆತದಲ್ಲಿ ನಾಯಕ ಈಶ್ವರನ್ 81 ರನ್ ಗಳಿಸಿ, ಶತಕ ಬಾರಿಸುವತ್ತ ಮುಂದಾಗಿದ್ದರು. ಆದರೆ, ಅವರೇ ಮಾಡಿಕೊಂಡ ಸಣ್ಣ ಎಡವಟ್ಟಿನಿಂದ ರನ್​ ಔಟ್​​ ಆಗಬೇಕಾಯಿತು.

ನಾನ್-ಸ್ಟ್ರೈಕ್‌ನಲ್ಲಿ ಬಾಲ್​ ಡೆಡ್ ಆಯಿತು ಮತ್ತು ಓವರ್ ಕೂಡ ಮುಗಿಯಿತು ಎಂದು ಭಾವಿಸಿದ ಈಶ್ವರನ್​ಗೆ ಚೆಂಡು ಬೌಲರ್ ಆದಿತ್ಯ ಕುಮಾರ್ ಅವರ ಕೈಗೆ ತಗುಲಿ ಸ್ಟಂಪ್‌ ಆಗಿದೆ ಎಂಬುದೇ ಗೊತ್ತಾಗಿಲ್ಲ. ಅದಾಗಲೇ ಕ್ರೀಸ್‌ನಿಂದ ಹೊರಬಂದಿದ್ದ ಈಶ್ವರನ್ ಔಟ್​ ಎಂದು ಅಂಪೈರ್​ನತ್ತ ಅಪೀಲ್ ಮಾಡಿದ ಸರ್ವಿಸಸ್‌ ತಂಡ, ಇದು ಖಚಿತ ರನ್ ಔಟ್ ಎಂದು ಒತ್ತಿ ಹೇಳಿತು. ಕಡೆಗೂ ಆನ್​ಫೀಲ್ಡ್​ ಅಂಪೈರ್​ ಇದನ್ನು ಔಟ್​ ಎಂದೇ ಘೋಷಿಸಿದರು.

"ಇನ್ನಿಂಗ್ಸ್ ತುಂಬಾ ಚೆನ್ನಾಗಿ ನಡೆಯುತ್ತಿತ್ತು. ಆದರೆ, ನಾನು ಮಾಡಿದ ಅದೊಂದು ಎಡವಟ್ಟು ನನಗೆ ಆಶ್ಚರ್ಯವನ್ನುಂಟು ಮಾಡಿತು. ಕೆಲವರು ಆಟದ ಉತ್ಸಾಹದಲ್ಲಿ ಆಗಿರಬಹುದು, ಎದುರಾಳಿ ತಂಡ ನನ್ನನ್ನು ಕ್ರೀಸ್​ಗೆ ವಾಪಾಸ್​ ಕರೆಸುತ್ತಾರೆ ಎಂದೇ ಭಾವಿಸಿದರು. ಆದರೆ ಅದರ ಬಗ್ಗೆ ಯಾವುದೇ ಪ್ರಶ್ನೆ ನನ್ನಲ್ಲಿ ಇರಲಿಲ್ಲ. ಇಲ್ಲಿ ಸಂಪೂರ್ಣ ತಪ್ಪು ನನ್ನದೇ ಆಗಿತ್ತು" ಎಂದರು ಹೇಳಿದರು,(ಏಜೆನ್ಸೀಸ್).