ನಿಮ್ಮಂತ ಕೋಚ್​... ಐರ್ಲೆಂಡ್​ ಎದುರು ಟಿ20 ಸರಣಿ ಸೋಲು, ಗೌತಿ ಮುಖಕ್ಕೆ ಹೊಡೆದಂತೆ ಹೇಳಿದ ಐಸ್​ಲ್ಯಾಂಡ್​ ಕ್ರಿಕೆಟ್

Gautam Gambhir: ಇಂಗ್ಲೆಂಡ್​ನ ಬೆಲ್​ಫಾಸ್ಟ್​ನಲ್ಲಿ ನಡೆದ ಐರ್ಲೆಂಡ್ ವಿರುದ್ಧದ ಎರಡು ಪಂದ್ಯಗಳ ಟಿ20 ಸರಣಿಯನ್ನು ಟೀಮ್ ಇಂಡಿಯಾ ಹೀನಾಯವಾಗಿ ಸೋತಿತು. ಎರಡರಲ್ಲಿಯೂ ಅತ್ಯಂತ ಕಳಪೆ ಪ್ರದರ್ಶನ ನೀಡುವ ಮೂಲಕ ಶ್ರೇಯಸ್​ ಅಯ್ಯರ್​ ಪಡೆ ಕ್ರಿಕೆಟ್​ ಶಿಶು ಮುಂದೆ ತಲೆಬಾಗಿದ್ದು ಭಾರತೀಯ ಕ್ರಿಕೆಟ್​ ಪ್ರಿಯರನ್ನು ಅಕ್ಷರಶಃ ಕೆರಳಿಸಿದೆ. ಇಷ್ಟಕ್ಕೆಲ್ಲ ಕಾರಣ ಹೆಡ್​ ಕೋಚ್​ ಗೌತಮ್​ ಗಂಭೀರ್ ಎಂಬ ಟೀಕೆಗಳ ಮಧ್ಯೆ ಐಸ್​ಲ್ಯಾಂಡ್​ ಕ್ರಿಕೆಟ್​ ವ್ಯಂಗ್ಯವಾಡಿರುವ ರೀತಿ ಸದ್ಯ ಗೌತಿಗೆ ಮುಖಕ್ಕೆ ಹೊಡೆದಂತಿದೆ.

ಟಿ20 ವಿಶ್ವ ಚಾಂಪಿಯನ್ ತಂಡವಾಗಿರುವ ಭಾರತ, ಬ್ಯಾಟಿಂಗ್ ಮತ್ತು ಬೌಲಿಂಗ್​ನಲ್ಲಿ ಅತ್ಯಂತ ಕಳಪೆ ಪ್ರದರ್ಶನ ತೋರಿದ್ದೇ ಐರ್ಲೆಂಡ್ ವಿರುದ್ಧ ಸರಣಿಯನ್ನು 2-0 ಅಂತರದಲ್ಲಿ ಸೋಲಲು ಮುಖ್ಯ ಕಾರಣವಾಯಿತು. ಇದರೊಟ್ಟಿಗೆ ಆರಂಭಿಕ ಬ್ಯಾಟರ್​ನ ಸ್ಥಾನದಲ್ಲಿ ಈ ಮೊದಲೇ ವೈಭವ್ ಸೂರ್ಯವಂಶಿಗೆ ಸ್ಥಾನ ಕೊಡಿ ಎಂದು ಎಲ್ಲರೂ ಕೇಳಿಕೊಂಡರು, ಯುವ ಬ್ಯಾಟಿಂಗ್ ಸೆನ್ಸೇಷನ್​ಗೆ ಚಾನ್ಸ್​ ಕೊಡದೆ, ದರ್ಪ ಮೆರೆದ ಗಂಭೀರ್​ಗೆ ಇದೀಗ ನೆಟ್ಟಿಗರು ಕ್ಲಾಸ್​ ತೆಗೆದುಕೊಂಡಿದ್ದಾರೆ. ಈ ಗ್ಯಾಪ್​ನಲ್ಲೇ ಐಸ್​ಲ್ಯಾಂಡ್​ ಕ್ರಿಕೆಟ್​ ಗಂಭೀರ್​ನಂತಹ ಕೋಚ್​ ನಮಗೆ ಬೇಕಿಲ್ಲ ಎಂದು ಲೇವಡಿ ಮಾಡಿದೆ.

ಐಸ್ಲ್ಯಾಂಡ್ ಕ್ರಿಕೆಟ್ ತನ್ನ ಅಧಿಕೃತ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ, "ಗೌತಮ್ ಗಂಭೀರ್ ಅವರಂತಹ ಕೋಚ್​ ಅನ್ನ ತಮ್ಮ ತಂಡಕ್ಕೆ ಕರೆದುಕೊಳ್ಳುವ ಆಸಕ್ತಿ ನಮಗಿಲ್ಲ. ಟೀಮ್ ಇಂಡಿಯಾದಲ್ಲಿ ಅದ್ಭುತ ಪ್ರತಿಭೆಗಳಿದ್ದಾರೆ. ಇಷ್ಟು ಒಳ್ಳೆಯ ತಂಡದೊಂದಿಗೆ ಐರ್ಲೆಂಡ್​ ಎದುರು ಇಷ್ಟು ಒಳ್ಳೆಯ ಫಲಿತಾಂಶಗಳನ್ನು ಸಾಧಿಸುವುದು ನಿಜಕ್ಕೂ ಅಸಾಧಾರಣ ಪ್ರತಿಭೆ" ಎಂದು ತೀರ ವ್ಯಂಗ್ಯವಾಡಿದೆ. ಸದ್ಯ ಈ ಪೋಸ್ಟ್ ವೈರಲ್ ಆಗಿದ್ದು, ಅನೇಕರು ಗಂಭೀರ್​ರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಈ ಮೊದಲೇ ವೈಭವ್ ಸೂರ್ಯವಂಶಿಗೆ ಅವಕಾಶ ಕೊಡುವಂತೆ ಸಲಹೆ ನೀಡಿದ್ದ ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್, ಗೌತಮ್ ಗಂಭೀರ್ ತಂಡದಲ್ಲಿ ಆಲ್‌ರೌಂಡರ್‌ಗಳ ಮೇಲೆಯೇ ಹೆಚ್ಚು ಡಿಪೆಂಡ್ ಆಗಿದ್ದಾರೆ. ಭಾರತಕ್ಕೆ ಉತ್ತಮ ಮಿಡಲ್​ ಆರ್ಡರ್ ಬ್ಯಾಟ್ಸ್​ಮನ್​ಗಳ ಅಗತ್ಯವಿದೆ. ಇದನ್ನು ಕಡೆಗಣಿಸದ ಗೌತಮ್​, ತಮ್ಮ ಅವಧಿಯಲ್ಲೇ ತಂಡದಲ್ಲಿ ಹೆಚ್ಚಿನ ಆಲ್‌ರೌಂಡರ್‌ಗಳನ್ನು ಆಡಿಸುತ್ತಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಐರ್ಲೆಂಡ್ ಮುಂದೆ ಹೀನಾಯ ಸೋಲುಂಡ ಭಾರತ, ಮುಂದಿನ ಇಂಗ್ಲೆಂಡ್ ವಿರುದ್ಧದ ಟಿ20 ಸರಣಿಯತ್ತ ಸಂಪೂರ್ಣವಾಗಿ ಗಮನಹರಿಸಿದೆ. ಇದೇ ಜುಲೈ 1ರಿಂದ ಆರಂಭವಾಗುವ ಈ ಸರಣಿಯಲ್ಲಿ ಟೀಮ್ ಇಂಡಿಯಾ ಗೆಲುವು ಸಾಧಿಸಲು ಪಣತೊಟ್ಟಿದೆ. ಸದ್ಯ ಟೀಕೆಗಳ ಸುರಿಮಳೆಯನ್ನೇ ಎದುರಿಸುತ್ತಿರುವ ಗಂಭೀರ್​, ತಂಡದಲ್ಲಿ ಏನೆಲ್ಲ ಬದಲಾವಣೆ ಮಾಡಲಿದ್ದಾರಾ? ಎಲ್ಲರ ಆಶಯದಂತೆ ವೈಭವ್​ ಸೂರ್ಯವಂಶಿಗೆ ಚಾನ್ಸ್ ಕೊಡಲಿದ್ದಾರಾ ಎಂಬುದನ್ನು ಸದ್ಯ ಕಾದು ನೋಡಬೇಕಿದೆ,(ಏಜೆನ್ಸೀಸ್).