ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಸರಣಿಗೆ ಗಿಲ್​, ಹಾರ್ದಿಕ್​ ವಾಪಸ್​; ರಿಂಕು ಸಿಂಗ್​, ನಿತೀಶ್​ ರೆಡ್ಡಿಗೆ ಕೊಕ್​

ದ. ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದ ವೇಳೆ ಕುತ್ತಿಗೆ ನೋವಿಗೆ ಒಳಗಾಗಿದ್ದ ಗಿಲ್​, ಎರಡನೇ ಟೆಸ್ಟ್​ ಬಳಿಕ ಪ್ರಸಕ್ತ ನಡೆಯುತ್ತಿರುವ ಏಕದಿನ ಸರಣಿಯಿಂದಲೂ ಹೊರಗುಳಿದಿದ್ದಾರೆ. ಟಿ20 ಸರಣಿಗೆ ಅವರು ಉಪನಾಯಕರಾಗಿ ಮರಳುತ್ತಿದ್ದಾರೆ. ಆದರೆ ಗಿಲ್​ ಫಿಟ್ನೆಸ್​ಗೆ ಬೆಂಗಳೂರಿನ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದಿಂದ ಇನ್ನೂ ಅಂತಿಮ ಒಪ್ಪಿಗೆ ದೊರೆತಿಲ್ಲ ಎನ್ನಲಾಗಿದೆ. ಹೀಗಾಗಿ ಗಿಲ್​ ಟಿ20 ತಂಡದಲ್ಲಿ ಮರಳಿ ಸ್ಥಾನ ಪಡೆದಿದ್ದರೂ, ಸಂಪೂರ್ಣ ಫಿಟ್​ ಆದರಷ್ಟೇ ಮೈದಾನಕ್ಕಿಳಿಯಲಿದ್ದಾರೆ ಎಂದು ಬಿಸಿಸಿಐ ಸ್ಪಷ್ಟಪಡಿಸಿದೆ.

ಕಳೆದ ಸೆಪ್ಟೆಂಬರ್​ನಲ್ಲಿ ಏಷ್ಯಾಕಪ್​ ಟಿ20 ಟೂರ್ನಿಯ ಫೈನಲ್​ಗೆ ಮುನ್ನ ಗಾಯಗೊಂಡಿದ್ದ ಹಾರ್ದಿಕ್​, ಬಳಿಕ ಆಸ್ಟ್ರೆಲಿಯಾ ಪ್ರವಾಸದ ಟಿ20 ಸರಣಿಯನ್ನೂ ತಪ್ಪಿಸಿಕೊಂಡಿದ್ದರು. ಮಂಗಳವಾರವಷ್ಟೇ ಸಯ್ಯದ್​ ಮುಷ್ತಾಕ್​ ಅಲಿ ಟ್ರೋಫಿ ದೇಶೀಯ ಟಿ20 ಪಂದ್ಯದಲ್ಲಿ ಆಡುವ ಮೂಲಕ ಹಾರ್ದಿಕ್​ ಸ್ಪರ್ಧಾತ್ಮಕ ಕ್ರಿಕೆಟ್​ಗೆ ಮರಳಿದ್ದಾರೆ. ಮುಂದಿನ ವರ್ಷದ ಟಿ20 ವಿಶ್ವಕಪ್​ವರೆಗೆ ಅವರು ಚುಟುಕು ಕ್ರಿಕೆಟ್​ ಮಾದರಿಯಲ್ಲಿ ಮಾತ್ರ ಆಡಲಿದ್ದಾರೆ ಎನ್ನಲಾಗಿದೆ. ಹಾರ್ದಿಕ್​ ವಾಪಸಾತಿಯಿಂದ ನಿತೀಶ್​ ರೆಡ್ಡಿ ಅವರನ್ನು ಕೈಬಿಟ್ಟಿರುವುದು ನಿರೀತ ನಡೆ ಎನಿಸಿದೆ.

ಸ್ಟಾರ್​ ವೇಗಿ ಜಸ್​ಪ್ರೀತ್​ ಬುಮ್ರಾ ಮತ್ತೆ ಟಿ20 ತಂಡದಲ್ಲಿ ಆಡಲಿದ್ದು, ಅರ್ಷದೀಪ್​ ಸಿಂಗ್​, ಹರ್ಷಿತ್​ ರಾಣಾ ತಂಡದಲ್ಲಿರುವ ಇನ್ನಿಬ್ಬರು ವೇಗಿಗಳು. ಸ್ಯಾಮ್ಸನ್​ ಜತೆ ಜಿತೇಶ್​ ಶರ್ಮ 2ನೇ ಕೀಪರ್​ ಆಗಿ ಸ್ಥಾನ ಕಾಯ್ದುಕೊಂಡಿದ್ದಾರೆ. ಅಕ್ಷರ್​ ಪಟೇಲ್​, ವಾಷಿಂಗ್ಟನ್​, ವರುಣ್​ ಚಕ್ರವರ್ತಿ, ಕುಲದೀಪ್​ ಯಾದವ್​ ತಂಡದಲ್ಲಿರುವ ನಾಲ್ವರು ಸ್ಪಿನ್ನರ್ಸ್​.

ಡಿಸೆಂಬರ್​ 9ಕ್ಕೆ ಕಟಕ್​ನಲ್ಲಿ ಟಿ20 ಸರಣಿ ಆರಂಭವಾಗಲಿದ್ದು, ನಂತರ ಚಂಡೀಗಢ (ಡಿ.11), ಧರ್ಮಶಾಲಾ (ಡಿ.14), ಲಖನೌ (ಡಿ.17) ಹಾಗೂ ಅಹಮದಾಬಾದ್​ನಲ್ಲಿ (ಡಿ.19) ಪಂದ್ಯಗಳು ನಡೆಯಲಿವೆ.

ಭಾರತ ಟಿ20 ತಂಡ: ಸೂರ್ಯಕುಮಾರ್​ ಯಾದವ್​ (ನಾಯಕ), *ಶುಭಮಾನ್​ ಗಿಲ್​ (ಉಪನಾಯಕ), ಅಭಿಷೇಕ್​ ಶರ್ಮ, ತಿಲಕ್​ ವರ್ಮ, ಹಾರ್ದಿಕ್​ ಪಾಂಡ್ಯ, ಶಿವಂ ದುಬೆ, ಅಕ್ಷರ್​ ಪಟೇಲ್​, ಜಿತೇಶ್​ ಶರ್ಮ (ವಿ.ಕೀ), ಸಂಜು ಸ್ಯಾಮ್ಸನ್​ (ವಿ.ಕೀ), ಜಸ್​ಪ್ರೀತ್​ ಬುಮ್ರಾ, ವರುಣ್​ ಚಕ್ರವರ್ತಿ, ಅರ್ಷದೀಪ್​ ಸಿಂಗ್​, ಕುಲದೀಪ್​ ಯಾದವ್​, ಹರ್ಷಿತ್​ ರಾಣಾ, ವಾಷಿಂಗ್ಟನ್​ ಸುಂದರ್​. *ಫಿಟ್ನೆಸ್​ ಆಧರಿಸಿ ಆಟ.