ದುಲೀಪ್​ ಟ್ರೋಫಿ: ಇಂದಿನಿಂದ ದಕ್ಷಿಣ-ಉತ್ತರ, ಕೇಂದ್ರ-ಪೂರ್ವ ವಲಯಗಳ ನಡುವೆ ಸೆಮೀಸ್​

ದೇಶೀಯ ಕ್ರಿಕೆಟ್​ ಋತುವಿನ ಮೊದಲ ಟೂರ್ನಿ ಪ್ರತಿಷ್ಠಿತ ದುಲೀಪ್​ ಟ್ರೋಫಿಯ ಸೆಮಿಫೈನಲ್ (Duleep Trophy semis)​ ಪಂದ್ಯಗಳು ಭಾನುವಾರ ಆರಂಭವಾಗಲಿವೆ. ಬಿಸಿಸಿಐ ಶ್ರೇಷ್ಠತಾ ಕೇಂದ್ರದಲ್ಲಿ ನಡೆಯಲಿರುವ ಮೊದಲ ಸೆಮಿಫೈನಲ್​ನಲ್ಲಿ ಹಾಲಿ ಚಾಂಪಿಯನ್​ ಕೇಂದ್ರ -ಪೂರ್ವ ವಲಯ ತಂಡಗಳು ಎದುರಾಗಲಿವೆ. ಇನ್ನೊಂದು ಪಂದ್ಯದಲ್ಲಿ ದಕ್ಷಿಣ ಮತ್ತು ಉತ್ತರ ವಲಯ ತಂಡಗಳು ಮುಖಾಮುಖಿ ಆಗಲಿವೆ.

ಕಳೆದ ಬಾರಿಯ ಫೈನಲಿಸ್ಟ್​ಗಳಾದ ಕೇಂದ್ರ ವಲಯ, ದಕ್ಷಿಣ ವಲಯ ತಂಡಗಳು ನೇರವಾಗಿ ಅಂತಿಮ ನಾಲ್ಕರ ಟ್ಟಕ್ಕೇರಿದ್ದು, ಉತ್ತರ, ಪೂರ್ವ ವಲಯಗಳು ಕ್ವಾರ್ಟರ್​ಫೈನಲ್​ ಜಯದೊಂದಿಗೆ ಸೆಮೀಸ್​ ಪ್ರವೇಶಿಸಿವೆ. ಐಪಿಎಲ್​ನ ಆರ್​ಸಿಬಿ ಪುರುಷರ ತಂಡದ ನಾಯಕ ರಜತ್​ ಪಾಟೀದಾರ್​ ಸತತ ಎರಡನೇ ಆವೃತ್ತಿಯಲ್ಲಿ ಕೇಂದ್ರ ವಲಯ ಮುನ್ನಡೆಸಲಿದ್ದು, ರಿಂಕು ಸಿಂಗ್​ ಉಪನಾಯಕನಾಗಿ ಸಾಥ್​ ನೀಡಲಿದ್ದಾರೆ. ಬೌಲಿಂಗ್​ ವಿಭಾಗದ ಕೇಂದ್ರ ಪ್ರಮುಖ ಬಲವಾಗಿದ್ದು, ಸಾರಾಂಶ್​ ಜೈನ್​, ಹರ್ಷ್​ ದುಬೆ ಜತೆಗೆ ವೇಗಿ ಯಶ್​ ಠಾಕೂರ್​ ಶಕ್ತಿ ತುಂಬಲಿದ್ದಾರೆ. ಇಶಾನ್​ ಕಿಶನ್​ ಸಾರಥ್ಯದ ಪೂರ್ವ ವಲಯ ಕ್ವಾರ್ಟರ್​ಫೈನಲ್​ನಲ್ಲಿ ಈಶಾನ್ಯ ಎದುರು ಇನಿಂಗ್ಸ್​ ಹಾಗೂ 210 ರನ್​ ಜಯಿಗಳಿತ್ತು. 15 ವರ್ಷದ ಬ್ಯಾಟರ್​ ವೈಭವ್​ ಸೂರ್ಯವಂಶಿ ರೆಡ್​ಬಾಲ್​ನಲ್ಲಿ ಸಾಮರ್ಥ್ಯ ಪ್ರದರ್ಶಿಸಲು ಮತ್ತೊಂದು ಅವಕಾಶ ಇದಾಗಿದೆ. ಕಳೆದ ಪಂದ್ಯದಲ್ಲಿ ಶತಕ ಸಿಡಿಸಿದ್ದ ಬಂಗಾಳದ ಸುದೀಪ್​ ರಮಿ, ಶಾಬಾಜ್​ ಅಹ್ಮದ್​ ಉತ್ತಮ ಫಾರ್ಮ್​ನಲ್ಲಿದ್ದಾರೆ.

ಹಾಲಿ ರನ್ನರ್​ ಅಪ್​ ದಕ್ಷಿಣ ವಲಯ ಈ ಬಾರಿ ಪ್ರಶಸ್ತಿ ಒಲಿಸಿಕೊಳ್ಳುವ ನಿರೀಕ್ಷೆಯಲ್ಲಿದೆ. ತಿಲಕ್​ ವರ್ಮ ನೇತೃತ್ವದ ತಂಡದಲ್ಲಿ ಕರ್ನಾಟಕದ ಕರುಣ್​ ನಾಯರ್​, ಆರ್​. ಸ್ಮರಣ್​ ಹಾಗೂ ವೇಗಿ ವಿದ್ವತ್​ ಕಾವೇರಪ್ಪ, ಆಲ್ರೌಂಡರ್​ ಶ್ರೇಯಸ್​ ಗೋಪಾಲ್​ ಇದ್ದಾರೆ. ಜತೆಗೆ ಎನ್​.ಜಗದೀಶನ್​, ರಿಕಿ ಭುಯ್​ ಒಳಗೊಂಡ ಬಲಿಷ್ಠ ಬ್ಯಾಟಿಂಗ್​ ವಿಭಾಗ ಹೊಂದಿದೆ. ಕ್ವಾರ್ಟರ್​ಫೈನಲ್​ನಲ್ಲಿ ಪಶ್ಚಿಮ ವಲಯವನ್ನು 52 ರನ್​ಗಳಿಸಿ ಸೋಲಿಸಿದ ಆತ್ಮವಿಶ್ವಾಸದೊಂದಿಗೆ ಉತ್ತರ ವಲಯ ಕಣಕ್ಕಿಳಿಯಲಿದೆ. ಕಳೆದ ಅವೃತ್ತಿ ರಣಜಿ ಟ್ರೋಫಿಯ 3ನೇ ಗರಿಷ್ಠ ರನ್​ ಸ್ಕೋರರ್​ ಸನತ್​ ಸಾಂಗ್ವಾನ್​ ಬದಲಿಗೆ ಯಶ್​ ಧುಲ್​ಗೆ ಸ್ಥಾನ ನೀಡಿ ಟೀಕೆಗೆ ಗುರಿಯಾಗಿದ್ದ ಉತ್ತರ ವಲಯ ತಂಡವನ್ನು ಜಮ್ಮು ಕಾಶ್ಮೀರದ ಕನ್ಹಯ್ಯ ವಾಧವನ್​ ಮುನ್ನಡೆಸಲಿದ್ದಾರೆ. ಭಾರತ ಟೆಸ್ಟ್​ ತಂಡದ ವೇಗಿ ಗುರುನೂರ್​ ಬ್ರಾರ್​, ಆಯುಷ್​ ಬಡೋನಿ, ಅಬ್ದುಲ್​ ಸಮದ್​, ಅಂಶುಲ್​ ಕಾಂಬೋಜ್​ ಪ್ರಮುಖ ಆಟಗಾರರು.