- ಐಪಿಎಲ್ 19ನೇ ಆವೃತ್ತಿಯ 11ನೇ ಪಂದ್ಯ
- ಆರ್ಸಿಬಿ ಮತ್ತು ಸಿಎಸ್ಕೆ ಪಂದ್ಯದ ಮೊದಲ ಇನ್ನಿಂಗ್ಸ್ ಮುಕ್ತಾಯ
- ಚೆನ್ನೈ ಸೂಪರ್ ಕಿಂಗ್ಸ್ಗೆ 251 ರನ್ಗಳ ಬೃಹತ್ ಗುರಿ
CSK vs RCB: ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳ ನಡುವಿನ ಐಪಿಎಲ್ 19ನೇ ಆವೃತ್ತಿಯ 11ನೇ ಪಂದ್ಯದ ಮೊದಲ ಇನ್ನಿಂಗ್ಸ್ ಮುಕ್ತಾಯಗೊಂಡಿದೆ.
ಟಾಸ್ ಗೆದ್ದ ಸಿಎಸ್ಕೆ ನಾಯಕ ರುತುರಾಜ್ ಗಾಯಕ್ವಾಡ್, ಆರ್ಸಿಬಿಗೆ ಮೊದಲು ಬ್ಯಾಟ್ ಮಾಡಲು ಆಹ್ವಾನಿಸಿದರು. ಅಂತೆಯೇ, ಕಣಕ್ಕಿಳಿದ ಚಾಲೆಂಜರ್ಸ್ ಪಡೆಯ ಆರಂಭಿಕರಾದ ವಿರಾಟ್ ಕೊಹ್ಲಿ ಮತ್ತು ಫಿಲ್ ಸಾಲ್ಟ್, ಪವರ್ಪ್ಲೇಯಲ್ಲಿ ಉತ್ತಮ ಓಪನಿಂಗ್ ನೀಡುವಲ್ಲಿ ವಿಫಲರಾದರು. ಕೇವಲ 28 ರನ್ಗೆ ಕೊಹ್ಲಿ ಔಟಾದರೆ, ಸಾಲ್ಟ್ 46 ರನ್ಗಳನ್ನು ಸಿಡಿಸಿ ಪೆವಿಲಿಯನ್ಗೆ ಹಿಂತಿರುಗಿದರು.
ಪಡಿಕಲ್, ರಜತ್, ಡೇವಿಡ್ ಅಬ್ಬರ
10 ಓವರ್ವರೆಗೆ 90 ರನ್ಗಳನ್ನು ಹೊಂದಿದ್ದ ಆರ್ಸಿಬಿಗೆ ಬಲ ತುಂಬಿದ್ದೇ ದೇವದತ್ತ ಪಡಿಕಲ್ ಅವರ ಆಕರ್ಷಕ ಅರ್ಧಶತಕ. ಪಡಿಕಲ್ಗೆ ಸಾಥ್ ನೀಡಿದ ಕ್ಯಾಪ್ಟನ್ ರಜತ್ ಪಾಟೀದಾರ್ ಕೂಡ ಕಡಿಮೆ ಎಸೆತಗಳಲ್ಲಿ ಸ್ಫೋಟಕ ಸಿಕ್ಸರ್, ಬೌಂಡರಿಗಳನ್ನು ಬಾರಿಸಿದರು. ಇವರಿಬ್ಬರ ಹಾದಿಯನ್ನೇ ಹಿಡಿದ ದೈತ್ಯ ಟಿಮ್ ಡೇವಿಡ್ ಬ್ಯಾಕ್ ಟು ಬ್ಯಾಕ್ ಸಿಕ್ಸರ್ಗಳನ್ನು ಸಿಡಿಸಿದರು. ಇದು ಮತ್ತೊಮ್ಮೆ ಚೆನ್ನೈ ಪಡೆಯ ಬೌಲರ್ಗಳ ಸಾಮರ್ಥ್ಯವನ್ನು ಪ್ರಶ್ನಿಸುವಂತೆ ಮಾಡಿತು.
ಮತ್ತದೇ ತಪ್ಪು
ಮೊದಲೆರೆಡು ಪಂದ್ಯಗಳಲ್ಲಿಯೂ ಪವರ್ಪ್ಲೇಯಲ್ಲಿ ವಿಕೆಟ್ ಪಡೆಯಲು ಪರದಾಡಿದ ಸಿಎಸ್ಕೆ ಬೌಲರ್ಗಳು, ರಜತ್ ಪಡೆಯ ವಿರುದ್ಧವೂ ವಿಕೆಟ್ ಕೀಳಲು ತೀರ ಹೆಣಗಾಡಿದರು. ಚೆನ್ನೈ ಬೌಲರ್ಗಳಿಗೆ ನೀರು ಕುಡಿಸಿದ ಆರ್ಸಿಬಿ, 20 ಓವರ್ನಲ್ಲಿ 3 ವಿಕೆಟ್ ನಷ್ಟಕ್ಕೆ 250 ರನ್ ಕಲೆಹಾಕಿತು. ಈ ಬೃಹತ್ ಗುರಿಯನ್ನು ತಲುಪಿ, ತನ್ನ ಮೊದಲ ಗೆಲುವಿನ ಖಾತೆಯನ್ನು ತೆರೆಯಲಿದೆಯಾ ಚೆನ್ನೈ ಸೂಪರ್ ಕಿಂಗ್ಸ್ ಎಂಬುದನ್ನು ದ್ವಿತೀಯ ಇನ್ನಿಂಗ್ಸ್ನಲ್ಲಿ ಕಾದು ನೋಡಬೇಕಿದೆ.
ಆರ್ಸಿಬಿ ಬ್ಯಾಟಿಂಗ್ ವಿವರ
ವಿರಾಟ್ ಕೊಹ್ಲಿ - 28 ರನ್, 18 ಎಸೆತ
ಫಿಲ್ ಸಾಲ್ಟ್ - 46 ರನ್, 30 ಎಸೆತ
ದೇವದತ್ತ ಪಡಿಕಲ್ - 50 ರನ್, 29 ಎಸೆತ
ರಜತ್ ಪಾಟೀದಾರ್ - 48* ರನ್, 19 ಎಸೆತ
ಟಿಮ್ ಡೇವಿಡ್ - 70* ರನ್, 25 ಎಸೆತ