ಸಿಎಸ್​ಕೆ ಮಾಡಿಕೊಂಡ ಬಿಗ್ ಮಿಸ್ಟೇಕ್​ ಇದು! ಹರಾಜಿನಲ್ಲಿ ಈ ತಪ್ಪು ಮಾಡದೆ ಇದ್ದಿದ್ರೆ ಇಂಥಾ ಪರಿಸ್ಥಿತಿ ಬರ್ತಿರಲಿಲ್ಲ

IPL 2026: ಮಾ.28ರಿಂದ ಆರಂಭಗೊಂಡ ಐಪಿಎಲ್​ 19ನೇ ಆವೃತ್ತಿಯ ಪ್ರತಿ ಪಂದ್ಯಗಳು ರೋಚಕತೆಗೆ ಸಾಕ್ಷಿಯಾಗುತ್ತಿವೆ. ಆದರೆ, ಐದು ಬಾರಿ ಚಾಂಪಿಯನ್ಸ್​ ಪಟ್ಟ ಅಲಂಕರಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್ ಪಂದ್ಯಗಳನ್ನು ಹೊರತುಪಡಿಸಿ. ಇದಕ್ಕೆ ಮುಖ್ಯ ಕಾರಣವೇ, ಫ್ರಾಂಚೈಸಿ ಹರಾಜು ಪ್ರಕ್ರಿಯೆಯಲ್ಲಿ ಮಾಡಿಕೊಂಡ ಎಡವಟ್ಟು. ಆಡಿರುವ ಎರಡು ಪಂದ್ಯಗಳಲ್ಲಿಯೂ ಹೀನಾಯ ಸೋಲುಂಡಿರುವ ಸಿಎಸ್​ಕೆ, ಉತ್ತಮ ಆಲ್​ರೌಂಡ್ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿದೆ.

ಸರಿಯಾದ ಬ್ಯಾಟಿಂಗ್ ಹಾಗೂ ಬಲಿಷ್ಠ ಬೌಲಿಂಗ್ ಯೂನಿಟ್​ ಹೊಂದದ ಸಿಎಸ್​ಕೆ ಪಡೆಗೆ 19ನೇ ಆವೃತ್ತಿಯಲ್ಲಿ ಗೆಲುವು ಬಹುದೂರ ಎನ್ನುವಂತೆ ಮಾಡಿಟ್ಟಿದೆ. ಕ್ಯಾಪ್ಟನ್ ಸ್ಥಾನದಲ್ಲಿರುವ ರುತುರಾಜ್​ ಗಾಯಕ್ವಾಡ್​ರಿಂದ ಯಾವುದೇ ಒಳ್ಳೆಯ ಇನ್ನಿಂಗ್ಸ್​ ಬಂದಿಲ್ಲ. ಮತ್ತೊಂದೆಡೆ, ಉತ್ತಮ ನಾಯಕತ್ವವೂ ಕಾಣುತ್ತಿಲ್ಲ. ಉಳಿದ ಆಟಗಾರರು ಕೂಡ ತಮ್ಮ ತಮ್ಮ ಸಾಮರ್ಥ್ಯವನ್ನು ತೋರುವಲ್ಲಿ ವಿಫಲರಾಗುತ್ತಿರುವುದು ತಂಡದ ಹಳೆಯ ಗುಣಮಟ್ಟವನ್ನು ಗಾಳಿಯಲ್ಲಿ ತೂರಿದೆ.

ಆಡಿರುವ ಎರಡು ಮ್ಯಾಚ್​ಗಳಲ್ಲಿ ಕಳಪೆ ಪ್ರದರ್ಶನ ನೀಡಿ, ಹೀನಾಯ ಸೋಲು ಅನುಭವಿಸಿರುವ ಚೆನ್ನೈ ಪಡೆಗೆ ಸಮೀರ್​ ರಿಜ್ವಿ ಉತ್ತಮ ಆಟಗಾರರಾಗಿದ್ದರು. ಆದರೆ, ಹರಾಜು ಪ್ರಕ್ರಿಯೆಗೂ ಮುನ್ನ ಅವರನ್ನು ತಂಡದಿಂದ ರಿಲೀಸ್​ ಮಾಡಿದ ಸಿಎಸ್​ಕೆ, ಅವರ ಬದಲಿಗೆ ಬೇರೆ ಆಟಗಾರನನ್ನು ಖರೀದಿಸಿತು. ಚೆನ್ನೈ ಪಡೆ ಕೈಬಿಟ್ಟ ರಿಜ್ವಿಯನ್ನು ಡೆಲ್ಲಿ ಕ್ಯಾಪಿಟಲ್ಸ್​ ತಮ್ಮ ತೆಕ್ಕೆಗೆ ಕರೆದುಕೊಂಡಿತು. ಇಲ್ಲೇ ಆಗಿದ್ದು ಎಡವಟ್ಟು. ಸದ್ಯ ಡೆಲ್ಲಿ ಪರ ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡುತ್ತಿರುವ ಸಮೀರ್​, ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿರುವುದು ನಿಜಕ್ಕೂ ಗಮನಾರ್ಹ.

ಲಖನೌ ಸೂಪರ್ ಜೈಂಟ್ಸ್​ ವಿರುದ್ಧದ ಮೊದಲ ಪಂದ್ಯದಲ್ಲಿ ಅಜೇಯರಾಗಿ 47 ಎಸೆತಕ್ಕೆ 70 ರನ್​ ಬಾರಿಸಿದ ರಿಜ್ವಿ, ಮುಂಬೈ ಇಂಡಿಯನ್ಸ್​ ಎದುರು ಕೂಡ ಭರ್ಜರಿ ಇನ್ನಿಂಗ್ಸ್​ ನೀಡಿದರು. 51 ಎಸೆತಕ್ಕೆ 90 ರನ್​ ಸಿಡಿಸಿದರು. ಎರಡು ಬಹುಮುಖ್ಯ ಪಂದ್ಯಗಳಲ್ಲಿ ತಂಡಕ್ಕೆ ಆಸರೆಯಾದ ಸಮೀರ್​ಗೆ ಪ್ಲೇಯರ್​ ಆಫ್​ ದಿ ಮ್ಯಾಚ್​ ಅವಾರ್ಡ್​ ಕೂಡ ಲಭಿಸಿತು. ಇದನ್ನು ಗಮನಿಸಿದ ಕ್ರಿಕೆಟ್​ ಪ್ರೇಮಿಗಳು ಸದ್ಯ ಸಿಎಸ್​ಕೆ ಫ್ರಾಂಚೈಸಿಗೆ ಜಾಲತಾಣಗಳಲ್ಲಿ ಹಿಗ್ಗಾಮುಗ್ಗಾ ಉಗಿದಿದ್ದಾರೆ.

ಇದೇ ಸಿಎಸ್​ಕೆ 2024ರ ಹರಾಜಿನಲ್ಲಿ 8.4 ಕೋಟಿ ರೂ.ಗೆ ರಿಜ್ವಿಯನ್ನು ತಮ್ಮ ತಂಡಕ್ಕೆ ಖರೀದಿ ಮಾಡಿತು. ಆದರೆ, ಒಂದೇ ವರ್ಷಕ್ಕೆ ಅವರನ್ನು ರಿಲೀಸ್​ ಮಾಡಿತು. ಇದನ್ನೇ ಲಾಭ ಮಾಡಿಕೊಂಡ ಡೆಲ್ಲಿ ಕ್ಯಾಪಿಟಲ್ಸ್​, ತನ್ನ ಬುದ್ಧಿವಂತಿಕೆ ಬಳಸಿ, ಕೇವಲ 95 ಲಕ್ಷ ರೂ.ಗೆ ಅವರನ್ನು ಖರೀದಿಸಿತು. ಇದೀಗ, ಕಡಿಮೆ ಮೊತ್ತಕ್ಕೆ ಕೊಂಡುಕೊಂಡ ಡಿಸಿ ಪರ ರಿಜ್ವಿ ಸ್ಫೋಟಕ ಇನ್ನಿಂಗ್ಸ್​ ನೀಡುತ್ತಿರುವುದು ಹಲವರ ಹುಬ್ಬೇರಿಸಿದೆ.