ಸಿಎಸ್ಕೆ ಕ್ರಿಕೆಟಿಗರ ಪುನರ್ಮಿಲನ; ನಿರೀಕ್ಷೆಯಂತೆ ಬರಲಿಲ್ಲ ಜನ!
ಚೆನ್ನೈ: ಆರ್ಸಿಬಿ ತಂಡದ "ಅನ್ಬಾಕ್ಸ್' ಕಾರ್ಯಕ್ರಮದ ಮಾದರಿಯಲ್ಲಿ ಐದು ಬಾರಿಯ ಐಪಿಎಲ್ ಚಾಂಪಿಯನ್ ಚೆನ್ನೈ ಸೂಪರ್ಕಿಂಗ್ಸ್ (chennai superkings) ತಂಡ ಭಾನುವಾರ ಎಂ.ಎ. ಚಿದಂಬರಂ ಸ್ಟೇಡಿಯಂನಲ್ಲಿ "ರೋರ್ 26' ಹೆಸರಿನಲ್ಲಿ ಅಭಿಮಾನಿಗಳಿಗಾಗಿ ವಿಶೇಷ ಕಾರ್ಯಕ್ರಮವೊಂದನ್ನು ಆಯೋಜಿಸಿತು. ಇದರಲ್ಲಿ ಹಾಲಿ ಆಟಗಾರರೊಂದಿಗೆ ಸಿಎಸ್ಕೆ ತಂಡದ ಮಾಜಿ ಆಟಗಾರರೂ ಭಾಗವಹಿಸಿ ಅಭಿಮಾನಿಗಳಿಗೆ ಮುದ ನೀಡಿದರು.
ಸಿಎಸ್ಕೆ ತಂಡದ ಮಾಜಿ ಆಟಗಾರರಾದ ಮ್ಯಾಥ್ಯೂ ಹೇಡನ್, ಮೈಕೆಲ್ ಹಸ್ಸೆ, ಡ್ವೇನ್ ಬ್ರಾವೊ, ಮುತ್ತಯ್ಯ ಮುರಳೀಧರನ್, ಹರ್ಭಜನ್ ಸಿಂಗ್, ಮುರಳಿ ವಿಜಯ್, ಸುರೇಶ್ ರೈನಾ, ಪಾರ್ಥಿವ್ ಪಟೇಲ್ ಮತ್ತು ಎಸ್. ಬದರೀನಾಥ್ ಮತ್ತೆ ಹಳದಿ ಜೆರ್ಸಿಯಲ್ಲಿ ಕಾಣಿಸಿಕೊಂಡರು ಮತ್ತು ಹಾಲಿ ಆಟಗಾರರೊಂದಿಗೆ ಆಡಿ ಸಂಭ್ರಮಿಸಿದರು.
ಮಾಜಿ ನಾಯಕ ಎಂಎಸ್ ಧೋನಿ (MS Dhoni) ತಂಡದ ಹೊಸ ಸದಸ್ಯ ಸಂಜು ಸ್ಯಾಮ್ಸನ್ ಅವರಿಗೆ ಸ್ಮರಣಿಕೆ ನೀಡಿ ವಿಶೇಷವಾಗಿ ಸ್ವಾಗತಿಸಿದರು. ಟಿ20 ವಿಶ್ವಕಪ್ ವಿಜೇತ ಶಿವಂ ದುಬೆ ಮತ್ತು 19 ವಯೋಮಿತಿ ವಿಶ್ವಕಪ್ ವಿಜೇತ ತಂಡದ ನಾಯಕ ಆಯುಷ್ ಮಹಾತ್ರೆಗೂ ಸ್ಮರಣಿಕೆ ನೀಡಿ ಗೌರವಿಸಿದರು. ಬಳಿಕ ಸುರೇಶ್ ರೈನಾ ಮತ್ತು ಮ್ಯಾಥ್ಯೂ ಹೇಡನ್ ಅವರನ್ನು ಸಿಎಸ್ಕೆ ತಂಡದ ಹಾಲ್ ಆಫ್ ಫೇಮ್ಗೆ ಸೇರ್ಪಡೆಗೊಳಿಸಲಾಯಿತು.
ಇದೇ ವೇಳೆ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ವಿಶೇಷ ಸಂಗೀತ ಕಾರ್ಯಕ್ರಮ ನಡೆಸಿಕೊಟ್ಟರು. ಆದರೆ ಕಾರ್ಯಕ್ರಮಕ್ಕೆ ಸ್ಟೇಡಿಯಂನ ಪ್ರೇಕ್ಷಕರ ಗ್ಯಾಲರಿ ಹೆಚ್ಚಿನ ಸಂಖ್ಯೆಯಲ್ಲಿ ಭರ್ತಿಯಾಗಿರಲಿಲ್ಲ. ಭಾನುವಾರದಂದು ಸಮಾರಂಭ ಆಯೋಜಿಸಿದರೂ, ಸಿಎಸ್ಕೆ ಫ್ರಾಂಚೈಸಿ ನಿರೀಕ್ಷಿಸಿದಷ್ಟು ಜನ ಸ್ಟೇಡಿಯಂಗೆ ಆಗಮಿಸಲಿಲ್ಲ.
ಸಿಎಸ್ಕೆ ತಂಡ ಮಾರ್ಚ್ 30ರಂದು ಗುವಾಹಟಿಯಲ್ಲಿ ರಾಜಸ್ಥಾನ ರಾಯಲ್ಸ್ ವಿರುದ್ಧ ಆಡುವ ಮೂಲಕ ಐಪಿಎಲ್ 19ನೇ ಆವೃತ್ತಿಯಲ್ಲಿ ಅಭಿಯಾನ ಆರಂಭಿಸಲಿದೆ.