ನಮಗ್ಯಾರಿಗೂ ಇಲ್ಲದ್ದು ಅವನಿಗೆ... ಪಂದ್ಯ ಗೆದ್ದ ಖುಷಿಯಲ್ಲಿ 'ಬೇಬಿ ಬಾಸ್​' ಬಗ್ಗೆ ನಾಯಕ ಪರಾಗ್​ನಿಂದ ಇದೆಂಥಾ ಮಾತು

Vaibhav Suryavanshi: ನಿನ್ನೆ (ಏ.10) ನಡೆದ ಐಪಿಎಲ್ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ (ಆರ್‌ಆರ್) ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ವಿರುದ್ಧ ಆರು ವಿಕೆಟ್‌ಗಳ ಭರ್ಜರಿ ಗೆಲುವು ದಾಖಲಿಸಿತು. ರಾಜಸ್ಥಾನದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ ವೈಭವ್ ಸೂರ್ಯವಂಶಿ, ಕೇವಲ 25 ಎಸೆತಗಳಲ್ಲಿ 78 ರನ್​ ಸಿಡಿಸುವ ಮೂಲಕ ಕ್ರಿಕೆಟ್​ ಪ್ರಿಯರಿಗೆ ಮನರಂಜನೆಯ ರಸದೌತಣ ನೀಡಿದರು. ವೈಭವ್ ಸ್ಫೋಟಕ ಆಟಕ್ಕೆ ಸ್ವತಃ ವಿರಾಟ್​ ಕೊಹ್ಲಿ ಮೆಚ್ಚುಗೆ ವ್ಯಕ್ತಪಡಿಸಿದ್ದು ವಿಶೇಷ.  

ಆರ್​ಸಿಬಿ ನೀಡಿದ 202 ರನ್‌ಗಳ ಗುರಿಯನ್ನು ಬೆನ್ನತ್ತಿದ ಸಂದರ್ಭದಲ್ಲಿ 78 ರನ್ ಬಾರಿಸಿದ ಸೂರ್ಯವಂಶಿ ತಮ್ಮ ಇನ್ನಿಂಗ್ಸ್‌ನಲ್ಲಿ ಎಂಟು ಬೌಂಡರಿ ಮತ್ತು ಏಳು ಸಿಕ್ಸರ್‌ಗಳನ್ನು ಬಾರಿಸಿದರು. ಐಪಿಎಲ್​ 19ನೇ ಆವೃತ್ತಿಯ ಕೇವಲ ನಾಲ್ಕು ಪಂದ್ಯಗಳಲ್ಲಿ 200 ರನ್ ಗಳಿಸಿರುವ ವೈಭವ್​, ಅತ್ಯಧಿಕ ರನ್​ ಹೊಂದಿರುವ ಬ್ಯಾಟರ್ ಆಗಿ ಆರೆಂಜ್ ಕ್ಯಾಪ್  ತಮ್ಮದಾಗಿಸಿಕೊಂಡಿದ್ದಾರೆ. ಕಳೆದ ಸೀಸನ್​ನಿಂದಲೇ 15 ವರ್ಷದ ಬೇಬಿ ಬಾಸ್​ಗೆ ಕ್ರಿಕೆಟ್​ ಪ್ರಿಯರು ಮಾತ್ರವಲ್ಲದೇ, ಅನೇಕರು ಅಭಿಮಾನಿಗಳಾಗಿದ್ದಾರೆ. 

ಹೆಚ್ಚಿನ ಸಂಖ್ಯೆಯಲ್ಲಿ ವೈಭವ್ ಸೂರ್ಯವಂಶಿಗೆ ಫಾಲೋವರ್ಸ್ ಆಗಿದ್ದಾರೆ. ಇದು ಆತನ ಬೆಳವಣಿಗೆ ಹಾಗೂ ಜನಪ್ರಿಯತೆಗೆ ಹಿಡಿದ ಕನ್ನಡಿಯಾಗಿದೆ. ಈ ಮಧ್ಯೆ, ಸತತವಾಗಿ ತಮ್ಮ ತಂಡದ ಗೆಲುವಿಗೆ ಕಾರಣವಾಗತ್ತಿರುವ ವೈಭವ್​ ಬಗ್ಗೆ ರಾಜಸ್ಥಾನ ರಾಯಲ್ಸ್ ತಂಡದ ನಾಯಕ ರಿಯಾನ್ ಪರಾಗ್, ಕೆಲವು ಕುತೂಹಲಕಾರಿ ವಿಷಯಗಳನ್ನೇ ಹಂಚಿಕೊಂಡಿದ್ದಾರೆ. 

ಪಂದ್ಯ ಗೆದ್ದ ಖುಷಿಯಲ್ಲಿ ಮಾತನಾಡಿದ ಪರಾಗ್​, "ವೈಭವ್ ಸೂರ್ಯವಂಶಿ ತುಂಬಾ ಮೋಜಿನ ವ್ಯಕ್ತಿ. ತಂಡದಲ್ಲಿರುವ ಪ್ರತಿಯೊಬ್ಬರೂ ಈತನನ್ನು ಬಹಳ ಇಷ್ಟಪಡುತ್ತಾರೆ. ಆತನಿಗೆ ಅಧಿಕ ಸಂಖ್ಯೆಯಲ್ಲಿ ಫ್ಯಾನ್ಸ್​ಗಳಿದ್ದಾರೆ. ಸೂರ್ಯವಂಶಿಗೆ ತಿನ್ನುವುದು ಎಂದರೆ ಸಿಕ್ಕಾಪಟ್ಟೆ ಇಷ್ಟ. ಹೀಗಾಗಿ, ಆಗಾಗ್ಗೆ ಹೊರಗೆ ಹೋಗಲು ಬಯಸುತ್ತಾರೆ. ವೈಭವ್​ಗೆ ನೆಚ್ಚಿನ ಫುಡ್​ಗಳನ್ನು ನಮ್ಮ ತಂಡದ ಪರವಾಗಿ ನಾವೇ ಮೊದಲೇ ವ್ಯವಸ್ಥೆ ಮಾಡುತ್ತೇವೆ. ಆಡುವಾಗಲೂ ಅಷ್ಟೇ, ವೈಭವ್​ ತಮ್ಮ ಬ್ಯಾಟಿಂಗ್ ಎಂಜಾಯ್​ ಮಾಡ್ತಾರೆ. ಈ ನಿಟ್ಟಿನಲ್ಲಿ, ನಾವು ಕೂಡ ಹೆಚ್ಚೆಚ್ಚು ಅವಕಾಶಗಳನ್ನು ಅವರಿಗೆ ನೀಡುತ್ತಿದ್ದೇವೆ ಎಂದು ಹೇಳಿದ್ದಾರೆ,(ಏಜೆನ್ಸೀಸ್).