2ನೇ ಇನಿಂಗ್ಸ್​ನಲ್ಲೂ ಆಸೀಸ್​ಗೆ ಕಡಿವಾಣ; ಐತಿಹಾಸಿಕ ಗೆಲುವಿನ ಕನಸಿನಲ್ಲಿ ಬಾಂಗ್ಲಾದೇಶ

ಮರಾರಾ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಶನಿವಾರ 6 ವಿಕೆಟ್​ಗೆ 351 ರನ್​ಗಳಿಂದ 3ನೇ ದಿನದಾಟ ಆರಂಭಿಸಿದ ಬಾಂಗ್ಲಾ, ಭೋಜನ ವಿರಾಮದ ಬಳಿಕ 138 ಓವರ್​ಗಳಲ್ಲಿ 426 ರನ್​ಗಳಿಗೆ ಆಲೌಟ್​ ಆಯಿತು. ಈ ಮೂಲಕ ಪ್ರವಾಸಿ ತಂಡ ಮೊದಲ ಇನಿಂಗ್ಸ್​ನಲ್ಲಿ 228 ರನ್​ ಮುನ್ನಡೆ ಸಾಧಿಸಿತು. ನಂತರ ದ್ವೀತಿಯ ಇನಿಂಗ್ಸ್​ನಲ್ಲೂ 37 ರನ್​ಗಳಿಗೆ ಆರಂಭಿಕರಿಬ್ಬರ ವಿಕೆಟ್​ಗಳನ್ನೂ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿದ ಆಸೀಸ್​, ದಿನದಂತ್ಯಕ್ಕೆ 53 ಓವರ್​ಗಳಲ್ಲಿ 4 ವಿಕೆಟ್​ಗೆ 161 ರನ್​ ಗಳಿಸಿ ಸಂಕಷ್ಟದಲ್ಲಿದೆ. ಆಸೀಸ್​ ಇನ್ನೂ 67 ರನ್​ ಹಿನ್ನಡೆಯಲ್ಲಿದೆ. ಕ್ಯಾಮರಾನ್​ ಗ್ರೀನ್​ (43*) ಜತೆಗೆ ಅಲೆಕ್ಸ್​ ಕ್ಯಾರಿ (19*) ಕ್ರೀಸ್​ನಲ್ಲಿದ್ದಾರೆ. ಇವರಿಬ್ಬರ ನಡುವೆ ಮುರಿಯದ 5ನೇ ವಿಕೆಟ್​ಗೆ 39 ರನ್​ ಜತೆಯಾಟ ನಡೆದಿದೆ.

ಬಾಂಗ್ಲಾ ಇನ್ನು 6 ವಿಕೆಟ್​ಗಳನ್ನು ಬೇಗನೆ ಕಬಳಿಸಿದರೆ ಆಸೀಸ್​ ನೆಲದಲ್ಲಿ ಚೊಚ್ಚಲ ಟೆಸ್ಟ್​ ಗೆಲುವು ಸಾಧಿಸುವ ಅವಕಾಶವಿದೆ ಮತ್ತು ಇದು ಬಾಂಗ್ಲಾಗೆ ಟೆಸ್ಟ್​ ಕ್ರಿಕೆಟ್​ ಇತಿಹಾಸದಲ್ಲೇ ಅತಿದೊಡ್ಡ ಗೆಲುವು ಎನಿಸಲಿದೆ.

ಮುಂದಿನ 12 ತಿಂಗಳ ಅವಧಿಯಲ್ಲಿ ಬರೋಬ್ಬರಿ 20 ಟೆಸ್ಟ್​ ಆಡಬೇಕಿರುವ ಆಸೀಸ್​, ಈ ಪೈಕಿ ಮೊದಲ ಟೆಸ್ಟ್​ನಲ್ಲೇ ಬಾಂಗ್ಲಾದಂಥ ತಂಡದ ಎದುರು ಸೋಲಿನ ಭೀತಿಯಲ್ಲಿದೆ. ಪ್ರಮುಖ ಮೂವರು ವೇಗಿಗಳಾದ ಕಮ್ಮಿನ್ಸ್​, ಸ್ಟಾರ್ಕ್​, ಹ್ಯಾಸಲ್​ವುಡ್​ ದೀರ್ಕಾಲದ ಬಳಿಕ ಜತೆಯಾಗಿ ಆಡುತ್ತಿರುವ ನಡುವೆಯೂ ಆಸೀಸ್​ ತೀವ್ರ ಒತ್ತಡಕ್ಕೆ ಸಿಲುಕಿದೆ. 2010ರಲ್ಲಿ ಪಾಕ್​ ವಿರುದ್ಧದ ಸಿಡ್ನಿ ಟೆಸ್ಟ್​ನಲ್ಲಿ 206 ರನ್​ ಹಿನ್ನಡೆಯ ಬಳಿಕವೂ ಆಸೀಸ್​ ಗೆದ್ದಿದ್ದು, ಅತಿದೊಡ್ಡ ಹಿನ್ನಡೆಯ ಬಳಿಕ ಜಯ ಕಂಡ ದೃಷ್ಟಾಂತವಾಗಿದೆ. ಈ ಬಾರಿ ಆ ದಾಖಲೆ ಮುರಿಯುವ ಸವಾಲು ಆಸೀಸ್​ ಮುಂದಿದೆ. ಪಂದ್ಯದಲ್ಲಿ ಇನ್ನೂ 2 ದಿನಗಳ ಆಟ ಬಾಕಿ ಇರುವುದರಿಂದ ಸ್ಪಷ್ಟ ಫಲಿತಾಂಶ ಖಚಿತವೆನಿಸಿದೆ.

ಆಸ್ಟ್ರೆಲಿಯಾ: 198 ಮತ್ತು 53 ಓವರ್​ಗಳಲ್ಲಿ 4 ವಿಕೆಟ್​ಗೆ 161 (ಹೆಡ್​ 17, ಲಬುಶೇನ್​ 31, ಸ್ಮಿತ್​ 44, ಗ್ರೀನ್​ 43*, ಕ್ಯಾರಿ 19*, ಮಹಮೂದ್​ 33ಕ್ಕೆ 2, ತೈಜುಲ್​ 28ಕ್ಕೆ 1, ಮೆಹಿದಿ ಹಸನ್​ 20ಕ್ಕೆ 1), ಬಾಂಗ್ಲಾದೇಶ: 138 ಓವರ್​ಗಳಲ್ಲಿ 426 (ಮೆಹಿದಿ ಹಸನ್​ 65, ತೈಜುಲ್​ 17, ಟಸ್ಕಿನ್​ 14*, ಹ್ಯಾಸಲ್​ವುಡ್​ 89ಕ್ಕೆ 6, ಸ್ಟಾರ್ಕ್​ 79ಕ್ಕೆ 2, ಕಮ್ಮಿನ್ಸ್​ 75ಕ್ಕೆ 1, ಲ್ಯಾನ್​ 102ಕ್ಕೆ 1).