ಗೆದ್ದರೆ ಏನು? ಅವರು ಟ್ರೋಫಿ ನನ್ನ... ಭಾರೀ ಮುಖಭಂಗ ಉಂಟಾದರೂ ಸೊಕ್ಕಿನ ಮಾತು ಬಿಡದ​ ಅಮೀರ್​

IND vs NZ Final: ಕೋಟ್ಯಂತರ ಭಾರತೀಯರ ಆಸೆಯನ್ನು ಕಡೆಗೂ ಈಡೇರಿಸಿದ ಟೀಮ್​ ಇಂಡಿಯಾ, ನ್ಯೂಜಿಲೆಂಡ್​ ವಿರುದ್ಧ 96 ರನ್​ಗಳ ಭರ್ಜರಿ ಗೆಲುವು ದಾಖಲಿಸುವ ಮೂಲಕ ಟಿ20 ವಿಶ್ವಕಪ್​ ಟೂರ್ನಿಯ ವಿಜಯಶಾಲಿಯಾಗಿ ಹೊರಹೊಮ್ಮಿತು. ಈ ಮೂಲಕ ಸತತ ಮೂರು ಬಾರಿ ಟಿ20 ವಿಶ್ವಕಪ್ ಗೆದ್ದ ತಂಡ ಮತ್ತು ತವರಿನಲ್ಲಿ ಚುಟುಕು ವಿಶ್ವಕಪ್ ಗೆದ್ದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಸೂರ್ಯಕುಮಾರ್ ಯಾದವ್ ಪಡೆ ಪಾತ್ರವಾಗಿದೆ. ಸದ್ಯ ಇದೇ ಪಾಕಿಸ್ತಾನ ಆಟಗಾರರ ಹೊಟ್ಟೆಗೆ ಬೆಂಕಿ ಇಟ್ಟಿದೆ.

ಟಿ20 ವಿಶ್ವಕಪ್​ನ ಆರಂಭದಿಂದಲೂ ಭಾರತ ತಂಡವನ್ನು ಒಂದಲ್ಲ ಒಂದು ರೀತಿ ಟೀಕಿಸುತ್ತಲೇ ಬರುತ್ತಿರುವ ಪಾಕ್​ ಮಾಜಿ ಆಟಗಾರ ಮೊಹಮ್ಮದ್ ಅಮೀರ್​, ಮೊದಲಿಗೆ ಬ್ಯಾಕ್ ಟು ಬ್ಯಾಕ್ ಡಕ್​ಔಟ್ ಆದ ಅಭಿಷೇಕ್ ಶರ್ಮ ಅವರನ್ನು ಟೆಕ್ನಿಕ್​ ಇಲ್ಲದೆ ಆಡುವ ಆಟಗಾರ ಎಂದು ಟೀಕಿಸಿದರು. ಅದನ್ನೇ ಒಂದಷ್ಟು ಸಮಯ ಮುಂದುವರಿಸಿಕೊಂಡು ಬಂದ ಅಮೀರ್​, ಟೀಮ್ ಇಂಡಿಯಾ ಸಂಪೂರ್ಣವಾಗಿ ಬುಮ್ರಾ ಬೌಲಿಂಗ್ ಮೇಲೆ ನಿಂತಿದೆ. ಅವರ ಬಳಿ ಉತ್ತಮ ಬ್ಯಾಟಿಂಗ್ ಲೈನ್​ಅಪ್​ ಇಲ್ಲ ಎಂದು ನಾನಾ ರೀತಿಯಲ್ಲಿ ಭಾರತದ ಸೋಲನ್ನು ಬಯಸುತ್ತಿದ್ದರು. ಆದರೆ, ಅದ್ಯಾವುದು ನಡೆಯಲಿಲ್ಲ. ಟೀಮ್ ಇಂಡಿಯಾದ ಪ್ರತಿ ನಿರ್ಣಾಯಕ ಪಂದ್ಯಕ್ಕೂ ಮುನ್ನ ಭಾರತ ಸೋಲುತ್ತೆ ಎಂದೇ ಭವಿಷ್ಯ ನುಡಿಯುತ್ತಿದ್ದ ಅಮೀರ್​ಗೆ ಈಗ ಭಾರೀ ಮುಖಭಂಗವೇ ಉಂಟಾಗಿದೆ.

ಭಾರತ ಸೆಮಿಫೈನಲ್​ಗೆ ಹೋಗಲ್ಲ ಎಂದಿದ್ದ ಅಮೀರ್​, ಫೈನಲ್​ಗೆ ತಲುಪಲು ಅವರಲ್ಲಿ ಉತ್ತಮ ಆಟಗಾರರಿಲ್ಲ ಎಂದು ಹೇಳಿದ್ದರು. ಅದಾದ ಬಳಿಕ ಫೈನಲ್​ನಲ್ಲಿ ನ್ಯೂಜಿಲೆಂಡ್ ಗೆಲ್ಲುತ್ತದೆ ಅಂತ ನುಡಿದಿದ್ದ ಪಾಕ್​ ಕ್ರಿಕೆಟಿಗನ ಭವಿಷ್ಯವಾಣಿ ಕಡೆಗೂ ಮಣ್ಣಾಯಿತು. ಇಷ್ಟಾದ ಮೇಲೂ ಸೋಷಿಯಲ್ ಮೀಡಿಯಾದಲ್ಲಿ ಸಪ್ಪೆ ಮುಖವಿಟ್ಟುಕೊಂಡೇ ಮತ್ತೊಮ್ಮೆ ಸೊಕ್ಕಿನ ಮಾತಾಡಿರುವ ಅಮೀರ್​, ಭಾರತ ಗೆದ್ದಿದೆ. ಅದು ಓಕೆ. ಅವರೇನು ನನ್ನ ಮನೆಗೆ ಟ್ರೋಫಿಯನ್ನು ತರೋದಿಲ್ಲ ತಾನೇ. ತಮ್ಮ ಜಾಗಕ್ಕೆ ಕೊಂಡೊಯ್ದು, ಸಂಭ್ರಮಿಸುತ್ತಾರೆ ಅಷ್ಟೇ. ಓಕೆ, ವೆಲ್​ ಡನ್​ ಎಂದು ಕೋಪದಲ್ಲೇ ಹೇಳಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿದ ಅಹ್ಮದ್​ ಶೆಹಜಾದ್​, ಇವೆಲ್ಲ ಕ್ರಿಕೆಟಿಂಗ್​ ಭವಿಷ್ಯ ನುಡಿಗಳು ಅಷ್ಟೇ. ತನ್ನ ಅನುಭವದ ಮೇಲೆ ಅಮೀರ್, ಒಂದಷ್ಟು ಅಭಿಪ್ರಾಯಗಳನ್ನು ಮುಕ್ತವಾಗಿ ಹೇಳುತ್ತಿದ್ದ ಅಷ್ಟೇ. ಇದನ್ನೆಲ್ಲ ತಡೆದುಕೊಳ್ಳಬೇಕು ಎಂದು ಹೇಳಿದ್ದಾರೆ. ಆರಂಭದಿಂದಲೂ ಟೀಮ್ ಇಂಡಿಯಾವನ್ನು ಟಾರ್ಗೆಟ್​ ಮಾಡುತ್ತಲೇ ಬಂದ ಅಮೀರ್​ಗೆ ಇದೀಗ ಭಾರತೀಯ ಕ್ರಿಕೆಟ್​ ಅಭಿಮಾನಿಗಳು ಹುಡುಕಿ, ಹುಡುಕಿ ಛೀಮಾರಿ ಹಾಕುತ್ತಿದ್ದಾರೆ,(ಏಜೆನ್ಸೀಸ್).

​