ಶೆಂಜೆನ್ (ಚೀನಾ): ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಪದಕ ಕೈತಪ್ಪಿದ ನಿರಾಸೆಯ ಬಳಿಕ ಬ್ಯಾಡ್ಮಿಂಟನ್ ಕೋರ್ಟ್ನಿಂದ ದೂರವೇ ಉಳಿದಿದ್ದ ಚಿರಾಗ್ ಶೆಟ್ಟಿ ಮತ್ತು ಸಾತ್ವಿಕ್ ಸಾಯಿರಾಜ್ ಜೋಡಿ ಮಂಗಳವಾರದಿಂದ ನಡೆಯಲಿರುವ ಚೀನಾ ಮಾಸ್ಟರ್ಸ್ ಸೂಪರ್-750 ಟೂರ್ನಿಯಲ್ಲಿ ಕೊನೆಗೂ ಮರಳಿ ಕಣಕ್ಕಿಳಿಯಲು ಸಜ್ಜಾಗಿದೆ.
ಮಾಜಿ ವಿಶ್ವ ನಂ. 1 ಜೋಡಿ ಸುಮಾರು 4 ತಿಂಗಳ ಬಳಿಕ ಸ್ಪರ್ಧೆಗೆ ಮರಳುತ್ತಿದೆ. ಸಾತ್ವಿಕ್ ಅವರ ಭುಜ ನೋವಿನ ಸಮಸ್ಯೆಯೂ ಅವರ ಪುನರಾಗಮನ ವಿಳಂಬಕ್ಕೆ ಪ್ರಮುಖ ಕಾರಣವಾಗಿತ್ತು. ಇದೀಗ ಸಾತ್ವಿಕ್ ಫಿಟ್ ಆಗಿದ್ದು, ಏಷ್ಯನ್ ಗೇಮ್ಸ್ ಸ್ವರ್ಣ ಪದಕ ವಿಜೇತ ಜೋಡಿ ಕೋಚ್ ಇಲ್ಲದೆ ಮರಳಿ ಕಣಕ್ಕಿಳಿಯಲಿದೆ. ಅವರ ಹಿಂದಿನ ಕೋಚ್ ಮಥಾಯಿಸ್ ಬೋಯಿ ಒಲಿಂಪಿಕ್ಸ್ ನಿರಾಸೆಯ ಬಳಿಕ ಆಗಸ್ಟ್ನಲ್ಲೇ ಪದತ್ಯಾಗ ಮಾಡಿದ್ದರು. ಕಳೆದ ವರ್ಷ ಟೂರ್ನಿಯಲ್ಲಿ ರನ್ನರ್ಅಪ್ ಆಗಿದ್ದ ಸಾತ್ವಿಕ್-ಚಿರಾಗ್, ಈ ಬಾರಿ ಚೀನಾ ತೈಪೆಯ ಯಂಗ್ ಪೊ&ಲೀ ಜೆ ಹುಯಿ ವಿರುದ್ಧ ಮೊದಲ ಸುತ್ತಿನ ಪಂದ್ಯ ಆಡಲಿದ್ದಾರೆ.
ಸಿಂಗಲ್ಸ್ನಲ್ಲಿ ಪಿವಿ ಸಿಂಧು ಮತ್ತು ಲಕ್ಷ್ಯ ಸೇನ್ ಕಣಕ್ಕಿಳಿಯುತ್ತಿರುವ ಪ್ರಮುಖ ಭಾರತೀಯರಾಗಿದ್ದು, ಇತ್ತೀಚೆಗಿನ ನಿರಾಸೆಯನ್ನು ಬದಿಗೊತ್ತಿ ಶ್ರೀ ಗೆಲುವಿನ ಲಯಕ್ಕೆ ಮರಳುವ ಹಂಬಲದಲ್ಲಿದ್ದಾರೆ.
23 ವರ್ಷದ ಲಕ್ಷ್ಯ ಸೇನ್ 7ನೇ ಶ್ರೇಯಾಂಕಿತ ಮಲೇಷ್ಯಾದ ಲೀ ಜಿ ಜಿಯಾ ವಿರುದ್ಧ ಅಭಿಯಾನ ಆರಂಭಿಸಲಿದ್ದಾರೆ. ಅವಳಿ ಒಲಿಂಪಿಕ್ಸ್ ಪದಕ ವಿಜೇತೆ ಸಿಂಧು ಥಾಯ್ಲೆಂಡ್ನ ಸುಪನಿದ ಕೇಟ್ತೊಂಗ್ ವಿರುದ್ಧ ಮೊದಲ ಪಂದ್ಯ ಆಡಲಿದ್ದಾರೆ. ಆಕರ್ಷಿ ಕಶ್ಯಪ್ ಮತ್ತು ಮಾಳವಿಕಾ ಬಾನ್ಸೋಡ್ ಮಹಿಳಾ ಸಿಂಗಲ್ಸ್ ಕಣದಲ್ಲಿರುವ ಮತ್ತಿಬ್ಬರು ಭಾರತೀಯರಾಗಿದ್ದಾರೆ. ಮಹಿಳಾ ಡಬಲ್ಸ್ನಲ್ಲಿ ತ್ರಿಸಾ ಜೋಲಿ&ಗಾಯತ್ರಿ ಗೋಪಿಚಂದ್ ಜೋಡಿ ಮತ್ತು ಮಿಶ್ರ ಡಬಲ್ಸ್ನಲ್ಲಿ ಸಿಕ್ಕಿರೆಡ್ಡಿ-ಸುಮೀತ್ ರೆಡ್ಡಿ ದಂಪತಿ ಕಣಕ್ಕಿಳಿಯಲಿದೆ.