ಬೆಂಗಳೂರು: ವಿಶ್ವ ಸಿಂಹ ದಿನದ ಹಿನ್ನೆಲೆಯಲ್ಲಿ ಆರ್ಸಿಬಿ ತಂಡದ ಟ್ವಿಟರ್ ಖಾತೆಯಿಂದ ಸೋಮವಾರ ವಿಶೇಷವಾದ ಪೋಸ್ಟ್ ಒಂದನ್ನು ಮಾಡಲಾಗಿತ್ತು. ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಮತ್ತು ಸಿಂಹವೊಂದರ ಚಿತ್ರವನ್ನು ಪ್ರಕಟಿಸಿ, ಇವೆರಡರ ನಡುವಿನ ವ್ಯತ್ಯಾಸವನ್ನು ತಿಳಿಸುವಂತೆ ಫ್ರಾಂಚೈಸಿ ತನ್ನ ಅಭಿಮಾನಿಗಳಿಗೆ ಕೇಳಿಕೊಂಡಿತ್ತು. ಇದಕ್ಕೆ ಪ್ರತಿಯಾಗಿ ಆರ್ಸಿಬಿ ತಂಡದ ಪ್ರಮುಖ ಸ್ಪಿನ್ನರ್ ಯಜುವೇಂದ್ರ ಚಾಹಲ್ ಅಷ್ಟೇ ತಮಾಷೆಯ ಉತ್ತರದೊಂದಿಗೆ ನಾಯಕನ ಕಾಲೆಳೆದಿದ್ದಾರೆ. ಹಾಗಾದರೆ ಚಾಹಲ್ ನೀಡಿದ ಉತ್ತರವೇನು ಗೊತ್ತೇ?
ಕೊಹ್ಲಿ ಮತ್ತು ಸಿಂಹದ ನಡುವಿನ ವ್ಯತ್ಯಾಸ ತಿಳಿಸಿ, ನಮಗೆ ಯಾವ ವ್ಯತ್ಯಾಸವೂ ತಿಳಿಯುತ್ತಿಲ್ಲ ಎನ್ನುವ ಟ್ವೀಟ್ನ ಮೂಲಕ ಆರ್ಸಿಬಿ ಫ್ರಾಂಚೈಸಿ, ಇಬ್ಬರ ನಡುವೆ ಏನೂ ವ್ಯತ್ಯಾಸ ಇಲ್ಲ. ಕೊಹ್ಲಿ ಅವರು ಸಿಂಹದಂತೆ ಎಂದು ತಿಳಿಸಲು ಬಯಸಿತ್ತು. ಆದರೆ ಚಾಹಲ್ ಇಬ್ಬರ ನಡುವಿನ ವ್ಯತ್ಯಾಸವೇನೆಂದು ಟ್ವಿಟರ್ನಲ್ಲೇ ಉತ್ತರ ನೀಡಿದ್ದಾರೆ. 'ವ್ಯತ್ಯಾಸ ಇದೆ. ಮೊದಲ ಚಿತ್ರದಲ್ಲಿ ಬಟ್ಟೆ ಧರಿಸಿದ್ದರೆ, 2ನೇ ಚಿತ್ರದಲ್ಲಿ ಬಟ್ಟೆ ಧರಿಸಿಲ್ಲ' ಎಂದು ಟ್ವೀಟಿಸುವ ಮೂಲಕ ಚಾಹಲ್ ಕಾಲೆಳೆದಿದ್ದಾರೆ.
ಚಾಹಲ್ ಅವರ ಕಮೆಂಟ್ ಆರ್ಸಿಬಿ ಅಭಿಮಾನಿಗಳ ನಗುವಿಗೆ ಕಾರಣವಾಗಿದೆ. ಈಗಾಗಲೆ ವಿವಿಧ ಕಮೆಂಟ್ಗಳ ಮೂಲಕ ಟ್ವಿಟರ್ನಲ್ಲಿ ಗಮನಸೆಳೆಯುತ್ತಿದ್ದ ಚಾಹಲ್ರ ಟ್ವೀಟ್ 10 ಸಾವಿರಕ್ಕೂ ಅಧಿಕ ಲೈಕ್ಸ್ಗಳನ್ನು ಪಡೆದುಕೊಂಡಿದೆ. ಕೆಲ ಆರ್ಸಿಬಿ ಅಭಿಮಾನಿಗಳು, 'ಒಬ್ಬ ಕ್ರಿಕೆಟ್ನ ರಾಜ, ಮತ್ತೊರ್ವ ಕಾಡಿನ ರಾಜ' ಎಂದೂ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.