ಹೈದರಾಬಾದ್: ಆರಂಭಿಕ ಪಂದ್ಯದಲ್ಲಿ ಸೋಲು ಕಂಡಿರುವ ತಂಡಗಳಾದ ಸನ್ರೈಸರ್ಸ್ ಹೈದರಾಬಾದ್ ಮತ್ತು ಮುಂಬೈ ಇಂಡಿಯನ್ಸ್ ಐಪಿಎಲ್&17ರಲ್ಲಿ ಬುಧವಾರ ಮುಖಾಮುಖಿ ಆಗಲಿವೆ. ಟೂರ್ನಿಯ ಮೊದಲ ಗೆಲುವಿಗಾಗಿ ಉಭಯ ತಂಡಗಳ ನಡುವೆ ನಿಕಟ ಪೈಪೋಟಿ ಏರ್ಪಡುವ ನಿರೀಕ್ಷೆ ಇದೆ.
ಹೊಸ ನಾಯಕರ ಸಾರಥ್ಯದಲ್ಲಿ ಕಣಕ್ಕಿಳಿದ ಮೊದಲ ಪಂದ್ಯದಲ್ಲಿ ಮುಂಬೈ-ಸನ್ರೈಸರ್ಸ್ ಸೋಲು ಅನುಭವಿಸಿವೆ. ಗುಜರಾತ್ ಟೈಟಾನ್ಸ್ನಿಂದ ವರ್ಗಾವಣೆಗೊಂಡ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಮತ್ತು ಆಸೀಸ್ ನಾಯಕರಾಗಿ ಅಪಾರ ಯಶ ಕಂಡು 20.5 ಕೋಟಿ ರೂ.ಗೆ ಸೇರ್ಪಡೆಯಾದ ಪ್ಯಾಟ್ ಕಮ್ಮಿನ್ಸ್ ಮೇಲೆ ಭಾರಿ ನಿರೀಕ್ಷೆ ಇತ್ತು. ಆದರೆ ಇಬ್ಬರೂ ಮೊದಲ ಪಂದ್ಯದಲ್ಲಿ ನಿರಾಸೆ ಮೂಡಿಸಿದ್ದರು. ಹಾರ್ದಿಕ್ ತನ್ನ ಮಾಜಿ ತಂಡವಾದ ಗುಜರಾತ್ ಎದುರು 6 ರನ್ಗಳಿಂದ ಸೋತಿದ್ದರೆ, ಸನ್ರೈಸರ್ಸ್ ತಂಡ ಹೆನ್ರಿಕ್ ಕ್ಲಾಸೆನ್ ಹೋರಾಟದ ನಡುವೆಯೂ ಕೆಕೆಆರ್ ಎದುರು 4 ರನ್ಗಳಿಂದ ಸೋತಿತ್ತು. ಉಭಯ ತಂಡಗಳು ಈಗ ಈ ಅಲ್ಪ ಅಂತರದ ಸೋಲಿನಿಂದ ಮೇಲೆದ್ದು ಬರುವ ಉತ್ಸಾಹದಲ್ಲಿವೆ.
ಪುಟಿದೇಳುವುದೇ ಮುಂಬೈ?
ಮುಂಬೈ ತಂಡ ಐಪಿಎಲ್ನಲ್ಲಿ ಸತತ 12ನೇ ಬಾರಿ ಆರಂಭಿಕ ಪಂದ್ಯದಲ್ಲಿ ಸೋತಿದ್ದು, ಪುಟಿದೇಳುವ ಹಂಬಲದಲ್ಲಿದೆ. ಮೊದಲ ಪಂದ್ಯದಲ್ಲಿ ಬೌಲಿಂಗ್ನಲ್ಲಿ ಜಸ್ಪ್ರೀತ್ ಬುಮ್ರಾ ಮಾತ್ರ ಪರಿಣಾಮಕಾರಿ ಎನಿಸಿದ್ದರೆ, ಬ್ಯಾಟಿಂಗ್ನಲ್ಲಿ ಮಾಜಿ ನಾಯಕ ರೋಹಿತ್ ಶರ್ಮ ಒದಗಿಸಿದ ಉತ್ತಮ ಆರಂಭ ಮತ್ತು ಇಂಪ್ಯಾಕ್ಟ್ ಆಟಗಾರ ಡಿವಾಲ್ಡ್ ಬ್ರೆವಿಸ್ ನೀಡಿದ ಉಪಯುಕ್ತ ಕೊಡುಗೆಯಷ್ಟೇ ಸಮಾಧಾನಕರವಾಗಿತ್ತು. ಸುದೀರ್ಘ ವಿಶ್ರಾಂತಿಯ ಬಳಿಕ ಮರಳಿ ಕಣಕ್ಕಿಳಿದ ಇಶಾನ್ ಕಿಶನ್ ನಿರಾಸೆ ಮೂಡಿಸಿದರೆ, ನಾಯಕ ಹಾರ್ದಿಕ್ ಪಾಂಡ್ಯಗೆ ಬ್ಯಾಟಿಂಗ್ನಲ್ಲಿ ಹಿಂಬಡ್ತಿ ನೀಡಿದ ಮುಂಬೈ ನಿರ್ಧಾರವೂ ಕೈಕೊಟ್ಟಿತು. ಬೌಲಿಂಗ್ನಲ್ಲಿ ಸ್ಪಿನ್ನರ್ಗಳಾದ ಶಮ್ಸ್ ಮುಲಾನಿ, ಪೀಯುಷ್ ಚಾವ್ಲಾ ಸುಧಾರಿತ ನಿರ್ವಹಣೆ ತೋರಬೇಕಿದೆ.
ಸನ್ಗೆ ತವರಿನ ಲಾಭ
ಟೂರ್ನಿಯ ಆರಂಭಿಕ 7 ಪಂದ್ಯಗಳಲ್ಲೂ ಆತಿಥೇಯ ತಂಡವೇ ಜಯಿಸಿದೆ. ಇದು ಸನ್ರೈಸರ್ಸ್ಗೆ ಗೆಲುವಿನ ಹಳಿ ಏರಲು ಸ್ಫೂರ್ತಿ ಎನಿಸಿದೆ. ಮಯಾಂಕ್ ಅಗರ್ವಾಲ್&ಅಭಿಷೇಕ್ ಶರ್ಮ ಹಾಕಿಕೊಟ್ಟ ಉತ್ತಮ ಬುನಾದಿ ಮತ್ತು ಕ್ಲಾಸೆನ್ ಸ್ಫೋಟಕ ಆಟದ ನಡುವೆಯೂ ಸನ್ರೈಸರ್ಸ್ ಮೊದಲ ಪಂದ್ಯ ಸೋತಿದ್ದು ನಿರಾಶಾದಾಯಕವಾಗಿತ್ತು. ಬೌಲಿಂಗ್ನಲ್ಲಿ ಅನುಭವಿ ವೇಗಿ ಭುವನೇಶ್ವರ್ ಕುಮಾರ್ ದುಬಾರಿಯಾಗಿದ್ದು ಕೂಡ ಸನ್ರೈಸರ್ಸ್ಗೆ ಹಿನ್ನಡೆಯಾಗಿತ್ತು. ತವರಿನ ಪಿಚ್ನಲ್ಲಿ ಈಗ ಸನ್ರೈಸರ್ಸ್ ಈ ತಪು$್ಪಗಳನ್ನು ಸರಿಪಡಿಸಿಕೊಳ್ಳಬೇಕಿದೆ.
ಸೂರ್ಯಕುಮಾರ್ ಅಲಭ್ಯ
ವಿಶ್ವ ನಂ. 1 ಟಿ20 ಬ್ಯಾಟರ್ ಸೂರ್ಯಕುಮಾರ್ ಯಾದವ್ ಮುಂಬೈ ತಂಡದ 2ನೇ ಲೀಗ್ ಪಂದ್ಯಕ್ಕೂ ಅಲಭ್ಯರಾಗಿದ್ದಾರೆ. ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಿಂದ ಸೂರ್ಯಕುಮಾರ್ ಫಿಟ್ನೆಸ್ ಬಗ್ಗೆ ಇನ್ನೂ ಹಸಿರು ನಿಶಾನೆ ದೊರೆತಿಲ್ಲ. ಇದರಿಂದಾಗಿ ಅವರಿನ್ನೂ ತಂಡವನ್ನು ಕೂಡಿಕೊಂಡಿಲ್ಲ. ಮುಂಬರುವ ಟಿ20 ವಿಶ್ವಕಪ್ ದೃಷ್ಟಿಯಿಂದ ಬಿಸಿಸಿಐ, ಸೂರ್ಯಕುಮಾರ್ ಪುನರಾಗಮನಕ್ಕೆ ಅವಸರ ಪಡದಿರಲು ನಿರ್ಧರಿಸಿದೆ ಎನ್ನಲಾಗಿದೆ.
ಮುಖಾಮುಖಿ: 21
ಮುಂಬೈ: 12
ಸನ್ರೈಸರ್ಸ್: 9
ಆರಂಭ: ರಾತ್ರಿ 7.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್ ಜಿಯೋಸಿನಿಮಾ.