ಮುಂಬೈ: ಟಿ20 ವಿಶ್ವಕಪ್ ಬಳಿಕ ಭಾರತ ತಂಡದ ಕೋಚ್ ಹುದ್ದೆ ಅಲಂಕರಿಸುವವರಿಗಾಗಿ ಬಿಸಿಸಿಐ ಶೀಘ್ರದಲ್ಲೇ ಹುಡುಕಾಟ ಆರಂಭಿಸಲಿದೆ. ಮುಂದಿನ 3 ವರ್ಷಗಳ ಅವಧಿಗೆ ಕೋಚ್ ಆಯ್ಕೆಗೆ ಬಿಸಿಸಿಐ ಮುಂದಾಗಿದ್ದು, ಈ ಸಂಬಂಧ ಅರ್ಜಿ ಆಹ್ವಾನಿಸಲು ಟಿ20 ವಿಶ್ವಕಪ್ಗೆ ಮುನ್ನವೇ ಜಾಹೀರಾತು ಪ್ರಕಟಿಸಲಿದೆ. ಹಾಲಿ ಕೋಚ್ ರಾಹುಲ್ ದ್ರಾವಿಡ್ ಹುದ್ದೆಯಲ್ಲಿ ಮುಂದುವರಿಯಲು ಬಯಸಿದರೆ ಮರುಅರ್ಜಿ ಸಲ್ಲಿಸಬಹುದು ಎಂದು ಬಿಸಿಸಿಐ ಕಾರ್ಯದರ್ಶಿ ಜಯ್ ಷಾ ಸ್ಪಷ್ಟಪಡಿಸಿದ್ದಾರೆ.
"ಅರ್ಜಿ ಆಹ್ವಾನದ ಬಗ್ಗೆ ಮುಂದಿನ ಕೆಲವೇ ದಿನಗಳಲ್ಲಿ ನಿರ್ಧಾರ ತೆಗೆದುಕೊಳ್ಳಲಿದ್ದೇವೆ. ನಾವು ಈ ಬಾರಿ ಸುದೀರ್ ಅವಧಿಗಾಗಿ ಕೋಚ್ ಹುಡುಕಾಟದಲ್ಲಿದ್ದೇವೆ. ಮತ್ತೆ 3 ವರ್ಷ ಮುಂದುವರಿಯುವುದಾದರೆ ದ್ರಾವಿಡ್ ಮರುಅರ್ಜಿ ಸಲ್ಲಿಸಬಹುದು' ಎಂದು ಜಯ್ ಷಾ ಶುಕ್ರವಾರ ಬಿಸಿಸಿಐ ಮುಖ್ಯ ಕಚೇರಿಯಲ್ಲಿ ಸುದ್ದಿಗಾರರಿಗೆ ತಿಳಿಸಿದ್ದಾರೆ.
ಪ್ರತಿ ಕ್ರಿಕೆಟ್ ಪ್ರಕಾರಕ್ಕೂ ಭಿನ್ನ ಕೋಚ್ ಆಯ್ಕೆಯ ಪ್ರಸ್ತಾಪ ಸದ್ಯ ನಮ್ಮ ಮುಂದಿಲ್ಲ. ಭಾರತ ತಂಡದಲ್ಲಿ ಸದ್ಯ ಎಲ್ಲ ಮಾದರಿಯ ಕ್ರಿಕೆಟ್ ಆಡುವ ಕೆಲ ಆಟಗಾರರಿದ್ದಾರೆ. ರೋಹಿತ್ ಶರ್ಮ, ವಿರಾಟ್ ಕೊಹ್ಲಿ, ರಿಷಭ್ ಪಂತ್ ಅವರಲ್ಲಿ ಪ್ರಮುಖರು. ಆದರೆ ಅಂತಿಮವಾಗಿ ಈ ನಿರ್ಧಾರವನ್ನು, ಕೋಚ್ ಆಯ್ಕೆ ಪ್ರಕ್ರಿಯೆ ನಡೆಸಿಕೊಡಲಿರುವ ಕ್ರಿಕೆಟ್ ಸಲಹಾ ಸಮಿತಿಗೆ (ಸಿಎಸಿ) ಬಿಡುತ್ತೇವೆ. ಅವರು ಹೇಳಿದಂತೆ ನಾವು ಮಾಡುತ್ತೇವೆ ಜಯ್ ಷಾ ತಿಳಿಸಿದ್ದಾರೆ. ಸಿಎಸಿಯ ಶಿಫಾರಸುಗಳನ್ನು ಆಧರಿಸಿ ವಿದೇಶಿ ಕೋಚ್ ನೇಮಿಸುವ ಬಗ್ಗೆಯೂ ನಿರ್ಧಾರವನ್ನು ಕೈಗೊಳ್ಳುತ್ತೇವೆ ಎಂದು ಜಯ್ ಷಾ ಸ್ಪಷ್ಟಪಡಿಸಿದ್ದಾರೆ.
ಸದ್ಯ ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ಕ್ರಿಕೆಟ್ ಮಂಡಳಿಗಳು ಟೆಸ್ಟ್ ಮತ್ತು ಏಕದಿನ&ಟಿ20 ಕ್ರಿಕೆಟ್ ತಂಡಗಳಿಗೆ ಪ್ರತ್ಯೇಕವಾದ ಕೋಚ್ ನೇಮಕ ಪ್ರಕ್ರಿಯೆಯನ್ನು ಅನುಸರಿಸುತ್ತಿವೆ.
ಮಾಜಿ ಕ್ರಿಕೆಟಿಗರಾದ ಜತಿನ್ ಪರಾಂಜಪೆ, ಅಶೋಕ್ ಮಲ್ಹೋತ್ರಾ ಮತ್ತು ಸುಲಕ್ಷಣಾ ನಾಯ್ಕ್ ಸಿಎಸಿಯ ಮೂವರು ಸದಸ್ಯರಾಗಿದ್ದಾರೆ. ರಾಷ್ಟ್ರೀಯ ಆಯ್ಕೆ ಸಮಿತಿಯಲ್ಲಿ ಖಾಲಿ ಉಳಿದಿರುವ ಓರ್ವ ಆಯ್ಕೆಗಾರನ ಹುದ್ದೆಯನ್ನು ಶೀಘ್ರದಲ್ಲೇ ಭರ್ತಿ ಮಾಡಲಾಗುವುದು ಎಂದೂ ಜಯ್ ಷಾ ತಿಳಿಸಿದ್ದಾರೆ.
2027ರವರೆಗೆ ಹೊಸ ಕೋಚ್ ಅವಧಿ
ಮುಂದಿನ ಕೋಚ್ ಅವಧಿ 3 ವರ್ಷ ಅಂದರೆ 2027ರ ಅಕ್ಟೋಬರ್&ನವೆಂಬರ್ವರೆಗೆ ಇರಲಿದೆ. ಈ ಅವಧಿಯಲ್ಲಿ 2025ರ ಚಾಂಪಿಯನ್ಸ್ ಟ್ರೋಫಿ, 2026ರ ಟಿ20 ವಿಶ್ವಕಪ್, 2027ರ ಏಕದಿನ ವಿಶ್ವಕಪ್ ಪ್ರಮುಖ ಐಸಿಸಿ ಟೂರ್ನಿಗಳಾಗಿರಲಿವೆ. ಜತೆಗೆ ಏಷ್ಯಾಕಪ್, ಪ್ರತಿಷ್ಠಿತ ಬಾರ್ಡರ್&ಗಾವಸ್ಕರ್ ಟ್ರೋಫಿ, ಇಂಗ್ಲೆಂಡ್, ದಣ ಆಫ್ರಿಕಾ ಪ್ರವಾಸದಂಥ ಪ್ರಮುಖ ಸವಾಲುಗಳು ಇರಲಿವೆ.
ದ್ರಾವಿಡ್ ಹಾಲಿ ಅವಧಿ ಜೂನ್ನಲ್ಲಿ ಮುಕ್ತಾಯ
ಭಾರತ ತಂಡದ ಮುಖ್ಯ ಕೋಚ್ ಆಗಿ 2021ರ ನವೆಂಬರ್ನಲ್ಲಿ ನೇಮಕಗೊಂಡಿದ್ದ ರಾಹುಲ್ ದ್ರಾವಿಡ್ಗೆ ಮೊದಲಿಗೆ 2023ರ ಅಕ್ಟೋಬರ್&ನವೆಂಬರ್ನಲ್ಲಿ ಭಾರತದಲ್ಲೇ ನಡೆದ ಏಕದಿನ ವಿಶ್ವಕಪ್ವರೆಗೆ 2 ವರ್ಷಗಳ ಅವಧಿ ನೀಡಲಾಗಿತ್ತು. ವಿಶ್ವಕಪ್ ಫೈನಲ್ನಲ್ಲಿ ಸೋಲು ಕಂಡ ನಡುವೆಯೂ ಟಿ20 ವಿಶ್ವಕಪ್ವರೆಗೂ ಮುಂದುವರಿಯಲು ದ್ರಾವಿಡ್ ಮನವೊಲಿಸಲಾಗಿತ್ತು. ಇದೀಗ ಜೂನ್ನಲ್ಲಿ ದ್ರಾವಿಡ್ ಅವಧಿ ಮುಕ್ತಾಯಗೊಳ್ಳುತ್ತಿದ್ದು, ಈ ಬಾರಿ ಅವರನ್ನು ನೇರವಾಗಿ ಮತ್ತೆ ಮುಂದುವರಿಸುವ ಬದಲಾಗಿ ಹೊಸದಾಗಿ ಆಯ್ಕೆ ಪ್ರಕ್ರಿಯೆ ನಡೆಸಲಾಗುತ್ತಿದೆ.