ವಿಶ್ವ ಬ್ಯಾಡ್ಮಿಂಟನ್: ಸಿಂಧು, ಆಯುಷ್​ ಸವಾಲು ಅಂತ್ಯ; ಡಬಲ್ಸ್​ನಲ್ಲಿ ಭಾರತೀಯರ ಆಸೆ ಜೀವಂತ

ಇಂದಿರಾ ಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಟೂರ್ನಿಯ ಮಹಿಳಾ ಸಿಂಗಲ್ಸ್​ ವಿಭಾಗದಲ್ಲಿ ಪಿವಿ ಸಿಂಧು ಕೆಚ್ಚೆದೆಯ ಹೋರಾಟ ನಡುವೆಯೂ ವಿಶ್ವ ನಂ. 3 ಚೀನಾದ ವಾಂಗ್​ ಜಿ ಯಿ ವಿರುದ್ಧ 11-21, 21-15, 17-21ರಿಂದ ಸೋಲು ಅನುಭವಿಸಿದರು. ಒಂದು ಗಂಟೆ 28 ನಿಮಿಷಗಳ ಕಾಲ ಸಾಗಿದ ಕಾದಾಟದಲ್ಲಿ 31 ವರ್ಷದ ಸಿಂಧು, 2ನೇ ಗೇಮ್​ ಗೆದ್ದು ತಿರುಗೇಟು ನೀಡಿದರೂ, ಅಂತಿಮ ಹಂತದಲ್ಲಿ ಮತ್ತೆ ಲಯ ತಪ್ಪಿದರು.

ಇದಕ್ಕೆ ಮುನ್ನ 21 ವರ್ಷದ ಆಯುಷ್​ ಶೆಟ್ಟಿ ವಿಶ್ವ ನಂ. 12 ಅಲ್ವಿ ರ್ಹಾನ್​ ವಿರುದ್ಧ 19-21, 11-21ರಿಂದ ಸೋಲು ಕಂಡರು. ಮೊದಲ ಸುತ್ತಿನಲ್ಲಿ ವಿಶ್ವ ನಂ. 1 ಹಾಗೂ ಹಾಲಿ ಚಾಂಪಿಯನ್​ ಚೀನಾದ ಶಿ ಯು ಖಿ ವಿರುದ್ಧ ಗೆದ್ದು ಬೀಗಿದ್ದ ಆಯುಷ್​, ಇಂಡೋನೇಷ್ಯಾ ಆಟಗಾರನ ಎದುರು ಅಂಥದ್ದೇ ನಿರ್ವಹಣೆ ಪುನರಾವರ್ತಿಸಲು ವಿಫಲರಾದರು. ರ್ಹಾನ್​ ವಿರುದ್ಧದ 8 ಮುಖಾಮುಖಿಗಳಲ್ಲಿ ಆಯುಷ್​ಗೆ ಇದು 5ನೇ ಸೋಲಾಗಿದೆ.

ಮಾಜಿ ವಿಶ್ವ ನಂ. 1 ಸಾತ್ವಿಕ್​ ಸಾಯಿರಾಜ್​ ಮತ್ತು ಚಿರಾಗ್​ ಶೆಟ್ಟಿ ಜೋಡಿ ಪುರುಷರ ಡಬಲ್ಸ್​ ವಿಭಾಗದಲ್ಲಿ ಕ್ವಾರ್ಟರ್​ಫೈನಲ್​ ಪ್ರವೇಶಿಸಿದೆ. 5ನೇ ಶ್ರೇಯಾಂಕಿತ ಸಾತ್ವಿಕ್​-ಚಿರಾಗ್​ ಜೋಡಿ 16ರ ಘಟ್ಟದಲ್ಲಿ ಮಲೇಷ್ಯಾದ ಜುಬೈದಿ ಆರಿಫ್​ ಮತ್ತು ಯಪ್​ ರಾಯ್​ ಕಿಂಗ್​ ಜೋಡಿಯ ಎದುರು 21-23, 21-19, 21-17ರಿಂದ ಹೋರಾಟಯುತ ಗೆಲುವು ದಾಖಲಿಸಿತು. ಟೂರ್ನಿಯಲ್ಲಿ ಆಡಿದ ಮೊದಲ ಪಂದ್ಯದಲ್ಲಿ ಒಂದು ಗಂಟೆ, 22 ನಿಮಿಷಗಳ ಕಾಲ ಶ್ರಮಿಸಿದರು. ಸಾತ್ವಿಕ್​-ಚಿರಾಗ್​ ಈ ಮುನ್ನ ಮೊದಲ ಸುತ್ತಿನಲ್ಲಿ ಬೈ ಮತ್ತು 2ನೇ ಸುತ್ತಿನಲ್ಲಿ ವಾಕ್​ಓವರ್​ ಪಡೆದಿದ್ದರು. 

ಇತ್ತೀಚೆಗೆ ಅರ್ಜುನ ಪ್ರಶಸ್ತಿಗೆ ಭಾಜನರಾಗಿರುವ ಗಾಯತ್ರಿ ಗೋಪಿಚಂದ್​-ತ್ರೀಸಾ ಜೋಲಿ ಜೋಡಿ ಮಹಿಳಾ ಡಬಲ್ಸ್​ ವಿಭಾಗದಲ್ಲಿ ಕ್ವಾರ್ಟರ್​ಫೈನಲ್​ ಪ್ರವೇಶಿಸಿದೆ. ಗಾಯತ್ರಿ-ತ್ರೀಸಾ ಜೋಡಿ ಗುರುವಾರ ನಡೆದ ಪಂದ್ಯದಲ್ಲಿ 7ನೇ ಶ್ರೇಯಾಂಕಿತ ಜಪಾನ್​ನ ರಿನ್​ ಇವನಗ ಮತ್ತು ಕೀ ನಕನಿಶಿ ಜೋಡಿಗೆ 21-16, 21-12ರಿಂದ ಆಘಾತಕಾರಿ ಸೋಲುಣಿಸಿತು. 2015ರಲ್ಲಿ ಜ್ವಾಲಾ ಗುಟ್ಟಾ-ಅಶ್ವಿನಿ ಪೊನ್ನಪ್ಪ ಸಾಧನೆಯ ಬಳಿಕ ವಿಶ್ವ ಚಾಂಪಿಯನ್​ಷಿಪ್​ನ ಮಹಿಳಾ ಡಬಲ್ಸ್​ ವಿಭಾಗದಲ್ಲಿ ಭಾರತೀಯರು ಎಂಟರ ಘಟ್ಟಕ್ಕೇರಿದು ಇದೇ ಮೊದಲಾಗಿದೆ. ಮಿಶ್ರ ಡಬಲ್ಸ್​ ವಿಭಾಗದಲ್ಲಿ ಧ್ರುವ ಕಪಿಲ-ತನಿಷಾ ಕ್ರಾಸ್ಟೋ ಜೋಡಿ 16ರ ಘಟ್ಟದಲ್ಲಿ ಹೊರಬಿದ್ದಿತು. 15ನೇ ಶ್ರೇಯಾಂಕಿತ ಕಪಿಲ-ತನಿಷಾ ಜೋಡಿ 16-21, 5-21ರಿಂದ 6ನೇ ಶ್ರೇಯಾಂಕಿತ ಚೀನಾದ ಗುವೊ&ಚೆನ್​ ಜೋಡಿಗೆ ಶರಣಾಯಿತು. ಇದರಿಂದ ಮಿಶ್ರ ಡಬಲ್ಸ್​ ವಿಭಾಗದಲ್ಲಿ ಆತಿಥೇಯರ ಸವಾಲು ಅಂತ್ಯಗೊಂಡಿದೆ.