ವಿಶ್ವ ಬ್ಯಾಡ್ಮಿಂಟನ್​ ಡ್ರಾ ಪ್ರಕಟ: ಸಿಂಧು, ಆಯುಷ್​, ಸಾತ್ವಿಕ್​-ಚಿರಾಗ್​ಗೆ ಸವಾಲಿನ ಹಾದಿ

ವಿಶ್ವ ನಂ. 1 ದ. ಕೊರಿಯಾದ ಆನ್​ ಸೆ ಯಂಗ್​ ಮತ್ತು ಅವಳಿ ಒಲಿಂಪಿಕ್ಸ್​ ವಿಜೇತೆ ಪಿವಿ ಸಿಂಧು ಡ್ರಾದ ಒಂದೇ ಭಾಗದಲ್ಲಿದ್ದು, ಇವರಿಬ್ಬರು ಸೆಮಿಫೈನಲ್​ನಲ್ಲಿ ಮುಖಾಮುಖಿಯಾಗುವ ನಿರೀಕ್ಷೆ ಇದೆ. ಆದರೆ ಸೆಮೀಸ್​ ತನಕ ಸಿಂಧು ಸುಲಭ ಹಾದಿ ಹೊಂದಿದ್ದಾರೆ. 5 ಬಾರಿಯ ವಿಶ್ವ ಚಾಂಪಿಯನ್​ಷಿಪ್​ ಪದಕ ವಿಜೇತೆ ಸಿಂಧು ಮೊದಲ ಸುತ್ತಿನಲ್ಲಿ ಐರ್ಲೆಂಡ್​ನ ಸೋಫಿ ನೋಬಲ್​ ವಿರುದ್ಧ ಆಡಲಿದ್ದಾರೆ. ಬಳಿಕ 16ರ ಟ್ಟದಲ್ಲಿ ಚೀನಾದ ವಾಂಗ್​ ಝಿ ಯೀ ಮತ್ತು ಕ್ವಾರ್ಟರ್​ಫೈನಲ್​ನಲ್ಲಿ ಇಂಡೋನೇಷ್ಯಾದ ಪುತ್ರಿ ಕುಸುಮ ವರ್ದನಿ ಎದುರಾಗುವ ನಿರೀಕ್ಷೆ ಇದೆ. ಉನ್ನತಿ ಹೂಡಾ ಮಹಿಳಾ ಸಿಂಗಲ್ಸ್​ ಕಣದಲ್ಲಿರುವ ಭಾರತದ ಮತ್ತೋರ್ವ ಆಟಗಾರ್ತಿ.

ಪುರುಷರ ಸಿಂಗಲ್ಸ್​ನಲ್ಲಿ ಶ್ರೇಯಾಂಕ ರಹಿತ ಆಯುಷ್​ ಶೆಟ್ಟಿ ಮೊದಲ ಸುತ್ತಿನಲ್ಲೇ ವಿಶ್ವ ನಂ. 1 ಚೀನಾದ ಶಿ ಯು ಕಿ ಅವರ ಕಠಿಣ ಸವಾಲು ಎದುರಿಸಲಿದ್ದಾರೆ. 14ನೇ ಶ್ರೇಯಾಂಕಿತ ಲಕ್ಷ್ಯ ಸೇನ್​ ಮೊದಲ ಸುತ್ತಿನಲ್ಲಿ ಆಸ್ಟ್ರಿಯಾದ ಕಾಲಿನ್ಸ್​ ವ್ಯಾಲೆಟೈನ್​ ವಿರುದ್ಧ ಆಡಲಿದ್ದಾರೆ. ಕ್ವಾರ್ಟರ್​ಫೈನಲ್​ನಲ್ಲಿ ಅವರಿಗೆ ಥಾಯ್ಲೆಂಡ್​ನ ಕುನ್ಲವುತ್​ ವಿಟಿಡ್​ಸರ್ನ್​ರ ಕಠಿಣ ಸವಾಲು ಎದುರಾಗುವ ಸಾಧ್ಯತೆ ಇದೆ.

ಪುರುಷರ ಡಬಲ್ಸ್​ನಲ್ಲಿ 5ನೇ ಶ್ರೇಯಾಂಕಿತ ಸಾತ್ವಿಕ್​-ಚಿರಾಗ್​ ಜೋಡಿ ಮೊದಲ ಸುತ್ತಿನಲ್ಲಿ ಬೈ ಪಡೆದಿದೆ. 2ನೇ ಸುತ್ತಿನಲ್ಲಿ ಇಂಡೋನೇಷ್ಯಾದ ರಿಯಾನ್​ ಇಂದ್ರ&ನಿಕೋಲೈಸ್​ ಜಾಕ್ವಿನ್​ ಸವಾಲು ಎದುರಾಗಲಿದೆ. ಕ್ವಾರ್ಟರ್​ಫೈನಲ್​ನಲ್ಲಿ 3ನೇ ಶ್ರೇಯಾಂಕಿತ ಚೀನಾದ ಲಿಯಾಂಗ್​ ವಿ ಕೆಂಗ್-ವಾಂಗ್​ ಚಾಂಗ್​ ಜೋಡಿಯ ಕಠಿಣ ಸವಾಲು ಎದುರಾಗುವ ಸಾಧ್ಯತೆ ಇದೆ.

ವರ್ಷಾರಂಭದಲ್ಲಿ ನವದೆಹಲಿಯ ಇಂದಿರಾ ಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಇಂಡಿಯಾ ಓಪನ್​ ವೇಳೆ ಹಕ್ಕಿಗಳ ಹಿಕ್ಕೆ ಮತ್ತು ನೀರು ಸೋರುವಿಕೆಯಿಂದ ಪಂದ್ಯಗಳಿಗೆ ಅಡಚಣೆಯಾಗಿ ಆತಿಥೇಯ ಭಾರತ ತೀವ್ರ ಮುಜುಗರ ಎದುರಿಸಿತ್ತು. ಇದೀಗ ವಿಶ್ವ ಚಾಂಪಿಯನ್​ಷಿಪ್​ಗೆ ಇದೇ ತಾಣ ಸುಸಜ್ಜಿತವಾಗಿ ಸಿದ್ಧವಾಗಿದ್ದು, ವಿಶ್ವ ಬ್ಯಾಡ್ಮಿಂಟನ್​ ಒಕ್ಕೂಟ (ಬಿಡಬ್ಲ್ಯುಎಫ್​) ತೃಪ್ತಿ ವ್ಯಕ್ತಪಡಿಸಿದೆ. ಕ್ರೀಡಾಂಗಣ ಇದೀಗ ಸಂಪೂರ್ಣ ಸ್ವಚ್ಛವಾಗಿದ್ದು, ಶೌಚಾಲಯಗಳನ್ನೂ ನವೀಕರಿಸಲಾಗಿದೆ. ಹಕ್ಕಿ ಮತ್ತು ಕೋತಿಗಳು ಕ್ರೀಡಾಂಗಣದೊಳಗೆ ಬಾರದಂತೆ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ವಾಟರ್​ಪ್ರೂಫ್​ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಕ್ರೀಡಾಂಗಣದ ಆವರಣದೊಳಗೆ ಬೀದಿನಾಯಿಗಳು ಬಾರದಂತೆ ಎಚ್ಚರಿಕೆ ವಹಿಸಲಾಗುತ್ತಿದ್ದು, ಈ ಬಾರಿ ಅತ್ಯಂತ ವ್ಯವಸ್ಥಿತ ಟೂರ್ನಿ ಆಯೋಜಿಸಲಾಗುತ್ತಿದೆ ಎಂದು ಟೂರ್ನಿ ನಿದೇಶಕ ಸೆಲ್ವಅಮರೇಶ್​ ಸುಬ್ರಮಣ್ಯಂ ತಿಳಿಸಿದ್ದಾರೆ.