ಥಾಮಸ್ ಕಪ್ ಬ್ಯಾಡ್ಮಿಂಟನ್: ಭಾರತ ಕಂಚಿನ ಪದಕಕ್ಕೆ ತೃಪ್ತಿ
ಹಾರ್ಸೆನ್ಸ್ (ಡೆನ್ಮಾರ್ಕ್): ಭಾರತ ತಂಡ ಪ್ರತಿಷ್ಠಿತ ಥಾಮಸ್ ಕಪ್ (Thomas Cup) ಬ್ಯಾಡ್ಮಿಂಟನ್ ಟೂರ್ನಿಯ ಸೆಮಿೈನಲ್ನಲ್ಲಿ ಫ್ರಾನ್ಸ್ ಎದುರು 0-3 ಅಂತರದಿಂದ ಪರಾಭವಗೊಂಡು ಕಂಚಿನ ಪದಕಕ್ಕೆ ತೃಪ್ತಿಪಟ್ಟಿದೆ. ಕನ್ನಡಿಗ ಆಯುಷ್ ಶೆಟ್ಟಿ ಮತ್ತು ಅನುಭವಿ ಆಟಗಾರರಾದ ಕಿಡಂಬಿ ಶ್ರೀಕಾಂತ್, ಎಚ್ಎಸ್ ಪ್ರಣಯ್ ಮೊದಲ 3 ಸಿಂಗಲ್ಸ್ ಪಂದ್ಯಗಳಲ್ಲಿ ಸೋಲು ಕಾಣುವುದರೊಂದಿಗೆ ಭಾರತ 2022ರ ನಂತರ ಮತ್ತೊಮ್ಮೆ ಫೈನಲ್ಗೇರುವ ಕನಸು ಭಗ್ನಗೊಂಡಿತು.
ಶನಿವಾರ ನಡೆದ ಉಪಾಂತ್ಯ ಕಾದಾಟದಲ್ಲಿ 2022ರ ಚಾಂಪಿಯನ್ ಭಾರತ ತಂಡದ ಪರ ಮೊದಲ ಸಿಂಗಲ್ಸ್ ಪಂದ್ಯ ಆಡಿದ ಆಯುಷ್ ಶೆಟ್ಟಿ 16-21, 21-18 ನೇರಗೇಮ್ಗಳಿಂದ ವಿಶ್ವ ನಂ. 4 ಕ್ರಿಸ್ಟೋ ಪೊಪೊವ್ ವಿರುದ್ಧ ಎಡವಿದರು. 20 ವರ್ಷದ ಆಯುಷ್ ಇದಕ್ಕೆ ಮುನ್ನ ಟೂರ್ನಿಯಲ್ಲಿ ಆಡಿದ 4 ಪಂದ್ಯವನ್ನೂ ಗೆದ್ದಿದ್ದರು.
ಗಾಯಾಳು ಲಕ್ಷ್ಯ ಸೇನ್ ಬದಲಿಗೆ ಕಣಕ್ಕಿಳಿದ ಮಾಜಿ ವಿಶ್ವ ನಂ. 1 ಕೆ. ಶ್ರೀಕಾಂತ್ 2ನೇ ಪಂದ್ಯದಲ್ಲಿ ವಿಶ್ವ ನಂ. 10 ಅಲೆಕ್ಸ್ ಲೇನಿಯರ್ ವಿರುದ್ಧ 16-21, 18-21ರಿಂದ ಮುಗ್ಗರಿಸಿದರು. 3ನೇ ಸಿಂಗಲ್ಸ್ ಪಂದ್ಯದಲ್ಲಿ ಪ್ರಣಯ್ ವಿಶ್ವ ನಂ. 17 ಟೊಮಾ ಪೊಪೊವ್ ವಿರುದ್ಧ 19-21, 16-21ರಿಂದ ಶರಣಾದರು. ಇದರಿಂದಾಗಿ ಭಾರತ ಕೊನೇ 2 ಡಬಲ್ಸ್ ಪಂದ್ಯಗಳಿಗೆ ಮುನ್ನವೇ ಸೋಲೊಪ್ಪಿಕೊಂಡಿತು.
ಭಾರತ ಟೂರ್ನಿಯಲ್ಲಿ 4ನೇ ಬಾರಿ ಕಂಚಿನ ಪದಕ ಗೆದ್ದ ಸಾಧನೆ ಮಾಡಿದೆ. ಭಾರತ ಈ ಮುನ್ನ 1952, 1955 ಮತ್ತು 1979ರಲ್ಲೂ ಕಂಚಿನ ಪದಕ ಜಯಿಸಿತ್ತು. ಫ್ರಾನ್ಸ್ ತಂಡ ಡೆನ್ಮಾರ್ಕ್ (2016) ಬಳಿಕ ಟೂರ್ನಿಯ ಫೈನಲ್ಗೇರಿದ 2ನೇ ಯುರೋಪಿಯನ್ ರಾಷ್ಟ್ರವೆನಿಸಿತು.