ನವದೆಹಲಿ: ಸ್ಟಾರ್ ಷಟ್ಲರ್ಗಳಾದ ಪಿವಿ ಸಿಂಧು, ಲಕ್ಷ್ಯಸೇನ್ ಸಹಿತ ಭಾರತದ ಬ್ಯಾಡ್ಮಿಂಟನ್ ಆಟಗಾರರಿಗೆ ಹಾಲಿ ಯುರೋಪಿಯನ್ ಚರಣದ ಅಂತಾರಾಷ್ಟ್ರೀಯ ಬ್ಯಾಡ್ಮಿಂಟನ್ ಟೂರ್ನಿಗಳಲ್ಲಿ ಭಾಗವಹಿಸಲು ಭಾರತೀಯ ಕ್ರೀಡಾ ಪ್ರಾಧಿಕಾರ (ಸಾಯ್) ಯಾವುದೇ ಆರ್ಥಿಕ ನೆರವು ನೀಡಿಲ್ಲ. ಇದರಿಂದಾಗಿ ಬ್ಯಾಡ್ಮಿಂಟನ್ ತಾರೆಯರು ಸ್ವಂತ ಹಣ ಮತ್ತು ವೈಯಕ್ತಿಕ ಪ್ರಾಯೋಜಕರ ನೆರವಿನಿಂದ ಟೂರ್ನಿಗಳಲ್ಲಿ ಸ್ಪರ್ಧಿಸುವಂತಾಗಿದೆ. ಸರ್ಕಾರ ಆರ್ಥಿಕ ಸಹಾಯವಿಲ್ಲದೆ ಆಡಿದ ನಡುವೆಯೂ ಪಿವಿ ಸಿಂಧು ಮತ್ತು ಲಕ್ಷ್ಯಸೇನ್ ಕಳೆದ ವಾರ ಹೈಲೋ ಓಪನ್ನಲ್ಲಿ ಆಡಿ ಪ್ರಶಸ್ತಿ ಗೆದ್ದಿರುವುದು ವಿಶೇಷವಾಗಿದೆ. ಸರ್ಕಾರ ಅನುದಾನ ನಿಲ್ಲಿಸಿರುವ ಬಗ್ಗೆ ಪ್ರವಾಸಕ್ಕೆ ತೆರಳುವ ಮುನ್ನಾದಿನವಷ್ಟೇ ಗೊತ್ತಾಯಿತು. ಬಳಿಕ ಸ್ವಂತ ಹಣ ಮತ್ತು ಒಲಿಂಪಿಕ್ ಗೋಲ್ಡ್ ಕ್ವೆಸ್ಟ್ (ಒಜಿಕ್ಯು) ನೆರವಿನಿಂದ ಟೂರ್ನಿಗಳಲ್ಲಿ ಭಾಗವಹಿಸಿದೆ ಎಂದು ಪಿವಿ ಸಿಂಧು ತಿಳಿಸಿದ್ದಾರೆ.
ಕಳೆದ ಏಷ್ಯನ್ ಗೇಮ್ಸ್ನಲ್ಲಿ ಬ್ಯಾಡ್ಮಿಂಟನ್ ಆಟಗಾರರು ತೋರಿದ ಕಳಪೆ ನಿರ್ವಹಣೆಯಿಂದಾಗಿ ಅನುದಾನ ನಿಲ್ಲಿಸಲಾಗಿದೆ ಎಂದು ಭಾರತೀಯ ಬ್ಯಾಡ್ಮಿಂಟನ್ ಸಂಸ್ಥೆ (ಬಿಎಐ) ಅಧಿಕಾರಿಗಳು ಆರೋಪಿಸಿದ್ದರೆ, ಸಾಯ್ ಇದನ್ನು ತಳ್ಳಿಹಾಕಿದೆ. ಯುರೋಪಿಯನ್ ಚರಣದ ಟೂರ್ನಿಗಳ ಬಗ್ಗೆ ಬಿಎಐ ಮುಂಚಿತವಾಗಿ ಮಾಹಿತಿ ನೀಡದ ಕಾರಣ ಅನುದಾನ ವಿತರಿಸಲಾಗಿಲ್ಲ ಎಂದು ಸಾಯ್ ವಿವರಣೆ ನೀಡಿದೆ. ಅಲ್ಲದೆ ಮುಂಬರುವ ದಿನಗಳಲ್ಲಿ ಸ್ಪಷ್ಟ ಮಾಹಿತಿ ನೀಡಿದರೆ ಅನುದಾನ ಒದಗಿಸಲಾಗುವುದು ಎಂದಿದೆ.
ವಿಶ್ವ ರ್ಯಾಂಕಿಂಗ್ನಲ್ಲಿ 6ನೇ ಸ್ಥಾನಕ್ಕೇರಿದ ಪಿವಿ ಸಿಂಧು
ಸತತ 2 ವಾರಗಳಲ್ಲಿ ಜಪಾನ್ ಓಪನ್ ಮತ್ತು ಹೈಲೋ ಓಪನ್ ಪ್ರಶಸ್ತಿ ಜಯಿಸಿದ್ದರಿಂದ ಅನುಭವಿ ಷಟ್ಲರ್ ಪಿವಿ ಸಿಂಧು, ವಿಶ್ವ ಬ್ಯಾಡ್ಮಿಂಟನ್ ಮಹಿಳಾ ಸಿಂಗಲ್ಸ್ ರ್ಯಾಂಕಿಂಗ್ನಲ್ಲಿ 6ನೇ ಸ್ಥಾನಕ್ಕೇರಿದ್ದಾರೆ. ಇದು 2022ರ ಡಿಸೆಂಬರ್ ಬಳಿಕ ಅವರ ಅತ್ಯುತ್ತಮ ರ್ಯಾಂಕ್ ಆಗಿದೆ. ಸೂಪರ್ 500 ಪ್ರಶಸ್ತಿ ಗೆಲುವಿನಿಂದ ಅವರು 9,200 ಅಂಕ ಗಳಿಸಿ 2 ಸ್ಥಾನ ಬಡ್ತಿ ಪಡೆದಿದ್ದಾರೆ. ವಾರದ ಹಿಂದಷ್ಟೇ ಅವರು ಅಗ್ರ 10ರೊಳಗೆ ಮರಳಿದ್ದರು.