ವೆಲ್ಲಿಂಗ್ಟನ್: ಭಾರತ ಹಾಗೂ ಆತಿಥೇಯ ನ್ಯೂಜಿಲೆಂಡ್ ನಡುವೆ ಮೊದಲ ಟೆಸ್ಟ್ ಪಂದ್ಯದಲ್ಲಿ ಒಂದೇ ರೀತಿಯ ಹೋರಾಟ ಕಂಡುಬಂದರೂ, ಪಂದ್ಯದಲ್ಲಿ ಭಾರತಕ್ಕೆ ಹಿನ್ನಡೆಯಾಗಿದ್ದು ಮೊದಲ ಇನಿಂಗ್ಸ್ ನಲ್ಲಿ ಕಿವೀಸ್ನ ಕೆಳಕ್ರಮಾಂಕದ ಆಟಗಾರರು ಮಾಡಿದ ಉಪಯುಕ್ತ ಬ್ಯಾಟಿಂಗ್.
ಆದರೆ, ಈ ಬ್ಯಾಟಿಂಗ್ ಭಾರತ ತಂಡಕ್ಕೆ ಎರಡೂ ಇನಿಂಗ್ಸ್ನಲ್ಲಿ ಸಿಗಲಿಲ್ಲ. ಇದರಿಂದಾಗಿ ಶನಿವಾರ ಕ್ರೖೆಸ್ಟ್ ಚರ್ಚ್ನಲ್ಲಿ ಆರಂಭವಾಗಲಿರುವ 2ನೇ ಪಂದ್ಯಕ್ಕೆ ಬ್ಯಾಟಿಂಗ್ನಲ್ಲಿ ವಿಫಲವಾಗಿರುವ ಆರ್.ಅಶ್ವಿನ್ರ ಬದಲು ಎಡಗೈ ಆಫ್ಸ್ಪಿನ್ ಆಲ್ರೌಂಡರ್ ರವೀಂದ್ರ ಜಡೇಜಾ ತಂಡದಲ್ಲಿ ಸ್ಥಾನ ಪಡೆಯುವ ಸಾಧ್ಯತೆ ಇದೆ.
ಆರ್. ಅಶ್ವಿನ್ ಮೊದಲ ಇನಿಂಗ್ಸ್ನಲ್ಲಿ ಟಿಮ್ ಸೌಥಿಯಿಂದ ಎದುರಿಸಿದ ಮೊದಲ ಎಸೆತದಲ್ಲಿಯೇ ಔಟಾಗಿದ್ದರೆ, 2ನೇ ಇನಿಂಗ್ಸ್ನಲ್ಲೂ 11 ಎಸೆತ ಎದುರಿಸಿ 4 ರನ್ ಬಾರಿಸಿ ಸೌಥಿಗೆ ವಿಕೆಟ್ ನೀಡಿದ್ದರು. 2017ರ ಆರಂಭದಿಂದ ಇಲ್ಲಿಯವರೆಗೂ ಆಡಿದ 36 ಇನಿಂಗ್ಸ್ಗಳ ಪೈಕಿ ಅಶ್ವಿನ್, ಕನಿಷ್ಠ 30 ಎಸೆತಗಳನ್ನು ಎದುರಿಸಿದೇ ಔಟಾಗುತ್ತಿರುವುದು ಇದು 20ನೇ ಬಾರಿ.
ಈ ಅವಧಿಯಲ್ಲಿ 30 ರಿಂದ 50 ಎಸೆತಗಳನ್ನು ಎದುರಿಸುವ ವೇಳೆ 6 ಬಾರಿ ಅವರು ಔಟಾಗಿದ್ದರೆ, 50ಕ್ಕಿಂತ ಅಧಿಕ ಎಸೆತಗಳನ್ನು ಎದುರಿಸಿದ ಇನಿಂಗ್ಸ್ಅನ್ನು 7 ಬಾರಿ ಆಡಿದ್ದಾರೆ. 2017ರ ಆಗಸ್ಟ್ನಲ್ಲಿ ಶ್ರೀಲಂಕಾ ವಿರುದ್ಧ ಎಸ್ಎಸ್ಸಿಯಲ್ಲಿ ನಡೆದ ಟೆಸ್ಟ್ ನಲ್ಲಿ ಕೊನೇ ಬಾರಿಗೆ ಅವರು 50ಕ್ಕಿಂತ ಅಧಿಕ ಎಸೆತಗಳನ್ನು ಎದುರಿಸಿದರು. 98 ಎಸೆತಗಳ ಇನಿಂಗ್ಸ್ನಲ್ಲಿ ಅವರು 54 ರನ್ ಬಾರಿಸಿದ್ದರು. ಇದೇ ಅವಧಿಯಲ್ಲಿ ರವೀಂದ್ರ ಜಡೇಜಾ, ಅಶ್ವಿನ್ಗೆ ದೊಡ್ಡ ಮಟ್ಟದ ಪ್ರತಿರೋಧ ಒಡ್ಡಿದ್ದಾರೆ. ಈ ಅವಧಿಯಲ್ಲಿ ಜಡೇಜಾ ಆಡಿದ 21 ಟೆಸ್ಟ್ನ 31 ಇನಿಂಗ್ಸ್ಗಳಿಂದ 49.80ರ ಸರಾಸರಿ ಹೊಂದಿದ್ದು, 11 ಬಾರಿ ಅಜೇಯವಾಗಿ ಉಳಿದಿದ್ದಾರೆ.
ಅದಲ್ಲದೆ, 1 ಶತಕ ಹಾಗೂ 10 ಅರ್ಧಶತಕವನ್ನೂ ಬಾರಿಸಿದ್ದು, 6 ಬಾರಿ ಅವರು 100ಕ್ಕೂ ಅಧಿಕ ಎಸೆತಗಳನ್ನು ಎದುರಿಸಿದ್ದಾರೆ. 2017ರ ಆರಂಭದಿಂದ ಜಡೇಜಾ ತಾವು ಎದುರಿಸಿದ 79 ಎಸೆತಗಳಿಗೊಮ್ಮೆ ಔಟ್ ಆಗಿದ್ದರೆ, ಅಶ್ವಿನ್ 33 ಎಸೆತಗಳಿಗೆ ಒಮ್ಮೆ ಔಟಾಗಿದ್ದಾರೆ. ಈ ಎಲ್ಲ ಕಾರಣದಿಂದಾಗಿ ಬ್ಯಾಟಿಂಗ್ನಲ್ಲೂ ತಂಡಕ್ಕೆ ನೆರವಾಗಬಲ್ಲ ರವೀಂದ್ರ ಜಡೇಜಾ 2ನೇ ಟೆಸ್ಟ್ ಪಂದ್ಯದಲ್ಲಿ ಆಡುವ ಸಾಧ್ಯತೆ ಇದೆ.
ಇಲ್ಲಿನ ಪಿಚ್ ಹಾಗೂ ಪರಿಸ್ಥಿತಿಗಳ ಬಗ್ಗೆ ತೀರಾ ಆಲೋಚನೆ ಮಾಡುವುದು ಅಗತ್ಯವಿಲ್ಲ. ಹಾಗೇನಾದರೂ ಮಾಡಿದರೆ ಬ್ಯಾಟಿಂಗ್ನತ್ತ ಗಮನ ನೀಡಲು ಸಾಧ್ಯವಾಗುವುದಿಲ್ಲ. ತವರಿನ ಹೊರಗೆ ಆಡುವಾಗ, ಮಾನಸಿಕವಾಗಿಯೇ ಆಟದ ಬಗ್ಗೆ ಸಿದ್ಧತೆ ಮಾಡಿಕೊಳ್ಳಬೇಕಾಗುತ್ತದೆ. ಒಮ್ಮೊಮ್ಮೆ ತೀರಾ ತಾಂತ್ರಿಕ ವಿಚಾರಗಳ ಬಗ್ಗೆ ನಮ್ಮ ನಡುವೆ ಚರ್ಚೆ ಆಗುತ್ತದೆ. ಮನಸ್ಸು ಮುಕ್ತವಾಗಿದ್ದರೆ, ಎಲ್ಲ ಪರಿಸ್ಥಿತಿಗಳೂ ಸುಲಭವಾಗುತ್ತವೆ. | ವಿರಾಟ್ ಕೊಹ್ಲಿ ಟೀಮ್ ಇಂಡಿಯಾ ನಾಯಕ