ಮುಂಬೈ: ಸ್ಟಾರ್ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಮುಂಬೈ ಇಂಡಿಯನ್ಸ್ಗೆ ಮರಳಿದ್ದರಿಂದ ತಂಡದ ಅಭಿಮಾನಿಗಳು ಸಂಭ್ರಮಗೊಂಡಿದ್ದಾರೆ. ಆದರೆ ತಂಡದ ಪ್ರಮುಖ ವೇಗಿ ಜಸ್ಪ್ರೀತ್ ಬುಮ್ರಾ ಅಸಮಾಧಾನಗೊಂಡಂತಿದೆ!
ಅವರು ಮಂಗಳವಾರ ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಹಾಕಿರುವ ನಿಗೂಡಾರ್ಥದ ಪೋಸ್ಟ್ ಇದರ ಸುಳಿವು ನೀಡಿದೆ. "ಕೆಲವೊಮ್ಮೆ ಮೌನವೇ ಅತ್ಯುತ್ತಮ ಉತ್ತರವಾಗಿರುತ್ತದೆ' ಎಂದು ಬುಮ್ರಾ ಬರೆದುಕೊಂಡಿದ್ದಾರೆ.
ರೋಹಿತ್ ಶರ್ಮ ನಂತರದಲ್ಲಿ ಮುಂಬೈ ತಂಡದ ನಾಯಕರಾಗುವತ್ತ ಕಣ್ಣಿಟ್ಟಿದ್ದ 29 ವರ್ಷದ ಬುಮ್ರಾಗೆ, ಹಾರ್ದಿಕ್ ಪುನರಾಗಮನದೊಂದಿಗೆ ರೋಹಿತ್ ಉತ್ತರಾಧಿಕಾರಿಯಾಗಿಯೂ ಬಿಂಬಿಸಲ್ಪಟ್ಟಿರುವುದು ಬೇಸರ ತಂದಿದೆ ಎನ್ನಲಾಗುತ್ತಿದೆ. ಮುಂಬೈ ತಂಡದಲ್ಲಿ ಹಾರ್ದಿಕ್ ಪಾಂಡ್ಯರನ್ನು ಮೀರಿಸಿ ಬುಮ್ರಾ ನಾಯಕನ ಪಟ್ಟವೇರುವುದು ಕಷ್ಟ. ಹೀಗಾಗಿ ಬುಮ್ರಾ ಭವಿಷ್ಯದ ದಿನಗಳಲ್ಲಿ, ನಾಯಕತ್ವ ಒಲಿಯಬಹುದಾದಂಥ ಬೇರೆ ತಂಡಗಳ ಒಪ್ಪಂದದತ್ತ ಆಸಕ್ತಿ ತೋರಿದರೆ ಅಚ್ಚರಿ ಇಲ್ಲ ಎನ್ನಲಾಗುತ್ತಿದೆ.