ಲೀಡ್ಸ್: ಇಂಗ್ಲೆಂಡ್ -ಭಾರತ ನಡುವಿನ ಟೆಸ್ಟ್ ಸರಣಿಗೆ ಆಂಡರ್ಸನ್-ತೆಂಡುಲ್ಕರ್ ಟ್ರೋಫಿ ಎಂದು ಅಧಿಕೃತವಾಗಿ ಮರುನಾಮಕರಣ ಮಾಡಲಾಗಿದೆ. ಉಭಯ ದೇಶಗಳ ಇಬ್ಬರು ದಿಗ್ಗಜ ಕ್ರಿಕೆಟಿಗರಾದ ಜೇಮ್ಸ್ ಆಂಡರ್ಸನ್, ಸಚಿನ್ ತೆಂಡುಲ್ಕರ್ ಗೌರವಾರ್ಥ ಈ ಹೆಸರು ಇಡಲಾಗಿದೆ. ಗುರುವಾರ ಅವರಿಬ್ಬರೇ ಹೊಸ ಟ್ರೋಫಿಯನ್ನು ಅನಾವರಣಗೊಳಿಸಿದರು. ಟ್ರೋಫಿ ಇವರಿಬ್ಬರ ಬೌಲಿಂಗ್-ಬ್ಯಾಟಿಂಗ್ ಚಿತ್ರಗಳು ಮತ್ತು ಸಹಿಯ ಕೆತ್ತನೆಯನ್ನು ಒಳಗೊಂಡಿದೆ. ಉಭಯ ದೇಶಗಳ ಸರಣಿ ಈ ಮುನ್ನ ಪಟೌಡಿ ಟ್ರೋಫಿ ಎಂಬ ಹೆಸರು ಹೊಂದಿತ್ತು. ಇನ್ನೀಗ ಸರಣಿಯ ವಿಜೇತ ತಂಡದ ನಾಯಕನಿಗೆ ಪಟೌಡಿ ಪದಕವನ್ನು ನೀಡಿ ಗೌರವಿಸಲಾಗುತ್ತದೆ. ಆಂಡರ್ಸನ್ 188 ಟೆಸ್ಟ್ಗಳಲ್ಲಿ 704 ವಿಕೆಟ್ ಕಬಳಿಸಿದ್ದು, ಟೆಸ್ಟ್ನಲ್ಲಿ ಅತ್ಯಧಿಕ ವಿಕೆಟ್ ಗಳಿಸಿದ ವೇಗಿ ಎನಿಸಿದ್ದಾರೆ. ಸಚಿನ್ ತೆಂಡುಲ್ಕರ್ 200 ಟೆಸ್ಟ್ಗಳಲ್ಲಿ ಗರಿಷ್ಠ 51 ಶತಕ ಮತ್ತು ಸರ್ವಾಧಿಕ 15,921 ರನ್ ಗಳಿಸಿದ ಬ್ಯಾಟರ್ ಎನಿಸಿದ್ದಾರೆ.
ಪಟೌಡಿ ಪರಂಪರೆ ಉಳಿಸಲು ನನ್ನಿಂದಾದ ಪ್ರಯತ್ನಪಟ್ಟೆ ನವದೆಹಲಿ: ಪಟೌಡಿ ಟ್ರೋಫಿಯ ಹೆಸರು ಬದಲಾಯಿಸುವುದು ನನಗೆ ಇಷ್ಟವಿರಲಿಲ್ಲ. ಹೀಗಾಗಿ ಆ ಹೆಸರು ಉಳಿಸಿಕೊಳ್ಳಲು ನನ್ನಿಂದ ಸಾಧ್ಯವಾದಷ್ಟು ಪ್ರಯತ್ನ ಪಟ್ಟೆ. ಅಂತಿಮವಾಗಿ ಪಟೌಡಿ ಪದಕದೊಂದಿಗೆ ಅವರ ಪರಂಪರೆ ಉಳಿಸಿಕೊಳ್ಳಲು ಶಕ್ತನಾದೆ ಎಂದು ಬ್ಯಾಟಿಂಗ್ ದಿಗ್ಗಜ ಸಚಿನ್ ತೆಂಡುಲ್ಕರ್ ಹೇಳಿದ್ದಾರೆ. ಪಟೌಡಿ ಟ್ರೋಫಿಯ ಹೆಸರು ಬದಲಾವಣೆಯ ಸುದ್ದಿ ತಿಳಿದ ತಕ್ಷಣ ನಾನು ಮೊದಲಿಗೆ ಮನ್ಸೂರ್ ಅಲಿ ಖಾನ್ ಪಟೌಡಿ ಅವರ ಕುಟುಂಬವನ್ನು ಸಂಪರ್ಕಿಸಿದ್ದೆ. ಟೈಗರ್ ಪಟೌಡಿ ಹಲವು ತಲೆಮಾರಿನ ಕ್ರಿಕೆಟಿಗರಿಗೆ ಸ್ಫೂರ್ತಿಯಾದವರು. ಅವರನ್ನು ಎಂದಿಗೂ ಯಾರೂ ಮರೆಯಬಾರದು ಎಂದು ಬಯಸಿದ್ದೆ. ಬಿಸಿಸಿಐ ಮತ್ತು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ (ಇಸಿಬಿ) ಮತ್ತು ಐಸಿಸಿ ಚೇರ್ಮನ್ ಜಯ್ ಷಾರನ್ನು ಸಂಪರ್ಕಿಸಿ ಹೆಸರು ಉಳಿಸಿಕೊಳ್ಳಲು ಒತ್ತಾಯಿಸಿದೆ. ಆದರೆ ಅಂತಿಮವಾಗಿ ಇಸಿಬಿ ಪಟೌಡಿ ಪದಕದೊಂದಿಗೆ ಗೌರವ ಸಲ್ಲಿಸುವ ಆಯ್ಕೆಯನ್ನು ನೀಡಿತು ಎಂದು ಸಚಿನ್ ವಿವರಿಸಿದ್ದಾರೆ.
> ಸಚಿನ್ ತೆಂಡುಲ್ಕರ್1988ರಲ್ಲಿ ನಾನು ಮೊದಲು ಪ್ರವಾಸ ಕೈಗೊಂಡಿದ್ದೇ ಇಂಗ್ಲೆಂಡ್ಗೆ. ನನ್ನ ಮೊದಲ ವಿಮಾನ ಪ್ರಯಾಣ ಮುಂಬೈ&ಲಂಡನ್ ನಡುವೆ ಆಗಿತ್ತು. ಹೀಗಾಗಿ ಟ್ರೋಫಿಗೆ ನನ್ನ ಹೆಸರು ಇಡಲಾಗುತ್ತಿದೆ ಎಂದು ತಿಳಿದಾಗ ಹೃದಯ ತುಂಬಿಬಂತು. ಸಂತೋಷವಾಯಿತು.