"ವಿಕ್ರಾಂತ್ ರೋಣ', "ಅಜ್ಞಾತವಾಸಿ' ಖ್ಯಾತಿಯ ನಟ ಸಿದ್ದು ಮೂಲಿಮನಿ ಮತ್ತು ರವೀಕ್ಷಾ ಶೆಟ್ಟಿ ನಟಿಸಿರುವ ಡಾರ್ಕ್ ಕಾಮಿಡಿ ಕಮ್ ಹಾರರ್ ಥ್ರಿಲ್ಲರ್ ಜಾನರ್ ಸಿನಿಮಾ "ಸೀಟ್ ಎಡ್ಜ್'. "ಕೆಮಿಸ್ಟ್ರಿ ಆಫ್ ಕರಿಯಪ್ಪ', "ಕ್ರಿಟಿಕಲ್ ಕೀರ್ತನೆಗಳು' ಸೇರಿ ಕೆಲ ಚಿತ್ರಗಳಲ್ಲಿ ಸಹ-ನಿರ್ದೇಶಕರಾಗಿ ಕೆಲಸ ಮಾಡಿರುವ ಚೇತನ್ ಶೆಟ್ಟಿ ಚೊಚ್ಚಲ ಬಾರಿಗೆ ಕಥೆ, ಚಿತ್ರಕಥೆ ಬರೆದು ಆ್ಯಕ್ಷನ್-ಕಟ್ ಹೇಳುತ್ತಿರುವ ಚಿತ್ರವಿದು. ಈಗಾಗಲೇ ಶೂಟಿಂಗ್ ಪೂರ್ಣಗೊಂಡಿದ್ದು, ಬಿಡುಗಡೆಗೆ ಸಿದ್ಧವಾಗಿದೆ.
ಈ ಹಿನ್ನೆಲೆಯಲ್ಲಿ ಚಿತ್ರದ ಪ್ರಚಾರ ಆರಂಭಿಸಿರುವ ಚಿತ್ರತಂಡ "ಲೈಫು ಯಾಕೋ ಖಾಲಿ ಖಾಲಿ' ಎಂಬ ಹಾಡು ರಿಲೀಸ್ ಮಾಡಿದೆ. ನಾಗಾರ್ಜುನ್ ಶರ್ಮಾ ಸಾಹಿತ್ಯ ರಚಿಸಿದ್ದು, ಆಕಾಶ್ ಪರ್ವ ಸಂಗೀತ ನೀಡಿದ್ದಾರೆ. ಸಿದ್ದಾರ್ಥ ಬೆಳ್ಮಣ್ಣು ಧ್ವನಿಯಾಗಿದ್ದು, ರಘು ಆರ್.ಜೆ. ನೃತ್ಯ ನಿರ್ದೇಶನದಲ್ಲಿ ನಟ ಸಿದ್ದು ಮೂಲಿಮನಿ ಹಾಗೂ ರಘು ರಾಮನಕೊಪ್ಪ ಕುಣಿದು ಕುಪ್ಪಳಿಸಿದ್ದಾರೆ. ನಿರ್ದೇಶಕ ಚೇತನ್, "ವ್ಲಾಗರ್ ಕುರಿತು ಎಲ್ಲವೂ ಕಥೆಯಾಗಿ ಹೇಳುವುದಕ್ಕೆ ಆಗುವುದಿಲ್ಲ. ಹಾಗಾಗಿ, ಅದನ್ನು ಹಾಡಿನ ಮೂಲಕ ಇಲ್ಲಿ ನಿರೂಪಿಸಿದ್ದೇವೆ. ಸದ್ಯದಲ್ಲೇ ಟ್ರೇಲರ್ ರಿಲೀಸ್ ಮಾಡಿ, ಸಿನಿಮಾ ಬಿಡುಗಡೆ ದಿನಾಂಕ ಅನೌನ್ಸ್ ಮಾಡಲಿದ್ದೇವೆ' ಎಂದು ಮಾಹಿತಿ ಹಂಚಿಕೊಂಡರು.
ಇನ್ನು ನಾಯಕನಟ ಸಿದ್ದು ಮೂಲಿಮನಿ, "ಈ ಹಾಡು ಮೊದಲೇ ಕಂಪೋಸ್ ಮಾಡಿದ್ದರಿಂದ ಅದರ ಫೀಲ್ ಹಾಗೂ ಕ್ರೇಜ್ ನನಗೆ ದಕ್ಕಿತ್ತು. ಹಾಗಾಗಿ, ಈ ಹಾಡಿನಲ್ಲಿ ಕುಣಿದು ಕುಪ್ಪಳಿಸಿದ್ದೇನೆ. ಇಲ್ಲಿನ ಎಷ್ಟೋ ಸಾಲುಗಳು ನನ್ನ ಮನಸಿನ ಮಾತಾಗಿವೆ. ಬೈಕ್ನ ಕೆಲವು ದೃಶ್ಯಗಳು ರಿಸ್ಕಿಯಾಗಿದ್ದವು. ಈ ಹಾಡಿನಲ್ಲಿ ಕಾಸ್ಟ್ಯೂಮ್ ಬದಲಾಯಿಸಿದಷ್ಟು, ಬೇರೆ ಯಾವ ಸಿನಿಮಾದ ಹಾಡಿನಲ್ಲೂ ನಾನು ಡ್ರೆಸ್ ಬದಲಾಯಿಸಿಲ್ಲ' ಎಂದು ಶೂಟಿಂಗ್ ಅನುಭವಗಳನ್ನು ಹಂಚಿಕೊಂಡರು.