Maarnami - ರಿತೀಶ್ ಶೆಟ್ಟಿ ಚೊಚ್ಚಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳಿರುವ, "ಗಿಣಿರಾಮ' ಖ್ಯಾತಿಯ ಕಿರುತೆರೆ ನಟ ರಿತ್ವಿಕ್ ಮಠದ್ ಮತ್ತು ಚೈತ್ರಾ ಜೆ. ಆಚಾರ್ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಸಿನಿಮಾ "ಮಾರ್ನಮಿ'. ಎಲ್ಲವೂ ಅಂದುಕೊಂಡಂತಾಗಿದ್ದರೆ ಸಿನಿಮಾ 2025ರ ನ.21ರಂದು ತೆರೆಗೆ ಬರಬೇಕಿತ್ತು. ಕಾರಣಾಂತರಗಳಿಂದ ಎರಡು ವಾರ ಮುಂದೂಡಿದ್ದ ಚಿತ್ರತಂಡ ಡಿ. 5ಕ್ಕೆ ರಿಲೀಸ್ ದಿನಾಂಕ ಘೋಷಿಸಿತ್ತು. ಆದರೆ, ಆಗಲೂ ಬಿಡುಗಡೆ ಮಾಡಲು ಸಾಧ್ಯವಾಗಿರಲಿಲ್ಲ. ಇದೀಗ ಹೊಸ ರಿಲೀಸ್ ದಿನಾಂಕ ಘೋಷಿಸಿದೆ. ಹೌದು, "ಮಾರ್ನಮಿ' ಇದೇ ತಿಂಗಳ 20ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ. ಕರಾವಳಿ ಸಂಸತಿ, ಆಚರಣೆ, ಭಾಷೆ, ಹುಲಿವೇಷ ಸೇರಿ ಹಲವು ವಿಷಯಗಳು ಚಿತ್ರದಲ್ಲಿದ್ದು, ನಿರ್ದೇಶಕ ರಿತೀಶ್ ಶೆಟ್ಟಿ, "ಈ ಹಿಂದೆ ರಿಲೀಸ್ ಡೇಟ್ ಅನೌನ್ಸ್ ಮಾಡಿದ್ದಾಗ ಪ್ರಚಾರಕ್ಕೆ ಸಮಯ ಸಿಕ್ಕಿರಲಿಲ್ಲ. ಹೀಗಾಗಿ ಚಿತ್ರವನ್ನು ಜನರಿಗೆ ತಲುಪಿಸಲು ಸ್ವಲ್ಪ ಹೆಚ್ಚು ಸಮಯ ಬೇಕೆಂದು, ಮುಂದೂಡಿದ್ದೆವು. "ಮಾರ್ನಮಿ'ಯಲ್ಲಿ ಒಳ್ಳೆ ಕಥೆ ಇದೆ. ಹುಲಿ ವೇಷ, ಕರಾವಳಿ ಭಾಗದ ಪ್ರೇಮಕಥೆ, ಆ್ಯಕ್ಷನ್, ಎಮೋಷನ್ಸ್, ಸಂಬಂಧಗಳ ಕುರಿತ ಅಂಶಗಳಿವೆ' ಎಂದು ಹೇಳಿಕೊಂಡರು. ನಾಯಕ ರಿತ್ವಿಕ್ ಮಠದ್, "ಸಾಕಷ್ಟು ತಯಾರಿ ಮಾಡಿಕೊಂಡು ಈ ಚಿತ್ರದಲ್ಲಿ ನಟಿಸಿದ್ದೇನೆ. ಮನುಷ್ಯ ತಾಳ್ಮೆ ಕಳೆದುಕೊಂಡರೆ ಏನೆಲ್ಲಾ ಆಗುತ್ತೆ ಎನ್ನುವ ಹಲವು ಮುಖಗಳನ್ನು ತೋರಿಸುವ ಪ್ರಯತ್ನ ಮಾಡಿದ್ದೇವೆ. ಸುದೀಪ್ ಸರ್ ಚಿತ್ರಕ್ಕೆ ಬೆಂಬಲವಾಗಿ ನಿಂತಿರುವುದು ನಮ್ಮ ತಂಡದ ಶಕ್ತಿ ಹೆಚ್ಚಿಸಿದೆ' ಎಂದು ಸಂತಸ ಹಂಚಿಕೊಂಡರು. ನಿರ್ಮಾಪಕ ನಿಶಾಂತ್, "ಮೊದಲು "ಮಾರ್ನಮಿ'ಯನ್ನು ಕನ್ನಡದಲ್ಲಿ ಬಿಡುಗಡೆ ಮಾಡಿ, ಪ್ರತಿಕ್ರಿಯೆ ನೋಡಿಕೊಂಡು ಪರಭಾಷೆಗಳಲ್ಲಿ ಡಬ್ ಮಾಡುವ ಯೋಚನೆ ಇದೆ' ಎಂದರು.