Chowkidar - "ರಥಾವರ' ಖ್ಯಾತಿಯ ಚಂದ್ರಶೇಖರ್ ಬಂಡಿಯಪ್ಪ ನಿರ್ದೇಶಿಸಿರುವ "ದಿಯಾ' ಪೃಥ್ವಿ ಅಂಬಾರ್ ಮತ್ತು "ಕಾಲಾಪತ್ಥರ್' ಧನ್ಯಾ ರಾಮಕುಮಾರ್ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಸಿನಿಮಾ "ಚೌಕಿದಾರ್'. ಟೈಟಲ್, ಟೀಸರ್ ಮತ್ತು ಹಾಡಿನ ಮೂಲಕ ಚಿತ್ರ ಕುತೂಹಲ ಮೂಡಿಸಿದ್ದು, ಇತ್ತೀಚೆಗಷ್ಟೆ ನಟ ಧ್ರುವ ಸರ್ಜಾ "ಚೌಕಿದಾರ್' ಬಿಡುಗಡೆ ದಿನಾಂಕ ಘೋಷಿಸಿ, ತಂಡಕ್ಕೆ ಶುಭಹಾರೈಸಿದ್ದಾರೆ. ಇದೇ ತಿಂಗಳ 30ರಂದು ಸಿನಿಮಾ ರಿಲೀಸ್ ಮಾಡಲು ಚಂದ್ರಶೇಖರ್ ಬಂಡಿಯಪ್ಪ ಮತ್ತು ತಂಡ ನಿರ್ಧರಿಸಿದೆ.
ಪೃಥ್ವಿ ಮತ್ತು ಧನ್ಯಾ ಜತೆಗೆ ಕೆಲ ದಿನಗಳ ಹಿಂದಷ್ಟೇ ಚಿತ್ರರಂಗದಲ್ಲಿ 50 ವರ್ಷ ಪೂರೈಸಿದ ಹಿರಿಯ ನಟ ಸಾಯಿಕುಮಾರ್ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಜತೆಗೆ "ಚೈತ್ರದ ಪ್ರೇಮಾಂಜಲಿ' ನಾಯಕಿ ಶ್ವೇತಾ ಮತ್ತು ಸುಧಾರಾಣಿ ಕೂಡ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದು, ಧರ್ಮ, ಗಿಲ್ಲಿ ನಟ ತಾರಾಗಣದಲ್ಲಿದ್ದಾರೆ. ವಿಎಸ್ ಎಂಟರ್ಟೇನ್ಮೆಂಟ್ ಬ್ಯಾನರ್ನಲ್ಲಿ ಕಲ್ಲಹಳ್ಳಿ ಚಂದ್ರಶೇಖರ್ ಮತ್ತು ವಿದ್ಯಾದೇವಿ "ಚೌಕಿದಾರ್'ಗೆ ಹಣ ಹೂಡಿದ್ದಾರೆ.
ಚಿತ್ರಕ್ಕೆ ಸಚಿನ್ ಬಸ್ರೂರ್ ಸಂಗೀತ, ಸಿದ್ದು ಕಂಚನಹಳ್ಳಿ ಛಾಯಾಗ್ರಹಣ, ಡಾ.ವಿ. ನಾಗೇಂದ್ರ ಪ್ರಸಾದ್, ಪ್ರಮೋದ್ ಮರವಂತೆ, ಸಂತೋಷ್ ನಾಯಕ್ ಸಾಹಿತ್ಯ, ಮುರಳಿ ಮಾಸ್ರ ನೃತ್ಯನಿರ್ದೇಶನ, ಜ್ಞಾನೇಶ್ ಮಠದ್ ಸಂಕಲನ ಮತ್ತು ಜೈ ಸುಬ್ರಹ್ಮಣ್ಯ ಸಾಹಸ ನಿರ್ದೇಶನವಿರಲಿದೆ. ಅಪ್ಪ-ಮಗನ ಬಾಂಧವ್ಯದ ಕಥೆಯಿರುವ "ಚೌಕಿದಾರ್' ಈಗಾಗಲೇ ಸೆನ್ಸಾರ್ ಪಾಸ್ ಆಗಿದ್ದು, "ಯು/ಎ' ಪ್ರಮಾಣಪತ್ರ ದೊರೆತಿದೆ.