ಯಶ್​ ಜತೆ ಕಾರಿನೊಳಗಿದ್ದ ಬೋಲ್ಡ್​ ಬ್ಯೂಟಿ ಅವಳಲ್ಲ! 'ಟಾಕ್ಸಿಕ್'​ ವೈರಲ್​ ದೃಶ್ಯದಲ್ಲಿರುವ ನಟಿ ಈಕೆ... ಗೀತು ಸ್ಪಷ್ಟನೆ

ಜ.8ರಂದು ಯಶ್ ಹುಟ್ಟುಹಬ್ಬಕ್ಕೆ 'ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್ ಅಪ್ಸ್' ಚಿತ್ರದ ನಿರ್ಮಾಪಕಿ ಗೀತು ಮೋಹನ್​ದಾಸ್​, ನಟನ ಅಭಿಮಾನಿಗಳಿಗೆಂದು ಸಿನಿಮಾದ ಟೀಸರ್ ಅನ್ನು ಬಿಡುಗಡೆಗೊಳಿಸಿದರು. ಇದು ರಿಲೀಸ್​ ಆದ ಕೆಲವೇ ನಿಮಿಷಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಬೆಂಕಿ ಹಚ್ಚಿತು. ಟೀಸರ್​​ ಆರಂಭದಲ್ಲೇ ಯಶ್ ಅವರನ್ನು ಹಿಂದೆಂದೂ ನೋಡಿರದ ಅವತಾರದಲ್ಲಿ ತೋರಿಸಲಾಗಿದೆ. ಇದನ್ನು ನೋಡಿದ ಸಿನಿಪ್ರಿಯರು, ಅದರಲ್ಲಿನ ವಯಸ್ಕ-ಆಧಾರಿತ ದೃಶ್ಯಗಳಿಂದಾಗಿ ತೀವ್ರ ಅಸಮಾಧಾನಗೊಂಡಿದ್ದಾರೆ. ಸದ್ಯ ಈ ದೃಶ್ಯ ಕೆಲವರ ಸಿಡಿನುಡಿಗೆ ಕಾರಣವಾಗಿದ್ದು, ಭಾರೀ ಟ್ರೋಲ್​ಗೆ ಸಿಲುಕಿದೆ.

ಟೀಸರ್​ನ ಓಪನಿಂಗ್​ ಸೀನ್​ನಲ್ಲಿ ಕಾರಿನಲ್ಲಿ ಯಶ್​ ಜತೆಗೆ ಹಸಿಬಿಸಿ ದೃಶ್ಯದಲ್ಲಿ ಕಾಣಿಸಿಕೊಂಡಿರುವ ನಟಿಯ ಹೆಸರು ನಟಾಲಿ ಬರ್ನ್ ಎಂಬ ಪರಿಚಯ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡಿತು. ಸುದ್ದಿ ಸಂಸ್ಥೆಗಳು ಕೂಡ ಈಕೆಯೇ ಕಾರಿನೊಳಗೆ ಯಶ್​ ಜತೆಗಿದ್ದ ಬೋಲ್ಡ್ ಬ್ಯೂಟಿ ಎಂದಿತು. ಕೇವಲ, ಒಂದೇ ದಿನದಲ್ಲಿ ಬರ್ನ್​ ಹೆಸರು ಜಾಲತಾಣಗಳಲ್ಲಿ ಟ್ರೆಂಡಿಂಗ್​ ಆಯಿತು. ಇದರಿಂದ ಹಾಲಿವುಡ್ ನಟಿಯ ಜನಪ್ರಿಯತೆ ಕೂಡ ವೇಗವಾಗಿ ಹೆಚ್ಚಿತು.

ಕೆಲವರಂತು ಚಿತ್ರದಲ್ಲಿನ ಹಾಟ್​ ದೃಶ್ಯಗಳ ಅವಶ್ಯಕತೆ ಇದೆಯೇ ಎಂದು ಕೇಳುವ ಮೂಲಕ ನಟಿಯ ಹಿನ್ನೆಲೆ? ಈಕೆ ಯಾರು ಎಂಬ ಮಾಹಿತಿಯನ್ನು ಜಾಲತಾಣಗಳಲ್ಲಿ ಹುಡುಕಾಡಿದರು. ನೆಟ್ಟಿಗರಲ್ಲಿ ಭಾರೀ ಚರ್ಚೆಗೆ ಗ್ರಾಸವಾದ ನಟಾಲಿ, ಟೀಸರ್​ನಲ್ಲಿ ಯಶ್​ ಜತೆ ಕಾಣಿಸಿಕೊಂಡ ನಟಿ ಅಲ್ಲವೇ ಅಲ್ಲ ಎಂಬ ವಿಷಯ ಸದ್ಯ ಹೊರಬಿದ್ದಿದೆ. ಇದಕ್ಕೆ ಸ್ವತಃ ಚಿತ್ರದ ನಿರ್ದೇಶಕಿ ಗೀತು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಹಾಕಿಕೊಂಡಿರುವ ಸ್ಟೋರಿಯೇ ಸಾಕ್ಷಿ.

ಅಷ್ಟಕ್ಕೂ, ಗೀತು ಮೋಹನ್​ದಾಸ್​ ಹಾಕಿರುವ ಸ್ಟೋರಿ ಗಮನಿಸಿದರೆ, ಅದರಲ್ಲಿ ಅವರೇಳುವಂತೆ, ಟೀಸರ್​ನಲ್ಲಿ ಕಂಡುಬರುವ ಸ್ಮಶಾನದ ಜಾಗದಲ್ಲಿ ನಡೆಯುವ ದೃಶ್ಯದಲ್ಲಿ ನಟ ಯಶ್​ ಜತೆ ಕಾರಿನೊಳಗಿರುವುದು ನಟಾಲೀ ಬರ್ನ್​ ಅಲ್ಲ. ಬದಲಿಗೆ ಮತ್ತೋರ್ವ ನಟಿ ಬೀಟ್ರಿಜ್​ ಎನ್ನಲಾಗಿದೆ. ಇದು ಹಲವರ ಗೊಂದಲಕ್ಕೆ ಕಾರಣವಾದರೆ, ಟೀಸರ್​ನಲ್ಲಿ ಮಿಂಚಿದ ಬೋಲ್ಡ್​ ಬ್ಯೂಟಿ ಬರ್ನ್​ ಅಲ್ಲವೇ ಅಲ್ಲ ಎಂಬುದನ್ನು ಸ್ಪಷ್ಟಪಡಿಸಿದೆ,(ಏಜೆನ್ಸೀಸ್).