ಸಂಗೀತ ಬಾರ್​ನಲ್ಲಿ ವಿಭಿನ್ನ ಲುಕ್​ಗಳಲ್ಲಿ ಕೋಮಲ್​, ಮೇಘನಾ, ಅನುಷಾ ಮಿಂಚು

ಕೋಮಲ್​ ಕುಮಾರ್​, ಮೇಘನಾ ರಾಜ್​ ಮತ್ತು ಅನುಷಾ ರೈ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಸಿನಿಮಾ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​'. ಇತ್ತೀಚೆಗಷ್ಟೆ ಚಿತ್ರದ ಶೂಟಿಂಗ್​ ಪೂರ್ಣಗೊಂಡಿದ್ದು, ಚಿತ್ರತಂಡ ಕುಂಬಳಕಾಯಿ ಒಡೆದಿದೆ. "ಕತ್ತಲೆ ಕೋಣೆ', "ಇನಾಮ್ದಾರ್​' ನಿರ್ದೇಶಕ ಸಂದೇಶ್​ ಶೆಟ್ಟಿ ಅಜ್ರಿ ಈ ಚಿತ್ರಕ್ಕೆ ಆ್ಯಕ್ಷನ್​&ಕಟ್​ ಹೇಳುತ್ತಿದ್ದಾರೆ. ಎರಡು ಹಂತಗಳಲ್ಲಿ ಕುಂದಾಪುರ, ಶಿವಮೊಗ್ಗ, ತೀರ್ಥಹಳ್ಳಿ ಸೇರಿ ಕರಾವಳಿ ಹಾಗೂ ಮಲೆನಾಡ ಭಾಗದಲ್ಲಿ 75 ದಿನಗಳ ಕಾಲ ಶೂಟಿಂಗ್​ ನಡೆಸಲಾಗಿದೆ. ನಾಯಕ ನಟ ಕೋಮಲ್​ ಕುಮಾರ್​ ಇದೇ ಮೊದಲ ಬಾರಿಗೆ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​' ಚಿತ್ರದಲ್ಲಿ ಐತಿಹಾಸಿಕ ಹಾಗೂ ಆಧುನಿಕ ಎರಡು ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಒಂದರಲ್ಲಿ ಆಸ್ಥಾನವೊಂದರ ವರ್ಣಚಿತ್ರ ಕಲಾವಿದನಾಗಿದ್ದರೆ, ಮತ್ತೊಂದರಲ್ಲಿ ಸಿನಿಮಾ ನಿರ್ದೇಶಕನಾಗಿ ಕೋಮಲ್​ ದ್ವಿಪಾತ್ರದಲ್ಲಿ ನಟಿಸುತ್ತಿರುವುದು ವಿಶೇಷ. ಅವರಿಗೆ ಅನುಷಾ ರೈ ಜೋಡಿಯಾಗಿದ್ದು, ದ್ವೀತಿಯಾರ್ಧದಲ್ಲಿ ಬರುವ "ದೇವರ ತಾಣ' ಭಾಗದಲ್ಲಿ ಮಹಾರಾಣಿಯಾಗಿ ಮೇಘನಾ ಕಾಣಿಸಿಕೊಳ್ಳಲಿದ್ದಾರೆ. ಉಳಿದಂತೆ ಪ್ರಮೋದ್​ ಶೆಟ್ಟಿ, ಪ್ರಕಾಶ್​ ತುಮ್ಮಿನಾಡ್​, ವಜ್ರಧಿರ್​ ಜೈನ್​, ಉತ್ಸವ್​, ರಾು ರಾಮನಕೊಪ್ಪ, ವರ್ಧನ್​, ಎಂ.ಕೆ.ಮಠ ತಾರಾಗಣದಲ್ಲಿದ್ದಾರೆ.

"ತತ್ಸಮ ತದ್ಭವ' ಚಿತ್ರದ ಬಳಿಕ ನಟಿ ಮೇಘನಾ ರಾಜ್​ ಸರ್ಜಾ ಮತ್ತೆ ತೆರೆಯ ಮೇಲೆ ಕಾಣಿಸಿಕೊಂಡಿಲ್ಲ. "ಬುದ್ಧಿವಂತ 2' ಚಿತ್ರದಲ್ಲಿ ನಟಿಸಿದ್ದಾರೆ ಎನ್ನಲಾಗಿದೆಯಾದರೂ, ಆ ಸಿನಿಮಾ ತಡವಾಗಿದೆ. ಇದೀಗ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​'ನಲ್ಲಿ ಮೇನಾ ವಾರಿಯರ್​ ಕ್ವೀನ್​ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಒಂದು ಕೈಯಲ್ಲಿ ಕತ್ತಿ, ಮತ್ತೊಂದು ಕೈಯಲ್ಲಿ ಗುರಾಣಿ ಹಿಡಿದು ಸಮರಕ್ಕೆ ಸಜ್ಜಾಗಿರುವ ಲುಕ್​ನಲ್ಲಿ ಮೇಘನಾ ಮಿಂಚಿದ್ದಾರೆ.

ಚಿತ್ರದ ಹೆಸರು "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​' ಅಂತಿದ್ದರೂ, ಇನ್ನೊಂದು ಟೈಟಲ್​ ಕೂಡ ಇದೆ ಎನ್ನುತ್ತಾರೆ ನಿರ್ದೇಶಕ ಸಂದೇಶ್​ ಶೆಟ್ಟಿ ಅಜ್ರಿ. "ಅದಕ್ಕೆ ಕಾರಣ ಚಿತ್ರದ ಕಥೆ. ಮೊದರ್ಲಧ ಬಾರ್​ನಲ್ಲಿ ಶುರುವಾಗಿ, ಅದರ ಸುತ್ತ ಕಥೆ ಸಾಗುತ್ತದೆ. ಆದರೆ, ದ್ವೀತಿಯಾರ್ಧ ದೇವರ ತಾಣದಲ್ಲಿ ಕಥೆ ಶುರುವಾಗಿ ಅಲ್ಲಿಯೇ ಮುಗಿಯುತ್ತದೆ. ಹೀಗಾಗಿ ಚಿತ್ರದ ಮೊದರ್ಲಧ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​' ಆಗಿದ್ದರೆ, ದ್ವೀತಿಯಾರ್ಧದಲ್ಲಿ "ದೇವರ ತಾಣ' ಅಂತ, ಎರಡೂ ನಮ್ಮ ಸಿನಿಮಾ ಟೈಟಲ್​ಗಳೇ. ಆದರೆ, ಸೆನ್ಸಾರ್​ ನಿಯಮದಂತೆ ಒಂದು ಚಿತ್ರಕ್ಕೆ ಒಂದೇ ಹೆಸರು ಇಡಬೇಕು. ಹೀಗಾಗಿ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​' ಹೆಸರನ್ನು ಅಂತಿಮಗೊಳಿಸಿದ್ದೇವೆ' ಎನ್ನುತ್ತಾರೆ.

ಕುಂದಾಪುರದ ಅಂಪಾರಿನ ವಾಲ್ತೂರು ಗ್ರಾಮದಲ್ಲಿ ಏಳು ವಿಭಿನ್ನ ವಿನ್ಯಾಸಗಳ ಸೆಟ್​ಗಳನ್ನು ನಿರ್ಮಿಸಿ, ಅದರಲ್ಲೇ ಚಿತ್ರದ ಬಹುತೇಕ ಚಿತ್ರೀಕರಣ ನಡೆಸಿರುವುದು ವಿಶೇಷ. ಸುಮಾರು ಎರಡು ಎಕರೆ ಜಾಗದಲ್ಲಿ ಈ ಕಥೆಗೆ ತಕ್ಕಂತೆ ವೈವಿಧ್ಯಮಯ ಸೆಟ್​ಗಳನ್ನು ಹಾಕಿ, ಅದರಲ್ಲೇ "ಸಂಗೀತ ಬಾರ್​ ಆ್ಯಂಡ್​ ರೆಸ್ಟೋರೆಂಟ್​'ನ ಶೇಕಡ 90ರಷ್ಟು ಶೂಟಿಂಗ್​ ನಡೆಸಲಾಗಿದೆ.

ಚಿತ್ರದಲ್ಲಿ ನಾಲ್ಕು ವಿಭಿನ್ನ ಹಾಡುಗಳು, ಫೈಟ್ಸ್​, ಕಾಮಿಡಿ, ಎಮೋಷನ್ಸ್​ ಜತೆಗೊಂದು ಸ್ಪಿರಿಚುವಲ್​ ಕಥೆಯಿದ್ದು... ಒಂದು ಸಂಪೂರ್ಣ ಮನರಂಜನಾತ್ಮಕ ಚಿತ್ರವಿದು. ಒಬ್ಬ ನಿರ್ದೇಶಕನಾಗಿ ನನಗೇ ವಿಭಿನ್ನ ಅನುಭವ ನೀಡಿದ ಸಿನಿಮಾ ಇದು. ಕನ್ನಡ ಚಿತ್ರರಂಗದ ಮಟ್ಟಿಗೆ ಇದೊಂದು ವಿಭಿನ್ನ ಚಿತ್ರವಾಗಿ ನಿಲ್ಲುವ ವಿಶ್ವಾಸವಿದೆ. -ಸಂದೇಶ್​ ಶೆಟ್ಟಿ ಅಜ್ರಿ, ನಿರ್ದೇಶಕ