Raj B Shetty - ರಾಜ್ ಬಿ. ಶೆಟ್ಟಿ ನಾಯಕನಾಗಿರುವ, ನಿರ್ದೇಶಕ ಪ್ರೇಮ್ ಶಿಷ್ಯ ರವಿ ಸಾರಂಗ ಚೊಚ್ಚಲ ಬಾರಿಗೆ ನಿರ್ದೇಶಿಸಿ, ಸಾಹಸ ನಿರ್ದೇಶಕ ಡಾ. ರವಿವರ್ಮಾ ಮೊದಲ ಬಾರಿಗೆ ನಿರ್ಮಿಸಿರುವ ಸಿನಿಮಾ "ರಕ್ಕಸಪುರದೋಳ್'. ಇದು ಕೊಳ್ಳೇಗಾಲದ ಹಿನ್ನೆಲೆಯಲ್ಲಿ ಸಾಗುವ ಸೈಕಲಾಜಿಕಲ್ ಆ್ಯಕ್ಷನ್ ಥ್ರಿಲ್ಲರ್ ಕಥೆಯಾಗಿದ್ದು, ಸಿನಿಮಾ ಇದೇ ತಿಂಗಳ 6ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ.
ಹೀಗಾಗಿ ಇತ್ತೀಚೆಗಷ್ಟೆ ನಟ ಕಿಚ್ಚ ಸುದೀಪ್ ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿ, "ರಾಜ್ ಹೆಸರನ್ನೇ ಹೇಳಲಾಗದ ಶೀರ್ಷಿಕೆಗಳನ್ನಿಟ್ಟು ಸಿನಿಮಾ ಮಾಡಿ ಗೆಲ್ಲುತ್ತಾರೆ. ನನಗೂ ಹಾಗೊಂದು ಹೆಸರು ಹೇಳಲಾಗದ ಟೈಟಲ್ ಇಟ್ಟು ಸಿನಿಮಾ ಮಾಡಿ. "ರಕ್ಕಸಪುರದೋಳ್' ಟ್ರೇಲರ್ ಚೆನ್ನಾಗಿ ಮೂಡಿಬಂದಿದೆ. ನಾನು ಮತ್ತು ರವಿವರ್ಮಾ ಹೆಚ್ಚೂಕಡಿಮೆ ಚಿತ್ರರಂಗಕ್ಕೆ ಒಟ್ಟಿಗೆ ಬಂದೆವು. ಅವರಿಗೆ ಮತ್ತು ಇಡೀ ತಂಡಕ್ಕೆ ಒಳಿತಾಗಲಿ' ಎಂದು ಶುಭಹಾರೈಸಿದರು.
ನಾಯಕ ರಾಜ್ ಬಿ. ಶೆಟ್ಟಿ, "ನಾನು ಈ ಸಿನಿಮಾ ಒಪ್ಪಿಕೊಳ್ಳಲು ನಿರ್ದೇಶಕರೇ ಕಾರಣ. ಕನ್ನಡದಲ್ಲಿ ನಿರ್ದೇಶಕರ ಕೊರತೆ ಇದೆ ಅಂತ ಮತ್ತೆ ಹೇಳುವೆ. ಇದು ರಿಚ್ ಸಿನಿಮಾ. ಹಾಗಂತ ಬಜೆಟ್ನಲ್ಲಲ್ಲ. ತಂತ್ರಜ್ಞರು ಶ್ರೀಮಂತರು ಇರುವಾಗ ಕಡಿಮೆ ಬಜೆಟ್ ಚಿತ್ರವೂ ಯಶಸ್ಸು ಗಳಿಸುತ್ತದೆ' ಎಂದರು. ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ರಿಲೀಸ್ ಆಗಲಿದ್ದು, ಎರಡೂ ಭಾಷೆಗಳಲ್ಲಿ ಪ್ರೇಕ್ಷಕರ ಪ್ರತಿಕ್ರಿಯೆ ನೋಡಿಕೊಂಡು ಮುಂದಿನ ದಿನಗಳಲ್ಲಿ ಬೇರೆ ಭಾಷೆಗಳಿಗೂ ಡಬ್ ಮಾಡುವ ಆಲೋಚನೆ ಚಿತ್ರತಂಡದ್ದು.
ರಾಜ್ಗೆ ಚಿತ್ರದಲ್ಲಿ "ಒಂದು ಸರಳ ಪ್ರೇಮಕಥೆ' ಖ್ಯಾತಿಯ ತಮಿಳು ನಟಿ ಸ್ವಾತಿಷ್ಠ ಕೃಷ್ಣನ್ ಜೋಡಿಯಾಗಿದ್ದು, ಅರ್ಚನಾ ಕೊಟ್ಟಿಗೆ, ಅನಿರುದ್ಧ್ ಭಟ್, ಬಿ. ಸುರೇಶ್, ಗೋಪಾಲ್ ದೇಶಪಾಂಡೆ, ಗೌರವ್ ಶೆಟ್ಟಿ, ಜಹಾಂಗೀರ್ ಪ್ರಮುಖ ತಾರಾಗಣದಲ್ಲಿದ್ದಾರೆ. ಅರ್ಜುನ್ ಜನ್ಯ ಸಂಗೀತ, ವಿಲಿಯಮ್ ಡೇವಿಡ್ ಛಾಯಾಗ್ರಹಣದಲ್ಲಿ ಸಿನಿಮಾ ಮೂಡಿಬಂದಿದೆ.