ಬೇರೆ ಚಿತ್ರರಂಗಗಳಿಗೆ ಹೋಲಿಸಿದರೆ, ಕನ್ನಡ ಚಿತ್ರರಂಗದಲ್ಲಿ ಸ್ಟಾರ್ಗಳ ಸಂಖ್ಯೆ ತೀರಾ ಕಡಿಮೆ. ಇರುವುದೇ ಮೂರು ಮತ್ತೊಬ್ಬ ಸ್ಟಾರ್. ಅವರ ನಡುವೆ ವೈಮನಸ್ಸಿರಲಿ, ಇಲ್ಲದಿರಲಿ.. ಆದರೆ, ಅವರ ಫ್ಯಾನ್ಗಳ ನಡುವೆ ಯಾವಾಗಲೂ ಹಗ್ಗಜಗ್ಗಾಟ ಇದ್ದಿದ್ದೇ. ಈ ಫ್ಯಾನ್ವಾರ್ಗಳಿಂದಾಗಿ ಆ ನಟರ ಚಿತ್ರಗಳಿಗೆ ಭಾರೀ ಹೊಡೆತ ಬೀಳುತ್ತಿದೆ. ಬುಕ್ಮೈಶೋ, ಐಎಂಡಿಬಿಗಳಲ್ಲಿ ನೆಗೆಟಿವ್ ರೇಟಿಂಗ್ ಹಾಗೂ ಫೇಸ್ಬುಕ್, ಇನ್ಸ್ಟಾ, ಯೂಟ್ಯೂಬ್ಗಳಲ್ಲಿ ನೆಗೆಟಿವ್ ರಿವ್ಯೂಗಳ ಮೂಲಕ ಮತ್ತೊಬ್ಬ ಸ್ಟಾರ್ ಚಿತ್ರವನ್ನು ಸೋಲಿಸುವ ಹುನ್ನಾರಗಳೂ ನಡೆಯುತ್ತಿರುತ್ತವೆ. ಇದು ಸಾಮಾನ್ಯ ಪ್ರೇಕ್ಷಕರ ಮೇಲೆ ಪರಿಣಾಮ ಬೀರುವ ಜತೆಗೆ ಚಿತ್ರತಂಡ, ಅದರಲ್ಲೂ ನಿರ್ಮಾಪಕರ ಮೇಲೆ ಹೆಚ್ಚು ದುಷ್ಪರಿಣಾಮ ಬೀರುತ್ತಿತ್ತು. ಹಾಗಂತ ಈ ನೆಗೆಟಿವ್ ಬೆಳವಣಿಗೆ ಕನ್ನಡ ಚಿತ್ರರಂಗಕ್ಕಷ್ಟೇ ಸೀಮಿತ ಅಂತಲ್ಲ. ಬದಲಾಗಿ, ಎಲ್ಲ ಚಿತ್ರರಂಗಗಳಲ್ಲೂ ಸಾಮಾನ್ಯವಾಗಿದೆ. ಕೆಲ ತಿಂಗಳ ಹಿಂದೆ ಮಲಯಾಳಂ ಚಿತ್ರರಂಗ ಸಿನಿಮಾ ರಿಲೀಸ್ ಆದ ಮೊದಲ ಮೂರು ದಿನಗಳ ಕಾಲ ಆನ್ಲೈನ್ನಲ್ಲಿ ವಿಮರ್ಶೆ ಹಂಚಿಕೊಳ್ಳಬಾರದೆಂದು ತಡೆಯಾಜ್ಞೆ ತರಲು ಪ್ರಯತ್ನಿಸಿದ್ದರು. ಅದರಲ್ಲಿ ಯಶಸ್ಸು ಗಳಿಸಲಿಲ್ಲ. ಆದರೆ, ಈ ಸೋಷಿಯಲ್ ಮೀಡಿಯಾ ಫ್ಯಾನ್ವಾರ್ ಸಮಸ್ಯೆಗೆ ಕನ್ನಡ ಚಿತ್ರರಂಗ ಒಂದೊಳ್ಳೆ ಪರಿಹಾರ ಹುಡುಕಿಕೊಂಡಿದೆ. ಹೌದು, ಜಾಲತಾಣಗಳಲ್ಲಿ ರೇಟಿಂಗ್ ಮತ್ತು ರಿವ್ಯೂಗಳನ್ನು ರ್ನಿಬಂಧಿಸುವ ಮೂಲಕ ಅಭಿಮಾನಿಗಳ ಆನ್ಲೈನ್ ರಗಳೆಗೆ ಬ್ರೇಕ್ ಹಾಕುವ ಯತ್ನ ಸದ್ದಿಲ್ಲದೇ ಸಾಗಿದೆ.
ಆನ್ಲೈನ್ ಮಾಯೆ, ಕರಾಳ ಛಾಯೆ
ಬುಕ್ಮೈಶೋನಲ್ಲಿ ಎಷ್ಟು ಲೈಕ್ಸ್ ಬಂತು? 10 ಅಂಕಗಳಲ್ಲಿ ಪ್ರೇಕ್ಷಕರು ಎಷ್ಟು ರೇಟಿಂಗ್ ನೀಡುತ್ತಿದ್ದಾರೆ? ಅಂತೆಲ್ಲ ನೋಡಿಕೊಂಡು, ಬೇರೆ ನಟರ ಅಭಿಮಾನಿಗಳು ಸಿನಿಮಾ ನೋಡದಿದ್ದರೂ 10ರಲ್ಲಿ 1 ಅಂಕ ನೀಡುವ ಮೂಲಕ ಚಿತ್ರದ ರೇಟಿಂಗ್ ಕುಗ್ಗಿಸಲು ಯತ್ನಿಸುತ್ತಿದ್ದರು. ಕಳೆದ ವರ್ಷ ತೆರೆಗೆ ಬಂದ ತೂಗುದೀಪ ದಿನಕರ್ ನಿರ್ದೇಶನದ "ರಾಯಲ್', ಧ್ರುವ ಸರ್ಜಾ ನಟಿಸಿದ್ದ "ಮಾರ್ಟಿನ್', ಧನ್ವೀರ್ ಅಭಿನಯದ "ವಾಮನ' ಚಿತ್ರಗಳಿಗೆ ಈ ನೆಗೆಟಿವ್ ರೇಟಿಂಗ್ ಭಾರೀ ಹೊಡೆತ ನೀಡಿತ್ತು ಎಂದು ಖುದ್ದು ಚಿತ್ರತಂಡದವರೇ ಆರೋಪಿಸಿದ್ದರು. ಆ ಬಳಿಕ ಎಚ್ಚೆತ್ತುಕೊಂಡ "ದ ಡೆವಿಲ್', "ಮಾರ್ಕ್', "45', "ಹಯಗ್ರೀವ' ಸೇರಿ ಕೆಲ ಚಿತ್ರತಂಡಗಳು ಬುಕ್ಮೈಶೋ ರೇಟಿಂಗ್ ನೀಡದಂತೆ ಕೋರ್ಟ್ ಮೂಲಕ ತಡೆ ತಂಡದರು. ಇನ್ನೂ ಕೆಲ ತಂಡಗಳು ಐಎಂಡಿಬಿ ಮಾತ್ರವಲ್ಲ ಸಾಮಾಜಿಕ ಜಾಲತಾಣ, ಯೂಟ್ಯೂಬ್, ಫೇಸ್ಬುಕ್, ಇನ್ಸ್ಟಾ, ವೆಬ್ಸೈಟ್ಗಳಲ್ಲೂ ರೇಟಿಂಗ್ಗೆ ರ್ನಿಬಂಧ ಹೇರಬೇಕೆಂದು ಕಾನೂನು ಮೊರೆ ಹೋದರು.
ಪರಭಾಷೆಗಳಲ್ಲೂ ರೇಟಿಂಗ್ಗೆ ಬ್ರೇಕ್
ಕನ್ನಡದಲ್ಲಿ ನೆಗೆಟಿವ್ ರೇಟಿಂಗ್ಗೆ ಬ್ರೇಕ್ ಹಾಕಿದ್ದನ್ನು ನೋಡಿದ ತೆಲುಗು ಚಿತ್ರರಂಗದವರೂ ಇದೀಗ ಇದೇ ಹಾದಿ ಹಿಡಿದಿದ್ದು, ಚಿರಂಜೀವಿ ನಟಿಸಿದ್ದ "ಮನಶಂಕರ ವರಪ್ರಸಾದ ಗಾರು', "ಅನಗನಗಾ ಒಕ ರಾಜು', "ನಾರಿ ನಾರಿ ನಡುವು ಮುರಾರಿ' ಮತ್ತು "ಬಿಎಂಡಬ್ಲೂ' ಚಿತ್ರಗಳಿಗೂ ರೇಟಿಂಗ್ ವಿರುದ್ಧ ತಡೆ ತಂದಿದ್ದಾರೆ. ಅಂದಹಾಗೆ, ಫ್ಯಾನ್ವಾರ್ಗೆ ಬ್ರೇಕ್ ಹಾಕಲು ಈ ಹೊಸ ಪರಿಹಾರ ಕಂಡುಹಿಡಿದಿರುವುದು ಬೆಂಗಳೂರಿನ ಐಪ್ಲೆಕ್ಸ್ ಸಂಸ್ಥೆ. ಕನ್ನಡ ಮತ್ತು ತೆಲುಗು ಚಿತ್ರರಂಗಗಳಲ್ಲಿ ಆನ್ಲೈನ್ ಫ್ಯಾನ್ವಾರ್ ಹಾವಳಿಗೆ ಬ್ರೇಕ್ ಬಿದ್ದ ಬೆನ್ನಲ್ಲೇ ಸದ್ಯ ಮಲಯಾಳಂ, ತಮಿಳು ಹಾಗೂ ಹಿಂದಿ ಚಿತ್ರತಂಡಗಳೂ ಸಹ ಇದೇ ರೀತಿ ಪರಿಹಾರ ಕಂಡುಕೊಳ್ಳಲು ಮುಂದಾಗಿವೆ ಎನ್ನಲಾಗಿದೆ.