Merotsava - ಮೇರು ಚಿತ್ರಕಲಾ ವಿದ್ಯಾರ್ಥಿಗಳ ಬಿಡಿಸಿದ ಮೈಸೂರು ಮತ್ತು ತಂಜಾವೂರ್ ಪೇಂಟಿಂಗ್ಗಳ ಪ್ರದರ್ಶನವನ್ನು ಚಿತ್ರಕಲಾ ಪರಿಷತ್ನಲ್ಲಿ ಆಯೋಜಿಸಲಾಗಿತ್ತು. ಚಿತ್ರಕಲಾ ವಿದ್ಯಾರ್ಥಿಗಳಿಗೆ ಸಪೋರ್ಟ್ ಮಾಡಲು ನಟಿ ಅನು ಪ್ರಭಾಕರ್, ಗಾಯಕಿ ಶಮಿತಾ ಮಲ್ನಾಡ್ ಮತ್ತು ನಿರ್ದೇಶಕ ಕೆ. ರಾಮನಾರಾಯಣ್ ಕೂಡ ಆಗಮಿಸಿದ್ದರು. ಶುಕ್ರವಾರ, ಶನಿವಾರ ಮತ್ತು ಭಾನುವಾರ ಆಯೋಜಿಸಲಾಗಿದ್ದ ಈ ಮೇರೋತ್ಸವದಲ್ಲಿ ಹಲವಾರು ಚಿತ್ರಕಲಾ ಪ್ರೇಮಿಗಳು ಭಾಗಿಯಾಗಿ ವಿವಿಧ ಪ್ರಕಾರಗಳ ಪೈಂಟಿಂಗ್ಗಳನ್ನು ಕಣ್ತುಂಬಿಕೊಂಡರು.
ನಟಿ ಅನು ಪ್ರಭಾಕರ್, ನನಗೆ ಚಿಕ್ಕ ವಯಸ್ಸಿನಿಂದಲೂ ಚಿತ್ರ ಕಲಾವಿದೆ ಆಗುವ ಆಸಕ್ತಿ ಇತ್ತು ಎಂದರು. ಗಾಯಕಿ ಶಮಿತಾ ಮಲ್ನಾಡ್, ಸಣ್ಣ ವಯಸ್ಸಿನಲ್ಲಿ ಬೆಟ್ಟ, ಗುಡ್ಡ, ಮರಗಳನ್ನು ಬರೆಯುತ್ತಿದ್ದೆವು. ಈಗ ಈ ವಿದ್ಯಾರ್ಥಿಗಳ ಚಿತ್ರಕಲೆಗಳನ್ನು ನೋಡಿದರೆ, ನಾವೂ ಕಲಿತು ರಚಿಸಬೇಕು ಎಂಬ ಆಸೆ ಚಿಗುರುತ್ತದೆ ಎಂದರು. ನಿರ್ದೇಶಕ ರಾಮನಾರಾಯಣ್, ನನ್ನ ಒಡಹುಟ್ಟಿದ ತಂಗಿ ತಿರುಮಲ ಶ್ರೀಕಾಂತ್ ಸಾಮಾನ್ಯ ಗೃಹಣಿಯಾಗಿದ್ದು, ತಮ್ಮ ಹವ್ಯಾಸದ ಚಿತ್ರಕಲೆಯನ್ನು ಇಂದು ಇಷ್ಟು ದೊಡ್ಡ ಮಟ್ಟದಲ್ಲಿ ಆಯೋಜಿಸುತ್ತಿರುವುದು ಸಾಧನೆಯೇ ಸರಿ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಮೇರು ಚಿತ್ರಕಲಾ ಶಾಲೆಯ ತಿರುಮಲ ಶ್ರೀಕಾಂತ್, ನಮ್ಮ ಸಂಪ್ರದಾಯ ಮತ್ತು ಸಂಸ್ಕೃತಿಯ ವೈಭವವನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಜವಾಬ್ದಾರಿ ನಮ್ಮದು. ಹೀಗಾಗಿಯೇ ಮೇರು ಚಿತ್ರಕಲಾ ಶಾಲೆಯ ವಿದ್ಯಾರ್ಥಿಗಳು ರಚಿಸಿದ ಚಿತ್ರಗಳನ್ನು ಚಿತ್ರಕಲಾ ಪರಿಷತ್ತಿನ ದೇವರಾಜ್ ಅರಸ್ ಗ್ಯಾಲರಿಯಲ್ಲಿ ಮೂರು ದಿನಗಳ ಪ್ರದರ್ಶನ ಆಯೋಜಿಸಿದ್ದೇವೆ ಎಂದು ಹೇಳಿಕೊಂಡರು.