ರಾಜ್ ಬಿ. ಶೆಟ್ಟಿ ನಟಿಸಿದ್ದ, ರವಿ ಸಾರಂಗ್ ಚೊಚ್ಚಲ ಬಾರಿಗೆ ನಿರ್ದೇಶಿಸಿದ್ದ ಮರ್ಡರ್ ಮಿಸ್ಟರಿ "ರಕ್ಕಸಪುರದೋಳ್'. ಕಳೆದ ಫೆ. 6ರಂದು ಬಿಡುಗಡೆಯಾದ ಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಬಾಲಿವುಡ್ ಸ್ಟಾರ್ ಸಲ್ಮಾನ್ ಖಾನ್ ಕೂಡ ಟ್ರೇಲರ್ ನೋಡಿ ಮಿಚ್ಚು, ಹಿಂದಿಗೆ ಸಿನಿಮಾ ಡಬ್ ಮಾಡುವಂತೆ ಸಲಹೆ ನೀಡಿದ್ದರು. ಕರ್ನಾಟಕ ಪಾತ್ರವಲ್ಲದೇ ಹೊರದೇಶಗಳಲ್ಲೂ ಕನ್ನಡಿಗರನ್ನು ರಂಜಿಸಿದ್ದ "ರಕ್ಕಸಪುರದೋಳ್' ಇತ್ತೀಚೆಗಷ್ಟೆ 50 ಸೆಂಟರ್ಗಳಲ್ಲಿ 25 ದಿನಗಳನ್ನು ಪೂರೈಸಿದೆ. ಈ ಚಿತ್ರ ಬಿಡುಗಡೆವರೆಗೂ ಟ್ರೇಲರ್, ಹಾಡುಗಳನ್ನು ನೋಡಿ ನಟ ರಾಜ್ ಬಿ. ಶೆಟ್ಟಿ ಬಗ್ಗೆ ಮೆಚ್ಚುಗೆಯ ಮಾತುಗಳು ಕೇಳಿಬರುತ್ತಿದ್ದವು. ಆದರೆ, ರಿಲೀಸ್ ಬಳಿಕ ನಟ ಅನಿರುದ್ಧ್ ಭಟ್ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಇದೇ ಖುಷಿಯಲ್ಲಿ ವಿಜಯವಾಣಿ ಜತೆ ಅನಿರುದ್ಧ್ ಮಾತಿಗೆ ಸಿಕ್ಕಿದ್ದರು. "ಹೊಯ್ಸಳ', "ಇಬ್ಬನಿ ತಬ್ಬಿದ ಇಳೆಯಲಿ', "ಮ್ಯಾಕ್ಸ್' ಚಿತ್ರಗಳಲ್ಲೂ ಬಹುತೇಕ ನೆಗಟಿವ್ ಶೇಡ್ಗಳಲ್ಲಿ ನಟಿಸಿರುವ ಅವರು, "ರಕ್ಕಸಪುರದೋಳ್'ನಲ್ಲಿ ಔಟ್ ಆ್ಯಂಡ್ ಔಟ್ ಟೆರರ್ ಪಾತ್ರದಲ್ಲಿ ಅಬ್ಬರಿಸಿದ್ದಾರೆ. "ಸಿನಿಮಾ ರಿಲೀಸ್ ಬಳಿಕ ಕಳೆದ ಒಂದು ತಿಂಗಳಿನಿಂದ ಸುಮಾರು 15 ಒನ್ಲೈನ್ ಕೇಳಿದ್ದೇನೆ. ನಾನು ಜನರ ಈ ನಂಬಿಕೆ ಗಳಿಸಲು, ಈ ಹಂತಕ್ಕೆ ಬರಲು 9 ವರ್ಷ ಬೇಕಾಯಿತು. ಸಿಕ್ಕಿದ್ದನ್ನೆಲ್ಲ ಮಾಡಿಕೊಂಡು ಹೋಗಲು ಇಷ್ಟವಿಲ್ಲ. ಹೀಗಾಗಿ ತುಂಬ ಎಚ್ಚರಿಕೆಯಿಂದ ಆಯ್ಕೆ ಮಾಡುತ್ತಿದ್ದೇನೆ. 15ರಲ್ಲಿ ನಾಲ್ಕೈದು ನೆಗಟಿವ್ ಪಾತ್ರಗಳು, ಏಳೆಂಟು ನಾಯಕ ಪಾತ್ರಗಳೂ ಇವೆ. ಸದ್ಯಕ್ಕೆ ನಾನು ಯಾವುದಕ್ಕೂ ಇಲ್ಲ ಎಂದಿಲ್ಲ. ಪೂರ್ತಿ ಕಥೆ ಕೇಳಿ ನಂತರ ನಿರ್ಧರಿಸಲಿದ್ದೇನೆ' ಎಂದು ಮಾಹಿತಿ ನೀಡುತ್ತಾರೆ.
ಸುಳ್ಯ ಟು ಸ್ಯಾಂಡಲ್ವುಡ್
ಮೂಲತಃ ಸುಳ್ಯದವರಾದ ಅನಿರುದ್ಧ್ ಬೆಳೆದಿದ್ದು ಕುಶಾಲನಗರದಲ್ಲಿ. ನಂತರ ಜಿಕೆವಿಕೆಯಲ್ಲಿ ಬಿಎಸ್ಸಿ ಅಗ್ರಿಕಲ್ಚರ್ ಓದಲು ಬೆಂಗಳೂರಿಗೆ ಬಂದ ಅವರಿಗೆ ಸಿನಿಮಾ ಮಾಡುವಾಸೆ ಉಂಟಾಗಿ ಗೆಳೆಯರ ಜತೆ ಸೇರಿ ಕಿರುಚಿತ್ರಗಳನ್ನು ಮಾಡತೊಡಗಿದರಂತೆ. ಕ್ರಮೇಣ ಬೇರೆ ತಂಡಗಳ ಜತೆಗೂ ಶಾರ್ಟ್ ಫಿಲಂ ಮಾಡುತ್ತಿದ್ದ ಅವರಿಗೆ, "ಹೊಯ್ಸಳ' ಚಿತ್ರದ ಆಡಿಷನ್ಸ್ ಬಗ್ಗೆ ಗೊತ್ತಾಗಿ ಭಾಗಿಯಾದರಂತೆ. ""ರಕ್ಕಸಪುರದೋಳ್' ಚಿತ್ರಕ್ಕೂ ನಾನು ಆಡಿಷನ್ ಮೂಲಕವೇ ಆಯ್ಕೆಯಾದೆ. ರಂಗಭೂಮಿ, ಕಿರುತೆರೆ ಅಥವಾ ಸಿನಿಮಾ ಹಿನ್ನೆಲೆ ಇಲ್ಲದಿದ್ದರೂ, ನಾನು ನಟನೆಯನ್ನು ಕಿರುಚಿತ್ರಗಳ ಮೂಲಕವೇ ಕಲಿತೆ' ಎನ್ನುತ್ತಾರೆ.
ರಾಜ್ ಸರ್ ಇಂದ ಮಾತ್ರ ಸಾಧ್ಯ!
ಸಾಮಾನ್ಯವಾಗಿ ತಮಗಿಂತ ತಮ್ಮ ಸುತ್ತಮುತ್ತಲಿನ ಪಾತ್ರಗಳು ಚೆನ್ನಾಗಿ ಮೂಡಿಬರುತ್ತಿದ್ದರೆ, ಸಂಕಲನದ ಸಮಯದಲ್ಲಿ ಕತ್ತರಿ ಪ್ರಯೋಗ ಮಾಡಿಸಿರುವ ಬಗ್ಗೆ ಹಲವರು ಆರೋಪಿಸಿರುವ ಉದಾಹರಣೆಗಳಿವೆ. ಆದರೆ, "ರಾಜ್ ಬಿ. ಶೆಟ್ಟಿ ಹಾಗಲ್ಲ' ಅಂತಾರೆ ಅನಿರುದ್ಧ್. "ಅವರಿಗೆ ಸಿನಿಮಾ ಮೇಲಿನ ಪ್ರೀತಿ ಅಗಾಧವಾದುದು. ನಾನು ಸಿನಿಮಾಗಿಂತ ದೊಡ್ಡವನು ಅಂತ ಅಂದುಕೊಂಡಾಗ ಆ ರೀತಿ ಬೇರೆ ಪಾತ್ರಗಳ ಮೇಲೆ ಪರಿಣಾಮ ಬೀರಬಹುದು. ಆದರೆ, ಯಾವಾಗ ಸಿನಿಮಾ ಗೆಲ್ಲಬೇಕು ಅಂತ ಕೆಲಸ ಮಾಡುತ್ತೇವೋ, ಆಗ ಹಾಗನ್ನಿಸುವುದಿಲ್ಲ. ಅವರು ತುಂಬ ಸೆಕ್ಯೂರ್ ನಟ. ನಮ್ಮ ಚಿತ್ರರಂಗಕ್ಕೆ ಹೊಸ ನಟರು ಬೇಕು ಅಂತನೇ ನನ್ನಂಥವರಿಗೆ ಸಪೋರ್ಟ್ ಮಾಡಿದರು. ಅವರಿಲ್ಲದೇ ಬೇರೆ ಯಾರೇ ಇದ್ದರೂ ನನಗೆ ಇಷ್ಟು ಸ್ಪೇಸ್ ಸಿಗುತ್ತಿರಲಿಲ್ಲ. ಪ್ರಚಾರದ ಸಮಯದಲ್ಲೂ ನನಗೆ ಆದ್ಯತೆ ನೀಡುತ್ತಿದ್ದರು, ಸೆಟ್ನಲ್ಲಿದ್ದಾಗಲೂ ಗೈಡ್ ಮಾಡುತ್ತಿದ್ದರು' ಎಂದು ಸಂತಸದಿಂದ ಹೇಳಿಕೊಳ್ಳುತ್ತಾರೆ.
ಮುಂದೆ?
ತಾವೇ ಒಂದು ತಂಡ ಮಾಡಿಕೊಂಡಿರುವ ಅನಿರುದ್ಧ್, ಕಥೆ ಸಿದ್ಧ ಮಾಡುತ್ತಿದ್ದಾರಂತೆ. "ಸದ್ಯ ನೆಗೆಟಿವ್ ಪಾತ್ರಗಳಲ್ಲಿ ನಟಿಸಲ್ಲ. ಸಾಫ್ಟ್ ಬಾಯ್ ರೀತಿಯ ನಾಯಕನ ಪಾತ್ರದಲ್ಲಿ ನಟಿಸಬೇಕು ಅಂತ ಅಂದುಕೊಂಡಿದ್ದೇನೆ. ಕೆಲ ದಿನಗಳಲ್ಲೇ ನಮ್ಮ ತಂಡದ ಒಂದು ಸಿನಿಮಾ ಘೋಷಣೆಯಾಗುವ ನಿರೀಕ್ಷೆಯಿದೆ. ನನಗೆ ಹಾಲಿವುಡ್ನ "ಜೋಕರ್' ಪಾತ್ರ ತುಂಬ ಇಷ್ಟ. ಅಂತಹ ಸ್ವಂತಿಕೆಯ ಪಾತ್ರದಲ್ಲಿ ನಟಿಸುವಾಸೆ ಇದೆ. ಚಿತ್ರದಿಂದ ಚಿತ್ರಕ್ಕೆ, ಪಾತ್ರದಿಂದ ಪಾತ್ರಕ್ಕೆ ನನ್ನ ಶಕ್ತಿ ಮತ್ತು ವೀಕ್ನೆಸ್ಗಳನ್ನು ಅರಿತು ಕಲಿಯುತ್ತಿದ್ದೇನೆ. ಕಲಿಕೆ ನಿರಂತರ' ಎನ್ನುತ್ತಾರೆ.