ಡಾರ್ಲಿಂಗ್ ಕೃಷ್ಣ ನಟಿಸಿ, ನಿರ್ದೇಶಿಸಿರುವ "ಲವ್ ಮಾಕ್ಟೇಲ್ 3' ಗೆಲುವಿನ ನಗು ಬೀರಿದೆ. ಒಂದೆಡೆ ಬಾಲಿವುಡ್ ಸಿನಿಮಾ "ಧುರಂಧರ್ 2 - ದ ರಿವೆಂಜ್' ಮತ್ತೊಂದೆಡೆ ತೆಲುಗಿನಲ್ಲಿ ಪವನ್ ಕಲ್ಯಾಣ್ ಅಭಿನಯಿಸಿದ್ದ "ಉಸ್ತಾದ್ ಭಗತ್ ಸಿಂಗ್', ಮಗದೊಂದೆಡೆ ಕೃತಿಚೌರ್ಯದ ಆರೋಪದ ನಡುವೆಯೂ "ಲವ್ ಮಾಕ್ಟೇಲ್' ಟ್ರೀಕ್ವೆಲ್ ಹೌಸ್ುಲ್ ಪ್ರದರ್ಶನ ಕಾಣುತ್ತಿದೆ. ""ಧುರಂಧರ್', "ಉಸ್ತಾದ್ ಭಗತ್ ಸಿಂಗ್' ಬಗ್ಗೆ ಗೊತ್ತಿದ್ದೇ ನಾವು ನಮ್ಮ ಸಿನಿಮಾ ರಿಲೀಸ್ ಮಾಡಿದ್ದು. ಈ ನಿರ್ಧಾರದಿಂದ ಖುಷಿಯಾಗುತ್ತಿದೆ. ಮೊದಲ ದಿನವೇ ಸೇಫ್ ಆಗಿದ್ದೇವೆ. "ಧುರಂಧರ್ 2' ಇಲ್ಲದಿದ್ದರೆ ಶೋಗಳು ಹೆಚ್ಚು ಸಿಗುತ್ತಿದ್ದವು. ಆದರೂ, "ಲವ್ ಮಾಕ್ಟೇಲ್ 3' ಸೋಮವಾರ 50 ಶೋಗಳು ಹೌಸ್ಫುಲ್ ಆಗಿವೆ. ಹಬ್ಬಕ್ಕೆ ಕುಟುಂಬಗಳಿಗಾಗಿ ಮಾಡಿದ ಚಿತ್ರವಿದು. ಅವರು ಬಂದು ಸಿನಿಮಾ ನೋಡುತ್ತಿದ್ದಾರೆ, ಮೆಚ್ಚುತ್ತಿದ್ದಾರೆ. "ಧುರಂಧರ್ 2' ನೂರಾರು ಕೋಟಿ ಕಲೆಕ್ಷನ್ ಮಾಡಿದೆ, ನಮ್ಮ ಸಿನಿಮಾನೂ ಅಷ್ಟೇ ಗಳಿಕೆ ಮಾಡಬೇಕು ಅಂತೇನಿಲ್ಲ. ಆ ಸವಾಲಿನ ನಡುವೆಯೂ ಗೆದ್ದಿರುವ ಖುಷಿಯಿದೆ' ಎಂದು ಸಂತಸ ಹಂಚಿಕೊಳ್ಳುತ್ತಾರೆ.
ಹ್ಯಾಟ್ರಿಕ್ ಸವಾಲು, ಹ್ಯಾಟ್ರಿಕ್ ಗೆಲುವು
"ಲವ್ ಮಾಕ್ಟೇಲ್' ಮೊದಗ ಭಾಗ 2020ರ ಜ. 31ರಂದು ರಿಲೀಸ್ ಆಗಿತ್ತು. ಬಾಲಿವುಡ್ನಲ್ಲಿ ಜ.24ರಂದು ವರುಣ್ ಧವನ್, ಶ್ರದ್ಧಾ ಕಪೂರ್, ಪ್ರಭುದೇವ ನಟಿಸಿದ್ದ "ಸ್ಟ್ರೀಟ್ ಡಾನ್ಸರ್ 3ಡಿ' ಮತ್ತು ಜ. 31ರಂದು ಸ್ೈ ಅಲಿ ಖಾನ್, ಟಬು ನಟಿಸಿದ್ದ "ಜವಾನಿ ಜಾನೇಮನ್' ರಿಲೀಸ್ ಆಗಿದ್ದವು. ತೆಲುಗಿನಲ್ಲಿ ರವಿತೇಜ, ಪಾಯಲ್ ರಜಪುತ್, ನಭಾ ನಟೇಶ್ ನಟಿಸಿದ್ದ "ಡಿಸ್ಕೋ ರಾಜ', ತಮಿಳಿನಲ್ಲಿ "ಸೈಕೋ', "ದಗಾಲ್ಟಿ' ಸೇರಿ ನಾಲ್ಕೆ$ದು ಸಿನಿಮಾಗಳು, ಮಲಯಾಳಂನಲ್ಲಿ ಅರ್ಧ ಡಜನ್ ಚಿತ್ರಗಳು ರಿಲೀಸ್ ಆಗಿದ್ದವು. ಹಾಗೇ ಕನ್ನಡದಲ್ಲೂ "ಕಾಣದಂತೆ ಮಾಯವಾದನು', "ಡಿಂಗ', "ನಮೋ', "ರಾಮನ ಸವಾರಿ' ಸೇರಿ ಆರು ಚಿತ್ರಗಳು ಬಿಡುಗಡೆಯಾಗಿದ್ದವು. ಅದೆಲ್ಲಕ್ಕಿಂತ ಹೆಚ್ಚಾಗಿ ಕರೊನಾ ಆತಂಕದ ನಡುವೆಯೂ "ಲವ್ ಮಾಕ್ಟೇಲ್' ಗೆಲುವಿನ ನಗು ಬೀರಿತ್ತು. ಇನ್ನು "ಲವ್ ಮಾಕ್ಟೇಲ್ 2' 2022ರ ಫೆ. 11ರಂದು ರಿಲೀಸ್ ಆಗಿತ್ತು. ಆಗ ಬಾಲಿವುಡ್ನಲ್ಲಿ ದೀಪಿಕಾ ಪಡುಕೋಣೆ ನಟಿಸಿದ್ದ "ಗೆಹ್ರಾಯಿಯಾ', ರಾಜಕುಮಾರ್ ರಾವ್, ಭೂಮಿ ಅಭಿನಯದ "ಬಧಾಯಿ ದೋ', ತಮಿಳಿನಲ್ಲಿ ವಿಕ್ರಮ್ ನಟಿಸಿದ್ದ "ಮಹಾನ್', ವಿಷ್ಣು ವಿಶಾಲ್ ಅಭಿನಯದ "ಎಫ್ಐಆರ್' ಸೇರಿ ಐದಾರು ಚಿತ್ರಗಳು, ತೆಲುಗಿನಲ್ಲಿ ರವಿತೇಜ ನಟಿಸಿದ್ದ "ಖಿಲಾಡಿ', ಸಿದ್ದು ಅಭಿನಯದ "ಡಿಜೆ ಟಿಲ್ಲು', & ಮಲಯಾಳಂನಲ್ಲಿ "ಅರ್ಚನಾ 31 ನಾಟ್ಔಟ್', "ಫ್ರೀಡಂ ಫೈಟ್', ಮೋಹನ್ ಲಾಲ್ ನಟಿಸಿದ್ದ "ಆರಾಟ್ಟು' ರಿಲೀಸ್ ಆಗಿದ್ದವು. ಕನ್ನಡದಲ್ಲೂ ಅರ್ಜುನ್ ಸರ್ಜಾ ನಟಿಸಿದ್ದ "ಒಪ್ಪಂದ', "ಫೋರ್ ವಾಲ್ಸ್', "ರೌಡಿ ಬೇಬಿ' ಸೇರಿ ನಾಲ್ಕೈದು ಸಿನಿಮಾಗಳು ಬಿಡುಗಡೆಯಾಗಿದ್ದವು. ಅದೆಲ್ಲದರ ನಡುವೆಯೂ "ಲವ್ ಮಾಕ್ಟೇಲ್ 2' ಉತ್ತಮ ಕಲೆಕ್ಷನ್ ಮಾಡಿಕೊಂಡಿತ್ತು.
ಕಾನೂನು ರೀತಿ ಉತ್ತರ
ಇನ್ನು "ಲವ್ ಮಾಕ್ಟೇಲ್ 3' ಚಿತ್ರಕ್ಕೂ ನಾನು ಕೆಲ ವರ್ಷಗಳ ಹಿಂದೆ ಡಾರ್ಲಿಂಗ್ ಕೃಷ್ಣಗೆ ಹೇಳಿದ್ದ ಕಥೆಗೂ ಹೋಲಿಕೆಯಿದೆ ಎಂದು "ಮಾರಿಗೋಲ್ಡ್' ನಿರ್ದೇಶಕ ರಾವೇಂದ್ರ ನಾಯಕ್ ಆರೋಪಿಸಿದ್ದು, ಆ ಬಗ್ಗೆ ಕೃಷ್ಣ, ""ಲವ್ ಮಾಕ್ಟೇಲ್' ಒಂದು ಸರಣಿ. ಮಧ್ಯದಲ್ಲಿ ಬೇರೆಯವರ ಕಥೆ ಕದಿಯಲು ಹೇಗೆ ಸಾಧ್ಯ? ಎಲ್ಲ ಆರೋಪಗಳಿಗೂ ನಾನು ಕಾನೂನು ರೀತಿ ಮಾತನಾಡುವೆ' ಎನ್ನುತ್ತಾರೆ.