ಶೂಟೌಟ್ ಕರಾಳತನಕ್ಕೆ ಅಮೆರಿಕ ಮತ್ತೊಮ್ಮೆ ಬೆಚ್ಚಿಬಿದ್ದಿದೆ. ಟೆಕ್ಸಾಸ್ನ ಉವಾಲ್ಡೆಯ ರಾಬ್ ಪ್ರಾಥಮಿಕ ಶಾಲೆ ಈ ದುರಂತಕ್ಕೆ ಸಾಕ್ಷಿಯಾಗಿದೆ. 18 ವರ್ಷದ ವಿದ್ಯಾರ್ಥಿ ಸಾಲ್ವಾಡೋರ್ ರೈಮಸ್ ಎಂಬಾತ ನಡೆಸಿದ ಅಪ್ರಚೋದಿತ ಗುಂಡಿನ ದಾಳಿಗೆ ಬಾಳಿ ಬದುಕಬೇಕಾದ ಮಕ್ಕಳು ಬಲಿಯಾಗಿದ್ದಾರೆ. ದಾಳಿಕೋರ ಸಮೀಪದ ಹೈಸ್ಕೂಲಿನ ವಿದ್ಯಾರ್ಥಿ ಎಂದು ತಿಳಿದುಬಂದಿದೆ. ಘಟನೆಯಲ್ಲಿ 19 ಜನ ವಿದ್ಯಾರ್ಥಿಗಳು ಮತ್ತು ಇಬ್ಬರು ಶಿಕ್ಷಕರು ಸೇರಿ 21 ಜನರು ಮೃತಪಟ್ಟಿದ್ದಾರೆ. ಅಲ್ಲದೆ, 13ಕ್ಕೂ ಹೆಚ್ಚು ವಿದ್ಯಾರ್ಥಿಗಳು, ಶಾಲೆಯ ಕೆಲ ಸಿಬ್ಬಂದಿ ಮತ್ತು ಪೊಲೀಸರೂ ಗಾಯಗೊಂಡಿದ್ದು, ಅವರನ್ನು ಸಮೀಪದ ಉವಾಲ್ಡೆ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಟೆಕ್ಸಾಸ್ ಗವರ್ನರ್ ಗ್ರೆಗ್ ಅಬಾಟ್ ತಿಳಿಸಿದ್ದಾರೆ. ಶಾಲೆಗೆ ತೆರಳುವ ಮುನ್ನ ಮನೆಯಲ್ಲಿ ಅಜ್ಜಿಯ ಮೇಲೂ ವಿದ್ಯಾರ್ಥಿ ಗುಂಡಿನ ದಾಳಿ ನಡೆಸಿದ್ದಾನೆ. ಗಂಭೀರವಾಗಿ ಗಾಯಗೊಂಡಿರುವ ವೃದ್ಧೆಯನ್ನು ಏರ್ಲಿಫ್ಟ್ ಮಾಡಿ, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪೊಲೀಸರು ದಾಳಿಕೋರರನ್ನು ಹತ್ಯೆ ಮಾಡಿದ್ದಾರಾದರೂ, ಮಕ್ಕಳನ್ನು ಕಳೆದುಕೊಂಡ ಪಾಲಕರ ಆಕ್ರಂದನ ಮುಗಿಲುಮುಟ್ಟಿತ್ತು. 2012ರಲ್ಲಿ ಕನೆಕ್ವಿಕಟ್ನ ನ್ಯೂಟೌನ್ ಪ್ರಾಥಮಿಕ ಶಾಲೆಯಲ್ಲಿ ನಡೆದಿದ್ದ ದಾಳಿ ನಂತರ ಎಲಿಮೆಂಟ್ರಿ ಶಾಲೆಯೊಂದರಲ್ಲಿ ನಡೆದ ಭೀಕರ ದಾಳಿ ಇದಾಗಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. 2012 ಡಿಸೆಂಬರ್ 14ರಂದು 20 ವರ್ಷದ ಯುವಕ ಎಡಮ್ ಲಾಂಜಾ ನ್ಯೂಟೌನ್ ಶಾಲೆಯಲ್ಲಿ ನಡೆಸಿದ ಭೀಕರ ಗುಂಡಿನ ದಾಳಿಗೆ 26 ಜನ ಮೃತಪಟ್ಟಿದ್ದರು. ಈ ಪೈಕಿ 20 ವಿದ್ಯಾರ್ಥಿಗಳು ಮತ್ತು ಆರು ಜನ ಶಿಕ್ಷಕರಿದ್ದರು. ಮನೆಯಲ್ಲಿ ತನ್ನ ತಾಯಿಯನ್ನು ಹತ್ಯೆಗೈದ ಬಳಿಕ ಎಡಮ್ ಶಾಲೆಗೆ ನುಗ್ಗಿ, ಈ ಕೃತ್ಯ ಎಸಗಿದ್ದ.
ಜಾಗೃತಿಯ ಅಗತ್ಯವೂ ಇದೆ: ಸಾಮಾಜಿಕ ಹಾಗೂ ಮನೋವಿಜ್ಞಾನಿಗಳ ಪ್ರಕಾರ, ಗುಂಡಿನ ದಾಳಿ ಪ್ರಕರಣಗಳಿಗೆ ಕಡಿವಾಣ ಹಾಕದಿದ್ದರೆ ಅಶಾಂತಿಗೆ ಕಾರಣವಾಗುತ್ತದೆ. ಈ ಹಿನ್ನೆಲೆಯಲ್ಲಿ ಮಕ್ಕಳು, ಹದಿಹರೆಯದವರು, ಯುವಕ-ಯುವತಿಯರಲ್ಲಿ ಅರಿವು ಮೂಡಿಸುವ ಅಗತ್ಯವಿದೆ. ಇದಕ್ಕಾಗಿ, ಶಾಲೆ-ಕಾಲೇಜುಗಳಲ್ಲಿಯೇ ಕೌನ್ಸೆಲಿಂಗ್ ಕೇಂದ್ರ ತೆರೆಯುವುದು, ಹಿಂಸೆ ವಿರೋಧಿ ಮನೋಭಾವ ಬೆಳೆಸುವುದು, ಉತ್ತಮ ಹವ್ಯಾಸಗಳನ್ನು ಮೈಗೂಡಿಸಿ ಕೊಳ್ಳಲು ಮನ ಓಲೈಸುವುದು ಸೇರಿದಂತೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕು. ಅಲ್ಲದೆ, ನಿರುದ್ಯೋಗಿಗಳು ಹಿಂಸೆಗೆ ತೊಡಗುವಂಥ ಘಟನೆಗಳು ಹೆಚ್ಚುತ್ತಿದ್ದು, ನಿರುದ್ಯೋಗಿಗಳಿ ಗಾಗಿ ಸಾಮಾಜಿಕ ಕಲ್ಯಾಣ ಕಾರ್ಯಕ್ರಮ ರೂಪಿಸುವುದು ಅಗತ್ಯ ಎನ್ನುತ್ತಾರೆ.
ಹೆಚ್ಚುತ್ತಲೇ ಇವೆ ಘಟನೆಗಳು: 2022ರ ಮೊದಲ ಆರು ತಿಂಗಳಲ್ಲೇ ಅಮೆರಿಕದ 27 ಶಾಲೆ ಗಳಲ್ಲಿ ಗುಂಡಿನ ದಾಳಿ ನಡೆದಿವೆ. ದೇಶಾದ್ಯಂತ ಇದೇ ಅವಧಿಯಲ್ಲಿ 200ಕ್ಕೂ ಹೆಚ್ಚು ಗುಂಡಿನ ದಾಳಿಯ ಘಟನೆಗಳು ಸಂಭವಿಸಿವೆ. ನ್ಯಾಶನಲ್ ಗನ್ ವೈಲೆನ್ಸ್ ಮೆಮೊರಿಯಲ್ನ ಅಂಕಿಅಂಶದ ಪ್ರಕಾರ, 2021ರಲ್ಲಿ ಅಮೆರಿಕದಲ್ಲಿ ಗುಂಡಿನ ದಾಳಿಯ 693, 2020ರಲ್ಲಿ 611, 2019ರಲ್ಲಿ 417 ಘಟನೆಗಳು ಸಂಭವಿಸಿವೆ. ಅಂದರೆ, ವರ್ಷದಿಂದ ವರ್ಷಕ್ಕೆ ಶೂಟೌಟ್ ಪ್ರಕರಣಗಳು ಹೆಚ್ಚುತ್ತಿರುವುದಕ್ಕೆ ಈ ಅಂಕಿಸಂಖ್ಯೆಗಳು ಸಾಕ್ಷಿಯಾಗಿವೆ.
ವಿಡಿಯೋ ಗೇಮ್ಗಳ ಹಾವಳಿ: ಈ ಬಗೆಯ ಮಾರಕ ಗುಂಡಿನ ದಾಳಿಯ ಹಿಂದೆ ಹಿಂಸೆಗೆ ಪ್ರಚೋದಿಸುವ ವಿಡಿಯೋ ಗೇಮ್ಳು ಪ್ರಮುಖ ಕಾರಣ ಎನ್ನುತ್ತಾರೆ ತಜ್ಞರು. ಬಂದೂಕು ಹಿಂಸೆಯ ವಿಡಿಯೋ ಗೇಮ್ ನೋಡಿರುವ ಅಥವಾ ಆಡಿರುವ ಮಕ್ಕಳ ಪೈಕಿ ಶೇಕಡ 60 ಮಕ್ಕಳು ಕೂಡಲೇ ಗನ್ ಹೊಂದಲು ಬಯಸುತ್ತಾರೆ ಎಂದು ಅಧ್ಯಯನ ವರದಿಯೊಂದು ಹೇಳಿದೆ. ‘ಹಿಂಸಾತ್ಮಕ ವಿಡಿಯೋ ಗೇಮ್ಳು ಮತ್ತು ದ್ವೇಷದ ಭಾವನೆಯೇ ಶೂಟೌಟ್ಗಳಿಗೆ ಕಾರಣವಾಗುತ್ತಿವೆ’ ಎಂದು 2019ರಲ್ಲಿ ಅಮೆರಿಕದ ಆಗಿನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೂಡ ಹೇಳಿದ್ದರು. ಅಮೆರಿಕದಲ್ಲಿ ಶೇಕಡ 90 ಮಕ್ಕಳು ವಿಡಿಯೋ ಗೇಮ್ ಆಡುತ್ತಾರೆ. ಈ ಪೈಕಿ ಬಾಲಕರ ಪ್ರಮಾಣ ಶೇ.99 ಆಗಿದ್ದರೆ ಬಾಲಕಿಯರ ಪ್ರಮಾಣ ಶೇ.94. ಹಿಂಸೆಯ ವಿಡಿಯೋ ಗೇಮ್ಳನ್ನು ಆಡಿದ ಬಳಿಕ ಮಕ್ಕಳಲ್ಲಿ ಗನ್ಗಳನ್ನು ಹೊಂದುವ, ಟ್ರಿಗರ್ ಅದುಮುವ ಇಚ್ಛೆ ಬಲಗೊಳ್ಳುತ್ತದೆ. ಗನ್ ಪಡೆದುಕೊಂಡ ಮಕ್ಕಳು ಸಣ್ಣಪುಟ್ಟ ಚಿಂತೆಗಳಿಗೆ ಅಥವಾ ಕೆಲವೊಮ್ಮೆ ಮನೆಯಲ್ಲಿನ ವಾತಾವರಣಕ್ಕೆ ರೋಸಿಹೋಗಿ ಗುಂಡಿನ ದಾಳಿಯಂಥ ಕೃತ್ಯಗಳಿಗೆ ಕೈಹಾಕುತ್ತಾರೆ. 2018ರಲ್ಲಿ ಫ್ಲೋರಿಡಾ ಹೈಸ್ಕೂಲ್ನಲ್ಲಿ ಶೂಟೌಟ್ ಮಾಡಿ 17 ಜನರ ಸಾವಿಗೆ ಕಾರಣನಾದ ನಿಕೊಲಸ್ ಕ್ರೂಜ್ ದಿನಕ್ಕೆ 15 ಗಂಟೆ ಹಿಂಸಾತ್ಮಕ ವಿಡಿಯೋ ಗೇಮ್ ಆಡುತ್ತಿದ್ದ. ಕೆಲವು ಘಟನೆಗಳಿಗೆ ಖಿನ್ನತೆ, ಅತಿಯಾದ ಚಿಂತೆಯೂ ಕಾರಣವಾಗಿವೆ.