ಹುಬ್ಬಳ್ಳಿ: ಚೌಕಾಬಾರ ಮೊಬೈಲ್ ಗೇಮ್ ಆಡುವ ವಿಚಾರಕ್ಕೆ ಜಗಳ ಉಂಟಾಗಿ ಯುವಕನೊಬ್ಬನಿಗೆ ಮತ್ತೊಬ್ಬ ಚಾಕುವಿನಿಂದ ಇರಿದು ಗಾಯಪಡಿಸಿದ ಗಟನೆ ಇಲ್ಲಿನ ಯಲ್ಲಾಪೂರ ಓಣಿಯ ತತ್ತಿಪೂರಿ ಚಾಳದಲ್ಲಿ ಸೋಮವಾರ ನಡೆದಿದೆ.
ತತ್ತಿಪೂರಿ ಚಾಳದ ಸಾಹಿಲ್ ಮಹ್ಮದರಫೀಕ್ ನದಾ ಚಾಕು ಇರಿತಕ್ಕೀಡಾದವ. ಯಲ್ಲಾಪೂರ ಓಣಿ ಗೌಸಕಾ ಮಾಮು ದರ್ಗಾ ಬಳಿಯ ನಿವಾಸಿ ಅಪ್ತಾಭ ಯಲಿಗಾರ ಹಲ್ಲೆ ನಡೆಸಿದ ಆರೋಪಿ.
ಅಪ್ತಾಭ ತನ್ನ ಗೆಳೆಯ ಹುಸೇನ್ ಜತೆ ಮೊಬೈಲ್ನಲ್ಲಿ ಚೌಕಾಬಾರ ಗೇಮ್ ಆಡುತ್ತಿದ್ದ. ಈ ವೇಳೆ ಅಲ್ಲಿಗೆ ಬಂದ ಸಾಹಿಲ್ ಆಟ ನೋಡುತ್ತ ನಿಂತಿದ್ದ. ನಂತರ ಹೀಗೆ ಆಟವಾಡು ಎಂದು ಹುಸೇನ್ಗೆ ಹೇಳಿ ಕೊಡುತ್ತಿದ್ದ. ಇಷ್ಟಕ್ಕೆ ಆಕ್ರೋಶಗೊಂಡ ಅಪ್ತಾಭ, "ನಿಂಗ್ಯಾಕ ಬೇಕಲೇ ಮಗನಾ, ಸುಮ್ಮನ ಮನಿಗೆ ಹೋಗು' ಎಂದು ಸಾಹಿಲ್ಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದ. ಕೊಲೆ ಮಾಡುವ ಉದ್ದೇಶದಿಂದ ಚಾಕುವಿನಿಂದ ಎಡಗೈ ಭುಜದ ಬಳಿ ಹಾಗೂ ತಲೆಯ ಎಡಭಾಗಕ್ಕೆ ಚುಚ್ಚಿದ್ದ. ಕೈಮುಷ್ಠಿ ಮಾಡಿಕೊಂಡು ಹಲ್ಲೆ ನಡೆಸಿ, ಜೀವ ಬೆದರಿಕೆ ಹಾಕಿ ಪರಾರಿಯಾಗಿದ್ದಾನೆ. ಈ ಕುರಿತು ಗಂಟಿಕೇರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.