ಬಾಯಿ ಕ್ಯಾನ್ಸರ್ ಲಕ್ಷಣಗಳೇನು, ಬರದಂತೆ ತಡೆಯುವುದು ಹೇಗೆ?

ಹಾಗಾದರೆ ಯಾವಾಗ ನಾವು ದಂತ ವೈದ್ಯರನ್ನು ಕಾಣಬೇಕು?

• ಬಾಯಿ ದೊಡ್ಡದಾಗಿ ತೆಗೆಯಲು ತೊಂದರೆಯಾದರೆ.
• ಊಟ ಮಾಡುವಾಗ ಬಾಯಿಯಲ್ಲಿ ಉರಿಯಾದರೆ.
• ತುಟಿಯ ಮೇಲೆ ಅಥವಾ ಬಾಯಿಯ ಯಾವುದೇ ಭಾಗದಲ್ಲಿ ಯಾವುದೇ ರೀತಿಯ ಹುಣ್ಣಾಗಿ ಅದು 2ರಿಂದ 3 ವಾರಗಳಲ್ಲಿ ಗುಣವಾಗದಿದ್ದರೆ.
• ಬಾಯಿಯ ಒಳಗೆ ಅಥವಾ ಬಾಯಿಯ ಸುತ್ತ ಕುತ್ತಿಗೆಯ ಭಾಗದಲ್ಲಿ ಗಡ್ಡೆಯಂತಹ ಬೆಳವಣಿಗೆಯನ್ನು ಕಂಡರೆ.
• ಬಾಯಿ ಅಥವಾ ಕಿವಿನೋವು ಪದೇಪದೇ ಬಾಧಿಸುತ್ತಿದ್ದರೆ.
• ಊಟವನ್ನು ನುಂಗುವಾಗ ಹೆಚ್ಚಿನ ಪ್ರಮಾಣದಲ್ಲಿ ನೋವು ಉಂಟಾಗುತ್ತಿದ್ದರೆ.
• ಬಾಯಿ ಅಥವಾ ತುಟಿಯಲ್ಲಿ ಜೋಮು ಹಿಡಿದಂತಾದರೆ.

ಯಾವುದೇ ಜೀವಕೋಶ ಅನಿಯಂತ್ರಿತವಾಗಿ ಬೆಳೆದಾಗ ಮತ್ತು ವಿಭಜನೆಗೊಂಡಾಗ ಅಥವಾ ಹಳೆಯ ಜೀವಕೋಶಗಳು ಸಾಯದೆ ನಿಯಂತ್ರಣದಿಂದ ಹೊರಬಂದು ಹೊಸ ಅಥವಾ ಅಸಹಜ ಜೀವಕೋಶಗಳನ್ನು ರೂಪಿಸುತ್ತವೆ. ಹೆಚ್ಚುವರಿ ಜೀವಕೋಶಗಳು ಸಮೂಹವಾಗಿ ಮಾರ್ಪಟ್ಟು ಗಡ್ಡೆಯಾಗುತ್ತದೆ. ಯಾವುದೇ ರೀತಿಯಲ್ಲಿ ತಂಬಾಕು ಸೇವನೆ, ಮದ್ಯಪಾನ ಬಾಯಿಯ ಕ್ಯಾನ್ಸರ್​ನ ಅತಿ ದೊಡ್ಡ ಕಾರಣ. ಇವು ಸೆಲ್ಯುಲರ್ ಡಿಎನ್​ಎಗೆ ಹಾನಿ ಉಂಟುಮಾಡುವ ಮೂಲಕ ಕ್ಯಾನ್ಸರ್​ಗೆ ಕಾರಣವಾಗುತ್ತವೆ. ತಂಬಾಕು ಮತ್ತು ಮದ್ಯ ಇವೆರಡನ್ನೂ ಬಳಸುವವರಲ್ಲಿ ಬಾಯಿಯ ಕ್ಯಾನ್ಸರ್ ಉಂಟಾಗುವ ಅಪಾಯವು ಬಳಸದೇ ಇರುವವರಿಗಿಂತ ಹೆಚ್ಚಿರುತ್ತದೆ. ಹ್ಯೂಮನ್ ಪ್ಯಾಪಿಲೋಮಾ ವೈರಸ್, ಕುಂದಿದ ರೋಗನಿರೋಧಕ ಶಕ್ತಿ, ಕುಪೋಷಣೆ ಕೂಡ ಕೆಲವು ಸಲ ಕ್ಯಾನ್ಸರ್​ಗೆ ಕಾರಣವಾಗಬಹುದು. ತಂಬಾಕು ಉತ್ಪನ್ನಗಳಿಂದ ದೂರವಿರುವುದು, ಆಲ್ಕೋಹಾಲ್ ಬಳಕೆಯನ್ನು ಸೀಮಿತಗೊಳಿಸುವುದು ಮತ್ತು ಅತಿಯಾಗಿ ಪಾನ್ ಜಗಿಯುವುದನ್ನು ತಪ್ಪಿಸುವ ಮೂಲಕ ಬಾಯಿಯ ಕ್ಯಾನ್ಸರನ್ನು ತಡೆಯಬಹುದು.

ದಂತವೈದ್ಯರು ಆರಂಭಿಕ ಹಂತದಲ್ಲಿ ಬಯಾಪ್ಸಿ ಮೂಲಕ ರೋಗನಿರ್ಣಯ ಮಾಡಬಹುದು, ಅಂಗಾಂಶವು ಕ್ಯಾನ್ಸರ್ ಎಂದು ದೃಢಪಡಿಸಿದ ನಂತರ ಸಿ.ಟಿ., ಎಂಆರ್​ಐ, ಪೆಟ್​ನಂತಹ ಪರೀಕ್ಷೆಗಳನ್ನು ಸೂಚಿಸುತ್ತಾರೆ. ಬಾಯಿಯ ಕ್ಯಾನ್ಸರ್​ಗೆ ಸಾಮಾನ್ಯವಾಗಿ ಇತರ ಕ್ಯಾನ್ಸರ್​ನಂತೆ ಶಸ್ತ್ರಚಿಕಿತ್ಸೆಯ ಮೂಲಕ ಅಥವಾ ಶಸ್ತ್ರಚಿಕಿತ್ಸೆ, ವಿಕಿರಣ ಮತ್ತು ಕಿಮೋಥೆರಪಿಯ ಸಂಯೋಜನೆಯ ಮೂಲಕ ಚಿಕಿತ್ಸೆಯನ್ನು ನೀಡಬಹುದು. ಚಿಕಿತ್ಸೆಯ ವಿಧವು ವ್ಯಕ್ತಿಯ ಸಾಮಾನ್ಯ ಆರೋಗ್ಯದ ಮೇಲೂ ಅವಲಂಬಿತವಾಗಿರುತ್ತದೆ.

ಬಾಯಿಯ ಕ್ಯಾನ್ಸರ್ ಮತ್ತು ಚಿಕಿತ್ಸೆ ಬಾಯಿಯ ಇತರ ಹಲ್ಲುಗಳಿಗೆ ಸಮಸ್ಯೆಯನ್ನುಂಟು ಮಾಡುತ್ತದೆ. ಚಿಕಿತ್ಸೆಯನ್ನು ಪ್ರಾರಂಭಿಸುವ ಮೊದಲು ಬಾಯಿಯ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಮುಖ್ಯವಾಗಿದೆ. ಅಲ್ಲದೆ ನಿಯಮಿತವಾಗಿ ದಂತವೈದ್ಯರ ಬಳಿ ಬಾಯಿಯನ್ನು ಪರೀಕ್ಷಿಸಿಕೊಳ್ಳುವುದರಿಂದ ಕ್ಯಾನ್ಸರ್​ನಂತಹ ಮಹಾಮಾರಿಯನ್ನು ಆರಂಭಿಕ ಹಂತದಲ್ಲೇ ಗುರುತಿಸಿ ದೈನಂದಿನ ಜೀವನಶೈಲಿಯಲ್ಲಿ ಬದಲಾವಣೆಗಳನ್ನು ಮಾಡಿ ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳಬಹುದು.