ಹುಬ್ಬಳ್ಳಿ: ಗಂಟಲ ಕ್ಯಾನ್ಸರ್ನಿಂದ ಬಳಲುತ್ತಿದ್ದ ಕೊಲ್ಹಾಪುರ ಮೂಲದ 46 ವರ್ಷದ ಮಹಿಳೆಗೆ ಹುಬ್ಬಳ್ಳಿಯ ಎಚ್ಸಿಜಿ ಎನ್ಎಂಆರ್ ಕ್ಯಾನ್ಸರ್ ಕೇಂದ್ರದ ವೈದ್ಯರು, ಉಚಿತ ಜೆಜುನಲ್ ಫ್ಲಾಪ್ನೊಂದಿಗೆ ಗಂಟಲಕುಳಿಯ ಭಾಗದಲ್ಲಿ ಅಪರೂಪದ ಮರು ನಿರ್ಮಾಣ ಶಸ್ತ್ರಚಿಕಿತ್ಸೆಯನ್ನು ಯಶಸ್ವಿಯಾಗಿ ನೆರವೇರಿಸಿದ್ದಾರೆ ಎಂದು ಎಚ್ಸಿಜಿ ಎನ್ಎಂಆರ್ ಕ್ಯಾನ್ಸರ್ ಆಸ್ಪತ್ರೆಯ ಕ್ಯಾನ್ಸರ್ ರೋಗದ ಶಸ್ತ್ರಚಿಕಿತ್ಸಕ ಡಾ. ರುದ್ರೇಶ ತಬಾಲಿ ಹೇಳಿದರು.
ನಗರದಲ್ಲಿ ಬುಧವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಮಹಿಳೆಯು ಆಹಾರವನ್ನು ನುಂಗಲೂ ಕಷ್ಟಪಡುತ್ತಿದ್ದರು. ಇಲ್ಲಿಗೆ ಆಗಮಿಸಿದ ಮೇಲೆ ಅವರಿಗೆ ಪ್ರಾಥಮಿಕ ಪರೀಕ್ಷೆ ಮಾಡಿದಾಗ ಹೈಪೋಫಾರ್ನೆಕ್ ಕಾರ್ಸಿನೋಮ ಇರುವುದು ಕಂಡುಬಂತು. ಬಳಿಕ ಅವರನ್ನು ಕಿಮೋ ರೆಡಿಯೋಥೆರಪಿಗೆ ಒಳಪಡಿಸಲಾಗಿತ್ತು. ಆ ನಂತರ ಸಿ.ಟಿ. ಸ್ಕ್ಯಾನ್ ಮಾಡಿ, ಟೋಟಲ್ ಲ್ಯಾರಿಂಗೋಫಾರಿಂಜೆಕ್ಟಮಿ ಶಸ್ತ್ರಚಿಕಿತ್ಸೆ ಮಾಡಲು ನಿರ್ಧರಿಸಲಾಯಿತು ಎಂದು ತಿಳಿಸಿದರು.
ಹಾನಿಗೊಳಗಾದ ಗಂಟಲಕುಳಿ ತೆಗೆದುಹಾಕಿ ತಾತ್ಕಾಲಿಕ ಧ್ವನಿ ಪೆಟ್ಟಿಗೆ ಅಳವಡಿಸಲಾಗಿದೆ. 20 ದಿನಗಳ ಹಿಂದೆ ಶಸ್ತ್ರ ಚಿಕಿತ್ಸೆ ನೆರವೇರಿಸಲಾಗಿದ್ದು, ಗುಣಮುಖರಾಗಿದ್ದಾರೆ. ಆರು ತಿಂಗಳ ನಂತರ ಈ ರೋಗಿಗೆ ಕೃತಕ ಧ್ವನಿಪೆಟ್ಟಿಗೆ ಅಳವಡಿಸಲಾಗುವುದು ಎಂದರು.
ಆಸ್ಪತ್ರೆಯ ಸಿಇಒ ಡಾ. ಜೈಕಿಶನ್, ಪ್ಲ್ಯಾಸ್ಟಿಕ್ ಶಸ್ತ್ರ ಚಿಕಿತ್ಸಕ ಡಾ. ಕಿಶೋರ ಬಳ್ಳಾರಿ, ಅರಿವಳಿಕೆ ತಜ್ಞೆ ಡಾ. ರಶ್ಮಿ ಸುದ್ದಿಗೋಷ್ಠಿಯಲ್ಲಿದ್ದರು.