ಕೋಲಾರ: ಕಳೆದ ಲೋಕಸಭಾ ಚುನಾವಣೆಯಲ್ಲಿ ಸೋತ ನಂತರ ಕೆ.ಎಚ್.ಮುನಿಯಪ್ಪ ಜಿಲ್ಲೆಯಲ್ಲಿ ಪಕ್ಷದ ಮೇಲಿನ ಹಿಡಿತ ಕಳೆದುಕೊಳ್ಳುತ್ತಿದ್ದು, ಮಾಜಿ ಸ್ಪೀಕರ್ ರಮೇಶ್ಕುಮಾರ್ ಬಣ ಸದೃಢವಾಗುತ್ತಿದೆ. ಮಾಜಿ ಶಾಸಕರಾದ ಚಿಂತಾಮಣಿಯ ಡಾ.ಎಂ.ಸಿ.ಸುಧಾಕರ್, ಮುಳಬಾಗಿಲಿನ ಕೊತ್ತೂರು ಮಂಜುನಾಥ್ ಮೂರು ದಿನದ ಹಿಂದೆ ಕಾಂಗ್ರೆಸ್ ಸೇರ್ಪಡೆಯಾದ ಮೇಲಂತೂ ಕುದಿದು ಹೋಗಿರುವ ಮುನಿಯಪ್ಪ ಮುಂದಿನ ದಿನಗಳಲ್ಲಿ ಯಾವ ತೀಮಾರ್ನ ತೆಗೆದುಕೊಳ್ಳುತ್ತಾರೆ ಎಂಬುದರತ್ತ ರಾಜಕೀಯ ಚಿತ್ತ ನೆಟ್ಟಿದೆ.
ಕಳೆದ ಬಾರಿ ಎಸ್.ಮುನಿಸ್ವಾಮಿ ಅವರನ್ನು ಬೆಂಬಲಿಸಿದ್ದ ಕೊತ್ತೂರು, ಸುಧಾಕರರೆಡ್ಡಿ ಪಕ್ಷ ಸೇರ್ಪಡೆ ವಿರುದ್ಧ ಸೆಟೆದು ನಿಂತಿರುವ ಕೆಎಚ್, ನಮ್ಮನ್ನು ರ್ನಿಲಕ್ಷಿಸಿದರೆ ನಮ್ಮ ದಾರಿ ನಮಗೆ ಎಂಬ ಸಂದೇಶವನ್ನು ಹೈಕಮಾಂಡ್ಗೆ ರವಾನಿಸಿದ್ದಾರೆ. "ರ್ನಿಲಕ್ಷ್ಯ'ವನ್ನು ತಿಂಗಳೊಳಗೆ ಸರಿಪಡಿಸಲು ಗಡುವು ವಿಧಿಸಿದ್ದಾರೆ. ಆದರೆ ಏಳು ಬಾರಿ ಸೋಲಿಲ್ಲದ ಸರದಾರ ಎಂದು ಗೆದ್ದು ಬೀಗಿದ್ದ ಮುನಿಯಪ್ಪ ಪರ ಹಾಲಿ ಶಾಸಕರು, ವಿಧಾನಪರಿಷತ್ ಸದಸ್ಯರು, ಜಿಪಂ, ತಾಪಂ ಸದಸ್ಯರೂ ಸೇರಿ ಬಹುತೇಕ ಜನಪ್ರತಿನಿಧಿಗಳು ನಿಲ್ಲದಿರುವಾಗ ಅವರ ಮಾತನ್ನು ಹೈಕಮಾಂಡ್ ಅಥವಾ ರಾಜ್ಯ ನಾಯಕತ್ವ ಪರಿಗಣಿಸುತ್ತದೆಯೇ ಎಂಬುದು ಪ್ರಶ್ನೆಯಾಗಿದೆ.
ಕಾಂಗ್ರೆಸ್ ಎಐಸಿಸಿ ಕಾರ್ಯಕಾರಿಣಿ ಕಾಯಂ ಸದಸ್ಯ, 2 ಬಾರಿ ಕೇಂದ್ರ ಸಚಿವ, 7 ಬಾರಿ ಸಂಸದರಾಗಿದ್ದ ದಲಿತ ಮುಖಂಡ ಕೆ.ಎಚ್.ಮುನಿಯಪ್ಪ ಅವರನ್ನು ಕಾಂಗ್ರೆಸ್ ಒಂದು ಬಾರಿ ಸೋತೊಡನೆ ಈ ಪರಿ ಕಡೆಗಣನೆ ಮಾಡುತ್ತದೆ ಎಂದರೆ ಅದಕ್ಕೆ ಬಲವಾದ ಕಾರಣಗಳಿವೆ. ಮಾಜಿ ಸ್ಪೀಕರ್ ರಮೇಶ್ಕುಮಾರ್ ಬಣವು ಮುನಿಯಪ್ಪ ಪಾತ್ರ ಪಕ್ಷ ಕಟ್ಟುವುದರಲ್ಲಿ ಏನಿದೆ ಎಂಬುದನ್ನು ಮನವರಿಕೆ ಮಾಡಿಕೊಡುವಲ್ಲಿ ಯಶಸ್ವಿಯಾಗಿರುವುದೇ ಅವರನ್ನು ಪಕ್ಷದಲ್ಲಿ ಮೂಲೆಗುಂಪು ಮಾಡುತ್ತಿರುವುದರ ಹಿಂದಿನ ರಹಸ್ಯ ಎನ್ನಲಾಗುತ್ತಿದೆ.
ತಮ್ಮ ಗೆಲುವಿಗೆ ತಂತ್ರಗಾರಿಕೆ ಮಾಡುತ್ತಿದ್ದ ಮುನಿಯಪ್ಪ, ಶಾಸಕರು, ವಿಧಾನಪರಿಷತ್ ಸದಸ್ಯರ ಚುನಾವಣೆಗಳಲ್ಲಿ ಅವರನ್ನು ಸೋಲಿಸಲು ಯತ್ನಿಸುತ್ತಿದ್ದರು. ಬಿಜೆಪಿ ಜಿಲ್ಲೆಯಲ್ಲಿ ತಲೆಯೆತ್ತಲು ಕೆ.ಎಚ್.ಮುನಿಯಪ್ಪ ಕಾರಣರಾಗಿದ್ದಾರೆ. ಈ ಹಿಂದೆ ಮಾಲೂರಿನಲ್ಲಿ 18 ವರ್ಷ ಕಾಂಗ್ರೆಸ್ ಜಿಲ್ಲಾಧ್ಯಕ್ಷರಾಗಿದ್ದ ಎ.ನಾಗರಾಜು ಅವರನ್ನು ಸೋಲಿಸಲು ಬಿಜೆಪಿಯ ಕೃಷ್ಣಯ್ಯಶೆಟ್ಟಿ ಅವರನ್ನು ಪರೋಕ್ಷವಾಗಿ ಬೆಂಬಲಿಸಿದರು. 2004ರಲ್ಲಿ ಬಂಗಾರಪೇಟೆಯಲ್ಲಿ ಎಂ.ನಾರಾಯಣಸ್ವಾಮಿಗೆ ಟಿಕೆಟ್ ತಪ್ಪಿಸಿ ರಾಮಚಂದ್ರಪ್ಪಗೆ ಕೊಡಿಸಿ ಪಕ್ಷದ ಸೋಲಿಗೆ ಕಾರಣರಾಗಿದ್ದರಲ್ಲದೆ, ಬಿಜೆಪಿಯ ವೆಂಕಟಮುನಿಯಪ್ಪ ಗೆಲುವಿಗೆ ಕಾರಣರಾದರು.
2008ರಲ್ಲಿ ಕೆಜಿಎಫ್ ಕ್ಷೇತ್ರದಲ್ಲಿ ಎನ್ಎಸ್ಯುಐನ ಶ್ರೀನಿವಾಸ್, 2013ರಲ್ಲಿ ಶಂಕರ್ಗೆ ಕಾಂಗ್ರೆಸ್ ಟಿಕೆಟ್ ಕೊಟ್ಟಿದ್ದು, ಪುತ್ರಿ ರೂಪಾ ಶಶಿಧರ್ಗೆ ಟಿಕೆಟ್ ಕೊಡಲಿಲ್ಲವೆಂದು ಬಿಜೆಪಿ ಸಂಪಂಗಿ ಗೆಲ್ಲಲು ಕಾರಣರಾದರು. ಜಿಲ್ಲೆಯಲ್ಲಿ ಕಾಂಗ್ರೆಸ್ಗೆ ಎದುರಾಳಿ ಜನತಾಪರಿವಾರವಾಗಿದ್ದು, ಬಿಜೆಪಿ ಪೋಷಿಸಿದರೆ ತ್ರಿಕೋನ ಸ್ಪರ್ಧೆ ಏರ್ಪಟ್ಟು ಗೆಲುವು ಸುಲಭ ಎಂದು ಭಾವಿಸಿ ಮುನಿಯಪ್ಪ ಈ ತಂತ್ರ ಅನುಸರಿಸಿದರು ಎಂಬುದನ್ನು ರಮೇಶ್ಕುಮಾರ್ ಬಣ ಹೈಕಮಾಂಡ್ಗೆ ಮನವರಿಕೆ ಮಾಡಿಸುವಲ್ಲಿ ಯಶಸ್ವಿಯಾಗಿದೆ.
3 ಕಡೆ ಪಕ್ಷ ಅಸ್ತಿತ್ವ ಕಳೆದುಕೊಂಡಿದ್ದೇಕೆ?: ಚಿಂತಾಮಣಿ, ಕೋಲಾರ, ಮುಳಬಾಗಿಲಿನಲ್ಲಿ ಪಕ್ಷ ಅಸ್ಥಿತ್ವ ಕಳೆದುಕೊಳ್ಳಲು ಕೆ.ಎಚ್.ಮುನಿಯಪ್ಪ ಕಾರಣ. ಮುಳಬಾಗಿಲಿನಲ್ಲಿ 2013ರಲ್ಲಿ ಕೆಎಚ್ ಟಿಕೆಟ್ ತಪ್ಪಿಸಿದ್ದರಿಂದ ಕೊತ್ತೂರು ಮಂಜುನಾಥ್ ಪಕ್ಷೇತರ ಅಭ್ಯರ್ಥಿಯಾಗಿ ಗೆದ್ದರು. 2018ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯೇ ಇರಲಿಲ್ಲ. ಈಗಲೂ ಕಾಂಗ್ರೆಸ್ ಶಾಸಕರಿಲ್ಲ. ಚಿಂತಾಮಣಿಯಲ್ಲಿ 2008 ಮತ್ತು 13ರಲ್ಲಿ ಡಾ.ಎಂ.ಸಿ.ಸುಧಾಕರ್ ಕಾಂಗ್ರೆಸ್ನಿಂದ ಗೆದ್ದಿದ್ದು ಬಿಟ್ಟರೆ ಮತ್ತೆ ಕಾಂಗ್ರೆಸ್ ಅಲ್ಲಿ ತಲೆ ಎತ್ತಿಲ್ಲ. ಕೋಲಾರದಲ್ಲಿ 2004ರಲ್ಲಿ ಶ್ರೀನಿವಾಸಗೌಡರು ಕಾಂಗ್ರೆಸ್ ಸೇರಿ ಗೆದ್ದಿದ್ದರಾದರೂ, ನಾನು ಯಾವ ಚಿಹ್ನೆ ಮೇಲೆ ಸ್ಪರ್ಧಿಸಿದರೂ ಗೆಲ್ಲುತ್ತೇನೆ ಎಂದಿದ್ದರು. ನಂತರ ಆರು ಚುನಾವಣೆಗಳಲ್ಲಿ ಕೋಲಾರದಲ್ಲಿ ಕೈಗೆ ಮತದಾರರು ಒಲವು ತೋರಲಿಲ್ಲ. ಹಾಗಾದರೆ ಈ ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಗೆಲ್ಲುವುದು ಬೇಡವೇ. ಕೆ.ಎಚ್ ಸಂಸದರಾಗಿದ್ದಾಗ ಈ ಕಡೆ ಪಕ್ಷ ಗೆಲ್ಲಿಸಲು ಏಕೆ ಯತ್ನಿಸಲಿಲ್ಲ ಎಂಬುದನ್ನು ಹೈಕಮಾಂಡ್ ಗಮನಕ್ಕೆ ತರಲಾಗಿದೆ ಎಂದು ವಿಶ್ವಸನೀಯ ಮೂಲಗಳಿಂದ ತಿಳಿದು ಬಂದಿದೆ.
ತ್ರಿಕೋನ ಸ್ಪರ್ಧೆಗಿಳಿದು ಬಿಜೆಪಿ ಬೆಳೆಸಿದರು: ಲೋಕಸಭಾ ಚುನಾವಣೆಯಲ್ಲಿ ಗೆಲುವು ಸಾಧಿಸಲು ಕೆ.ಎಚ್.ಮುನಿಯಪ್ಪ ಎಂಟೂ ಕ್ಷೇತ್ರಗಳಲ್ಲಿ ಪಕ್ಷದ ಗೆಲ್ಲುವ ಅಭ್ಯರ್ಥಿಗಳ ವಿರುದ್ಧ ಮತ್ತೊಂದು ಗುಂಪನ್ನು ಎತ್ತಿ ಕಟ್ಟಿ ಅದರಲ್ಲಿ ಯಾರಿಗಾದರೂ ಒಬ್ಬರಿಗೆ ಟಿಕೆಟ್ ಕೊಡಿಸುತ್ತಿದ್ದರು. ಅವರ ಪ್ರಭಾವ ದಿನೇದಿನೆ ಕುಸಿಯುತ್ತಿದ್ದುದರಿಂದ ಜನತಾ ಪರಿವಾರದ ಜತೆಗೆ ಬಿಜೆಪಿ ಬಲಿಷ್ಠವಾದರೆ ತ್ರಿಕೋನ ಸ್ಪರ್ಧೆ ಏರ್ಪಟ್ಟು ಗೆಲುವು ಸುಲಭ ಎಂದು ಭಾವಿಸಿದ್ದರು. ಆದರೆ ಅವರಿಂದ ತುಳಿತಕ್ಕೆ ಒಳಗಾದವರೆಲ್ಲ ಕಳೆದ ಲೋಕಸಭಾ ಚುನಾವಣೆಯಲ್ಲಿ ತಿರುಗಿಬಿದ್ದಿದ್ದರಿಂದ ಅವರು ಸೋಲುಣ್ಣಬೇಕಾಯಿತು ಎಂಬುದು ಘಟಬಂಧನ್ ನಾಯಕರ ಪ್ರಮುಖ ವಾದವಾಗಿದೆ. ಇದನ್ನು ರಾಜ್ಯ, ರಾಷ್ಟ್ರನಾಯಕರು ಗ್ರಹಿಸಿರುವುದರಿಂದ ಅವರನ್ನು ಮೂಲೆಗುಂಪು ಮಾಡಲಾಗುತ್ತಿದೆ ಎನ್ನಲಾಗುತ್ತಿದೆ.
ಕಟ್ಟಾ ಬೆಂಬಲಿಗರೂ ಬೆಂಬಲಿಸಲಿಲ್ಲ: ಕಾಂಗ್ರೆಸ್ ಕಟ್ಟಾಳುಗಳು, ಕೆ.ಎಚ್.ಮುನಿಯಪ್ಪ ಬೆಂಬಲಿಗರೆಂದೇ ಗುರುತಿಸಿಕೊಂಡಿದ್ದ ಮಾಲೂರು ಶಾಸಕ ಕೆ.ವೈ.ನಂಜೇಗೌಡ, ಬಂಗಾರಪೇಟೆಯ ಎಸ್.ಎನ್.ನಾರಾಯಣಸ್ವಾಮಿ, ಎಂಎಲ್ಸಿ ಅನಿಲ್ ಕುಮಾರ್, ನಸೀರ್ ಅಹ್ಮದ್, ಅಷ್ಟೇ ಏಕೆ ಕೆ.ಎಚ್.ಮುನಿಯಪ್ಪ ಪುತ್ರಿ ಕೆಜಿಎಫ್ ಶಾಸಕಿ ರೂಪಾ ಶಶಿಧರ್ ಸಹ ಪ್ರಸ್ತುತ ಅವರ ಬೆಂಬಲಕ್ಕೆ ನಿಂತಿಲ್ಲ. ಇದು ಮುನಿಯಪ್ಪ ಅವರ ಬೇಸರಕ್ಕೆ ಕಾರಣವಾಗಿದ್ದು, ತಂತ್ರ ಪ್ರತಿತಂತ್ರ ಹೆಣೆಯುವುದರಲ್ಲಿ ನಿಪುಣರಾಗಿರುವ ಕೆ.ಎಚ್.ಮುನಿಯಪ್ಪ ಜೆಡಿಎಸ್ ವರಿಷ್ಠ ದೇವೇಗೌಡರೊಂದಿಗೆ ಉತ್ತಮ ಬಾಂದವ್ಯ ಹೊಂದಿದ್ದು, ಒಂದು ವೇಳೆ ಕಾಂಗ್ರೆಸ್ ಹೈಕಮಾಂಡ್ ಕಡೆಗಣನೆ ಮುಂದುವರಿಸಿದರೆ ಜೆಡಿಎಸ್ನತ್ತ ಚಿತ್ತ ಹರಿಸಬಹುದು ಎಂಬ ಮಾತುಗಳೂ ಕೇಳಿ ಬರುತ್ತಿವೆ. ಕಾಂಗ್ರೆಸ್ ತಮ್ಮೆಲ್ಲ ವಿರೋಧಿಗಳನ್ನು ಸೋಲಿಸುವ ನಿಟ್ಟಿನಲ್ಲಿ ಅವರ ನಡೆ ಮತ್ತು ತಂತ್ರಗಾರಿಕೆ ಇರುತ್ತದೆ ಎಂದರೂ ಆಶ್ಚರ್ಯಪಡಬೇಕಾಗಿಲ್ಲ.