ರಾಂಚಿ: ಅಳಿವಿನಂಚಿನಲ್ಲಿರುವ ಹಾಗೂ ವಿಶ್ವದಲ್ಲೇ ಹೆಚ್ಚು ಕಳ್ಳಸಾಗಾಣೆಗೆ ಗುರಿಯಾಗುತ್ತಿರುವ ಪ್ಯಾಂಗೋಲಿನ್ ಸಸ್ತನಿಯನ್ನು ಲಾಕ್ಡೌನ್ ನಡುವೆಯೇ ಜಾರ್ಖಂಡ್ನ ರಂಗಛಡ್ ಗ್ರಾಮದಲ್ಲಿ ರಕ್ಷಿಸಲಾಗಿದೆ.
ಸಮೀಪದ ಮೈದಾನದಲ್ಲಿ ಅಡ್ಡಾಡುತ್ತಿದ್ದ ಪ್ಯಾಂಗೋಲಿನ್ ಕಂಡ ಗ್ರಾಮಸ್ಥರು ಅದನ್ನು ಹಿಡಿದಿದ್ದರು. ಬಳಿಕ ಈ ಬಗ್ಗೆ ಮಾಹಿತಿ ತಿಳಿದ ಸ್ಥಳೀಯ ಪೊಲೀಸ್ ಠಾಣೆಯ ಒಂದು ತಂಡ ಗ್ರಾಮಕ್ಕೆ ತೆರಳಿ ಸಸ್ತನಿಯನ್ನು ವಶಕ್ಕೆ ಪಡೆದಿದ್ದಾರೆ.
ಭಾರತೀಯ ಅರಣ್ಯಾಧಿಕಾರಿ ಸುಸಾಂತ್ ನಂದಾ ಅವರು ತಮ್ಮ ಟ್ವಿಟರ್ನಲ್ಲಿ ವಿಡಿಯೋ ಶೇರ್ ಮಾಡಿಕೊಂಡಿದ್ದು, ಅದರಲ್ಲಿ ಪ್ಯಾಂಗೋಲಿನ್ ತುಂಬಾ ಭಯಭೀತಗೊಂಡಿರುವಂತೆ ಕಾಣುತ್ತದೆ. ಅಲ್ಲದೆ, ಅದರ ಬಾಲವನ್ನು ಹಿಡಿದು ಆಡಿಸುವಾಗ ಅದನ್ನು ವಿಡಿಯೋ ಮಾಡುತ್ತಾ ಅದರ ಸುತ್ತ ಜನರು ನಿಂತಿರುವುದು ಟೀಕೆಗೆ ಗುರಿಯಾಗಿದೆ.
ಈ ಪ್ರಾಣಿ ತೀವ್ರವಾಗಿ ಒತ್ತಡಕ್ಕೆ ಸಿಲುಕಿದೆ. ಆದರೆ, ಅದನ್ನು ಸುರಕ್ಷಿತವಾಗಿ ತಲುಪಿಸುವ ಮುನ್ನ ಅದರ ವಿಡಿಯೋವನ್ನು ಮಾಡಲಾಗಿದೆ ಎಂದು ನಂದಾ ಅವರು ಟ್ವಿಟರ್ನಲ್ಲಿ ವಿಡಿಯೋ ಕುರಿತು ಬರೆದುಕೊಂಡಿದ್ದಾರೆ.
ಅಂದಹಾಗೆ ಪ್ಯಾಂಗೋಲಿನ್ ಏಫ್ರಿಕಾ ಮತ್ತು ಏಷ್ಯಾ ಭಾಗಗಳಲ್ಲಿ ಕಂಡುಬರುತ್ತದೆ. ಇದು ಹೆಚ್ಚು ಕಳ್ಳಸಾಗಾಣೆಯಾಗುವ ಜೀವಿ ಎಂದು ನಂಬಲಾಗಿದೆ. ಪ್ಯಾಂಗೋಲಿನ್ ಮೇಲಿನ ಚಿಪ್ಪಿನ ಹೊದಿಕೆಗಾಗಿ ಅದನ್ನು ಕದ್ದು ಸಾಗಾಟ ಮಾಡುತ್ತಾರೆ. ಚಿಪ್ಪನ್ನು ಸಾಂಪ್ರದಾಯಿಕ ಔಷಧಕ್ಕಾಗಿಯೂ ಮತ್ತು ಮಾಂಸಕ್ಕಾಗಿಯೂ ಬಳಸುತ್ತಾರೆ. (ಏಜೆನ್ಸೀಸ್)