ಚಿಕ್ಕಮಗಳೂರು: ಭಾರತೀಯ ಗುರುಕುಲ ಶಿಕ್ಷಣ ಪದ್ಧತಿಯನ್ನು ಇಡೀ ಜಗತ್ತು ನಿರೀಕ್ಷಿಸುತ್ತಿದ್ದು ಅದನ್ನು ಪೂರೈಸಲು ನಾವು ಸನ್ನದ್ಧರಾಗಬೇಕಿದೆ ಎಂದು ಆರ್ಎಸ್ಎಸ್ ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಹೇಳಿದರು.
ಕೊಪ್ಪ ತಾಲೂಕು ಹರಿಹರಪುರ ಚಿತ್ರಕೂಟದಲ್ಲಿರುವ ಪ್ರಬೋಧಿನಿ ಗುರುಕುಲಮ್ ಅರ್ಧಮಂಡಲೋತ್ಸವ ಮುಕ್ತಾಯ ಸಮಾರಂಭದಲ್ಲಿ ಭಾನುವಾರ ಸಮಾರೋಪ ಭಾಷಣ ಮಾಡಿ ಮಾತನಾಡಿದ ಅವರು, ಶಿಕ್ಷಣ ಹಾಗೂ ಜೀವನ ಪದ್ಧತಿ ವಿಚಾರದಲ್ಲಿ ವಿಶ್ವ ನಮ್ಮನ್ನು ಎದುರು ನೋಡುತ್ತಿದೆ. ಆದರೆ ನಾವು ವಿದೇಶಿಯರತ್ತ ದೃಷ್ಟಿ ನೆಟ್ಟಿದ್ದೇವೆ. ಅದರ ಅಗತ್ಯವೇನಿದೆ ಎಂದು ಪ್ರಶ್ನಿಸಿದ ಅವರು, ಮೊದಲು ನಮ್ಮ ಆಂತರ್ಯದೊಳಗೇನಿದೆ ಎಂಬುದನ್ನು ಗಮನಿಸಿ ಹೊರಗಿನಿಂದ ಬರುವ ವಿಚಾರಗಳು ಉತ್ತಮವಾಗಿದ್ದರೆ ಸ್ವೀಕರಿಸೋಣ. ಅಷ್ಟಕ್ಕೂ ನಮ್ಮ ಬಳಿ ಅಂತಹ ಸಾಕಷ್ಟು ಉತ್ತಮ ವಿಚಾರಗಳಿವೆ. ಅವುಗಳಲ್ಲಿ ಗುರುಕುಲ ಶಿಕ್ಷಣ ಪದ್ಧತಿ ಉತ್ತಮ ನಿದರ್ಶನ ಎಂದು ಹೇಳಿದರು.
ವೇದ ವಿದ್ವಾಂಸ ಅಮೆರಿಕದ ಡೇವಿಡ್ ಫ್ರಾಲಿ ಮಾತನಾಡಿ, ನಮ್ಮನ್ನು ನಾವು ಅರಿತುಕೊಳ್ಳಬೇಕು. ಹಲವರು ಹೊರಗಿನದನ್ನು ನೋಡುತ್ತಾರೆ. ನಮ್ಮನ್ನು ನಾವು ನೋಡಿಕೊಳ್ಳುವ ವಿಚಾರದಲ್ಲಿ ಜಾಗೃತರಾಗುತ್ತಿಲ್ಲ. ಪ್ರಪಂಚವೇ ಒಂದು ಮಾಯೆ. ಆದರೆ ನಮ್ಮ ನಡುವಿನ ಮಾಧ್ಯಮಗಳು ಮಾಯೆಯೊಳಗಿನ ಮಾಯೆ ಯಾಗಿವೆ. ಅದಕ್ಕೆ ಎಷ್ಟು ಪ್ರಾಮುಖ್ಯತೆ ಕೊಡಬೇಕೋ ಅಷ್ಟು ಪ್ರಾಮುಖ್ಯತೆ ಕೊಡಬೇಕು. ಇಂದು ನಾವು ಗಳಿಸುತ್ತಿರುವ, ಗ್ರಹಿಸುತ್ತಿರುವ ಎಲ್ಲ ಮಾಹಿತಿಗಳು ಎರಡನೇ ಹಂತದ್ದಾಗಿದೆ. ಈ ಹಿನ್ನೆಲೆಯಲ್ಲಿ ನೇರ ಮಾಹಿತಿಯನ್ನು ನೀಡಬಲ್ಲ ಯೋಗ, ವೇದಾಂತಗಳಿಗೆ ಪ್ರಾಮುಖ್ಯತೆ ಕೊಡಬೇಕಿದೆ ಎಂದರು.
ಅಧ್ಯಕ್ಷತೆ ವಹಿಸಿದ್ದ ಅರ್ಧಮಂಡಲೋತ್ಸವ ಸಮಿತಿ ಗೌರವಾಧ್ಯಕ್ಷ ಶೃಂಗೇರಿ ಶಾರದಾ ಪೀಠದ ಆಡಳಿತಾಧಿಕಾರಿ ಡಾ. ವಿ.ಆರ್.ಗೌರಿಶಂಕರ್ ಮಾತನಾಡಿದರು. ಸ್ವಾಗತ ಸಮಿತಿ ಕಾರ್ಯದರ್ಶಿ ಹರಿಪ್ರಕಾಶ ಕೋಣೆಮನೆ ಸ್ವಾಗತಿಸಿದರು. ಗುರುಕುಲದ ಸ್ಥಾಪನೆಯ ಮೂಲ ಚಿಂತಕ ಪ್ರೊ. ರಾಮಚಂದ್ರ ಭಟ್ ಕೋಟೆಮನೆ, ಅರ್ಧಮಂಡಲೋತ್ಸವ ಸಮಿತಿ ಕಾರ್ಯಾಧ್ಯಕ್ಷ ಎಚ್.ಬಿ.ರಾಜಗೋಪಾಲ್ ಇತರರಿದ್ದರು.
ನಮ್ಮ ಶಿಕ್ಷಣ ವ್ಯವಸ್ಥೆ ಸಮಾಜ ಆಶ್ರಿತವಾಗಿದ್ದು, ಶಾಶ್ವತ ಸನಾತನ ಸಂಸ್ಕೃತಿಯ ಆಧಾರದಲ್ಲಿ ಹಿಂದು ಜೀವನ ಮೌಲ್ಯಗಳನ್ನು ಪುನರುಜ್ಜೀವನಗೊಳಿಸಬೇಕಿದೆ. ಅದಕ್ಕೆ ಪೂರಕರಾದ ಕ್ಷಾತ್ರರನ್ನು ರೂಪುಗೊಳಿಸುವ ಶಿಕ್ಷಣವೇ ಗುರುಕುಲ ಪದ್ಧತಿ. ಈ ಪದ್ಧತಿ ಆರಂಭಿಸಿದವರು ವ್ಯಾಪಾರಿಗಳಲ್ಲ. ಹೀಗಿರುವಲ್ಲಿ ಅವರ ಯೋಗಕ್ಷೇಮ ನೋಡಿಕೊಳ್ಳುವ ಜವಾಬ್ದಾರಿ ಸಮಾಜದ್ದು. | ಡಾ. ಮೋಹನ್ ಭಾಗವತ್ ಆರ್ಎಸ್ಎಸ್ ಸರಸಂಘಚಾಲಕ