|ಬೇಲೂರು ಹರೀಶ ಬೆಂಗಳೂರು
ಏಡ್ಸ್ ರೋಗದ ಹೆಸರು ಕೇಳಿದರೇ ಜನರು ಬೆಚ್ಚುತ್ತಿದ್ದ ಕಾಲವೊಂದಿತ್ತು. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳ ಜಾಗೃತಿ ಕಾರ್ಯಕ್ರಮಗಳ ಹಿನ್ನೆಲೆಯಲ್ಲಿ ಎಚ್ಐವಿ ಪೀಡಿತರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಇಳಿಕೆಯಾಗುತ್ತಿದೆ. ಕಳೆದ ವರ್ಷ ದೇಶದ ಸೋಂಕಿತರ ಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದ್ದ ಕರ್ನಾಟಕ ಈ ವರ್ಷ 16ನೇ ಸ್ಥಾನಕ್ಕೆ (ಶೇ.0.22) ಇಳಿದಿದೆ. ನಾಗಾಲ್ಯಾಂಡ್ (ಶೇ.1.66) ಪ್ರಥಮ ಸ್ಥಾನದಲ್ಲಿದೆ.
ಮಿಜೋರಾಂನಲ್ಲಿ ಶೇ.0.91, ತ್ರಿಪುರದಲ್ಲಿ ಶೇ.0.63, ಮಣಿಪುರದಲ್ಲಿ ಶೇ.0.51, ಮೇಘಾಲಯದಲ್ಲಿ ಶೇ.0.45 ಹಾಗೂ ಗುಜರಾತ್ನಲ್ಲಿ ಶೇ.0.39 ಸೋಂಕಿತರಿದ್ದು, ಕ್ರಮವಾಗಿ 2, 3, 4, 5 ಮತ್ತು 6ನೇ ಸ್ಥಾನದಲ್ಲಿವೆ.
ಕರ್ನಾಟಕದಲ್ಲಿ ಸದ್ಯ 1,67, 872 ಸೋಂಕಿತರಿದ್ದಾರೆ. 2020-21ರ ಅಕ್ಟೋಬರ್ವರೆಗೆ 6,96,159 ಜನರನ್ನು ಎಚ್ಐವಿ ಪರೀಕ್ಷೆಗೆ ಒಳಪಡಿಸಿದ್ದು, 4,682 ಜನರಲ್ಲಿ ಸೋಂಕು ಪತ್ತೆಯಾಗಿದೆ. 6,36,665 ಗರ್ಭಿಣಿಯರು ಪರೀಕ್ಷೆಗೆ ಒಳಪಟ್ಟಿದ್ದು, 313 ಮಂದಿಗೆ ಎಚ್ಐವಿ ಸೋಂಕು ಪತ್ತೆಯಾಗಿದೆ. ಈವರೆಗೆ ಒಟ್ಟು 80,693 ಸೋಂಕಿತರು ಸಾವನ್ನಪ್ಪಿದ್ದಾರೆ.
ಸರ್ಕಾರೇತರ ಸಂಘ ಸಂಸ್ಥೆಗಳ ಸಹಯೋಗದಲ್ಲಿ ರಾಜ್ಯ ಏಡ್ಸ್ ನಿಯಂತ್ರಣ ಸಂಸ್ಥೆ(ಕೆಸಾಪ್ಸ್) ಎಚ್ಐವಿ ಸೋಂಕು ತಡೆಗಟ್ಟಲು ಜನರಿಗೆ ಅರಿವು ಹಾಗೂ ಸಾಮಾಜಿಕ ಸೌಲಭ್ಯ ಒದಗಿಸಲು ಹಲವು ಕಾರ್ಯಕ್ರಮ ರೂಪಿಸಿಕೊಂಡು ಬರುತ್ತಿದೆ. ಸೋಂಕಿತ ಸಮುದಾಯಕ್ಕೆ ಸರ್ಕಾರದ ಸೇವೆಗಳ ಸಂಪರ್ಕ ಕಲ್ಪಿಸುವ ನಿಟ್ಟಿನಲ್ಲಿ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ.
ಏಡ್ಸ್ ನಿಯಂತ್ರಣಕ್ಕಾಗಿ ವಿಶ್ವ ಆರೋಗ್ಯ ಸಂಸ್ಥೆ ಪ್ರತಿವರ್ಷ ಡಿ.1ರಂದು ವಿಶ್ವ ಏಡ್ಸ್ ದಿನ ಆಚರಿಸುತ್ತದೆ. ‘ಎಚ್ಐವಿ ಸೋಂಕಿನ ತಡೆಗಾಗಿ ಜಾಗತಿಕ ಒಗ್ಗಟ್ಟು, ಜವಾಬ್ದಾರಿಯ ಹಂಚಿಕೆ’ ಎಂಬುದು ಈ ಸಲದ ಘೋಷವಾಕ್ಯ.
5 ಜಿಲ್ಲೆಯಲ್ಲಿ ಹೆಚ್ಚು: ದೇವದಾಸಿ ಪದ್ಧತಿ ಇರುವ ರಾಜ್ಯದ ವಿಜಯಪುರ, ಬೆಳಗಾವಿ, ಬಾಗಲಕೋಟೆ, ಯಾದಗಿರಿ ಹಾಗೂ ರಾಯಚೂರು ಜಿಲ್ಲೆಗಳಲ್ಲಿ ಹೆಚ್ಚು ಎಚ್ಐವಿಸೋಂಕಿತರು ಪತ್ತೆಯಾಗುತ್ತಿದ್ದಾರೆ. ದಕ್ಷಿಣ ಭಾರತದಲ್ಲಿ ಎಚ್ಐವಿ ಸೋಂಕು ಹೆಚ್ಚಿರುವ 4 ರಾಜ್ಯಗಳಲ್ಲಿ ಕರ್ನಾಟಕವೂ ಒಂದು. ರಾಷ್ಟ್ರೀಯ ಏಡ್ಸ್ ನಿಯಂತ್ರಣ ಸಹಯೋಗದಲ್ಲಿ ರಾಜ್ಯವು 1998ರಿಂದ ಸಮೀಕ್ಷೆ ನಡೆಸುತ್ತಿದೆ. ಪ್ರಮುಖವಾಗಿ ಗರ್ಭಿಣಿಯರಲ್ಲಿ ಸೋಂಕು ಇಳಿಕೆಯಾಗಿದೆ. 14 ರಿಂದ 40 ವಯಸ್ಸಿನ ಜನರಲ್ಲಿ ಹೆಚ್ಚಿನ ಸೋಂಕು ಪತ್ತೆಯಾಗುತ್ತಿದೆ.
ಆರೈಕೆ ಕೇಂದ್ರಗಳು: ರಾಜ್ಯದಲ್ಲಿ ಒಟ್ಟು 3,335 ಆಪ್ತ ಸಮಾಲೋಚನಾ ಹಾಗೂ ಪರೀಕ್ಷಾ ಕೇಂದ್ರಗಳು ಕಾರ್ಯನಿವಹಿಸುತ್ತಿವೆ. 68 ಆಂಟಿ ರೆಟ್ರೋವೈರಲ್ ಥೆರಪಿ ಕೇಂದ್ರ ಹಾಗೂ 311 ಲಿಂಕ್ ಆಂಟಿ ರೆಟ್ರೋವೈರಲ್ ಥೆರಪಿ ಕೇಂದ್ರಗಳಿವೆ. ಈವರೆಗೆ 3,51,182 ಮಂದಿ ಆಂಟಿ ರೆಟ್ರೋವೈರಲ್ ಥೆರಪಿ ಕೇಂದ್ರಗಳಲ್ಲಿ ನೋಂದಾಯಿಸಿಕೊಂಡಿದ್ದಾರೆ.1,67,872 ಮಂದಿ ಎಆರ್ಟಿ ಔಷಧ ತೆಗೆದುಕೊಳ್ಳುತ್ತಿದ್ದಾರೆ.
ಸುರಕ್ಷಾ ಕ್ಲಿನಿಕ್: ರಾಜ್ಯದಲ್ಲಿ ಪ್ರಸ್ತುತ 54 ಡಿಎಸ್ಆರ್ಸಿ ಕ್ಲಿನಿಕ್ಗಳಿದ್ದು, ಜಿಲ್ಲಾ, ತಾಲೂಕು ಆಸ್ಪತ್ರೆಗಳು ಹಾಗೂ ವೈದ್ಯಕೀಯ ಕಾಲೇಜುಗಳಲ್ಲಿ ಕಾರ್ಯನಿರ್ವಹಿಸುತ್ತಿವೆ. ಈ ಕೇಂದ್ರಗಳಿಗೆ ‘ಸುರಕ್ಷಾ ಕ್ಲಿನಿಕ್’ ಎಂದು ಹೆಸರಿಡಲಾಗಿದೆ. ಈ ಕ್ಲಿನಿಕ್ಗಳಲ್ಲಿ ರೋಗಲಕ್ಷಣಗಳಿಗೆ ಅನುಗುಣವಾಗಿ ವಿವಿಧ ಏಳು ಬಣ್ಣಗಳ ಪ್ಯಾಕೆಟ್ಗಳಲ್ಲಿ ಎಸ್ಟಿಐ ಹಾಗೂ ಆರ್ಟಿಐ ಔಷಧಗಳನ್ನು ಉಚಿತವಾಗಿ ನೀಡಲಾಗುತ್ತಿದೆ.
ಕೇಂದ್ರದ ಯೋಜನೆ: ಎಚ್ಐವಿ/ಏಡ್ಸ್ ತಡೆಯಲು ಕೇಂದ್ರ ಸರ್ಕಾರ 1992ರಲ್ಲಿ ರಾಷ್ಟ್ರೀಯ ಏಡ್ಸ್ ನಿಯಂತ್ರಣ ಸಂಸ್ಥೆ (ನ್ಯಾಕೊ)ಯನ್ನು ಸ್ಥಾಪಿಸಿದೆ. ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದಡಿ ಕಾರ್ಯನಿರ್ವಹಿಸುವ ನ್ಯಾಕೊ, 35 ಸೊಸೈಟಿಗಳ ಮೂಲಕ ದೇಶಾದ್ಯಂತ ಸೇವೆ ಒದಗಿಸುತ್ತದೆ. ಜತೆಗೆ ಏಡ್ಸ್ ತಡೆ ಮತ್ತು ನಿಯಂತ್ರಣಕ್ಕೆ ನೀತಿ ನಿರೂಪಿಸಿ ಜಾರಿ ಮಾಡುವ ನೋಡಲ್ ಸಂಸ್ಥೆಯೂ ಇದಾಗಿದೆ.
ಸೋಂಕಿತರಿಗೆ ರಾಜ್ಯದ ಯೋಜನೆ
ನ್ಯಾಕೋ ಜಾಗೃತಿ ಹೇಗೆ
ರಾಜ್ಯದಲ್ಲಿ ಸೋಂಕಿತರು ಹಾಗೂ ಸಾವಿನ ಸಂಖ್ಯೆಯನ್ನು ಶೂನ್ಯಕ್ಕೆ ತರಲು ಪ್ರಯ್ನತಿಸಲಾಗುತ್ತಿದೆ. ಏಡ್ಸ್ನಿಂದ ಉಂಟಾಗುವ ಕಳಂಕ ಹಾಗೂ ತಾರತಮ್ಯ ನಿವಾರಿಸಲು ಸರ್ಕಾರ ನಿರಂತರವಾಗಿ ಕೆಲಸ ಮಾಡುತ್ತಿದೆ. | ಡಾ.ಸಂಜಯ್ ಬಿ.ಪಾಟೀಲ್ ಜಂಟಿ ನಿರ್ದೇಶಕರು ಕೆಸಾಪ್ಸ್