ರುದ್ರದೇವರ ವರದಿಂದ ಅವಧ್ಯನಾಗುವುದಲ್ಲದೇ ಅವರಿಂದ ಗದೆಯನ್ನು ಪಡೆದಿದ್ದ, ಅದನ್ನು ಬೀಸಿ ಒಗೆದರೆ ಅದು ಕೆಳಗೆ ಬಿತ್ತು. ಮತ್ತೆ ಅದನ್ನು ಉಪಯೋಗಿಸದೇ ಇದ್ದರೆ ಕೆಲಸ ಆಗುತ್ತಿತ್ತು. ಕೃಷ್ಣ ಹೇಳುತ್ತಾನೆ: ನಾನು ಸಾಯಬೇಕು ಎಂದು ಕೊಂಡು ಒಗೆದಿದ್ದಾನೆ. ಇನ್ನು ಏಕೆ ಜರಾಸಂಧನ ಹತ್ತಿರ ಹೋಗಬೇಕು ಎಂದುಕೊಂಡು ಗದಾ ನೇರವಾಗಿ ಕೈಲಾಸದಲ್ಲಿದ್ದ ರುದ್ರದೇವರ ಹತ್ತಿರ ಹೋಗಿ ಸೇರಿಕೊಂಡು ಬಿಟ್ಟಿದೆ. ಜರಾಸಂಧನಿಗೆ ಗದೆಯೂ ಹೋಯಿತು, ತಾಯಿಯೂ ಹೋದಳು ಎಂದು ಒದ್ದಾಡುತ್ತಿದ್ದಾನೆ.
ಆಗ ಜರಾಸಂಧ, ಬಾಣಾಸುರನ ಹತ್ತಿರ ಬಂದ ನೋಡು ಹೀಗೆ ಎಲ್ಲ ಮೋಸ ಮಾಡಿ ಕೃಷ್ಣ ನನ್ನನ್ನು ಎರಡನೆಯ ಸಲವೂ ಸೋಲಿಸಿಬಿಟ್ಟ, ಏನಾದರೂ ಮಾಡು ಎಂದ. ಅವನೂ ಮಹಾದುಷ್ಟನೇ, ‘ಚತುರಂಗ ಸೈನ್ಯವನ್ನು ಕೊಡುತ್ತೇನೆ, ಮಾಯಾವಿಗಳಾಗಿ ಯುದ್ಧ ಮಾಡುವಂತಹ ಭಾರಿ ದಾನವರನ್ನು ಕೊಡುತ್ತೇನೆ. ಮಾಯಾವಿಗಳು ಮಾಯಾ ಸೃಷ್ಟಿಯನ್ನು ಮಾಡುತ್ತಾರೆ. ಅಂಥವರು ಒಬ್ಬೊಬ್ಬರೇ ಸಾಕು. ಭಾರೀ ಯುದ್ಧ ಮಾಡತಕ್ಕಂಥ ಮೂನ್ನೂರು ಮಾಯಾವಿಗಳನ್ನು ಕೊಡುತ್ತೇನೆ ಸಾಕು ತೆಗೆದುಕೊಂಡು ಹೋಗು’ ಎಂದು ಹೇಳಿದ.