ನವದೆಹಲಿ: ಭಾರತದ ವಾಟ್ಸ್ಆ್ಯಪ್ ಬಳಕೆದಾರರಿಗೆ ಗುಡ್ ನ್ಯೂಸ್ ಕೇಳಿಬಂದಿದೆ. ಎರಡು ತಿಂಗಳ ಕಾಲಾವಾಕಾಶದ ನಂತರ ಸಾಮಾಜಿಕ ಸಂದೇಶ ರವಾನೆ ವೇದಿಕೆ (ಸೋಶಿಯಲ್ ಮೆಸೆಂಜಿಂಗ್ ಫ್ಲಾಟ್ಫಾರ್ಮ್) ವ್ಯಾಟ್ಸ್ಆ್ಯಪ್ ಭಾರತದಲ್ಲಿನ ಸ್ಟೇಟಸ್ ಅವಧಿಯ ಮಿತಿಯನ್ನು 15 ರಿಂದ ಮತ್ತೆ 30 ಸೆಕೆಂಡ್ಗಳಿಗೆ ಮರು ಏರಿಕೆ ಮಾಡಿದೆ. ಆಂಡ್ರಾಯ್ಡ್ ಆವೃತ್ತಿ 2.20.166 ಅಪ್ಡೇಟೆಡ್ ವರ್ಸನ್ನಲ್ಲಿ ಈ ಫೀಚರ್ ಲಭ್ಯವಾಗಲಿದೆ.
ಸ್ಟೇಟ್ ಫೀಚರ್ ಅನ್ನು 2017ರಲ್ಲಿ ವಾಟ್ಸ್ಆ್ಯಪ್ ಪರಿಚಯಿಸಿತು. ಈ ಹೊಸ ಫೀಚರ್ ಮೂಲಕ ಫೋಟೋ, ವಿಡಿಯೋಗಳು ಮತ್ತು ಜಿಐಎಫ್ (GIFs) ಫೈಲ್ಗಳನ್ನು ಅಪ್ಲೋಡ್ ಮಾಡಲು ಅವಕಾಶ ನೀಡಲಾಯಿತು. ಅಪ್ಲೋಡ್ ಮಾಡಿದ ಫೈಲ್ಗಳು 24 ಗಂಟೆಗಳ ನಂತರ ತನ್ನಷ್ಟಕ್ಕೆ ತಾನೇ ಮರೆಯಾಗುತ್ತವೆ. ಅಲ್ಲಿಯವರೆಗೆ ಬಳಕೆದಾರನ ಸಂಪರ್ಕದಲ್ಲಿರುವವರಿಗೆ ಸ್ಟೇಟಸ್ ಗೋಚರವಾಗುತ್ತದೆ.
ಫೀಚರ್ ಪರಿಚಯಿಸಿದ ಆರಂಭದಲ್ಲಿ ಮೂರು ನಿಮಿಷದ ವಿಡಿಯೋಗಳಿಗೆ 90 ಸೆಕೆಂಡ್ ಅವಧಿ ನೀಡಲಾಗಿತ್ತು. ಅಲ್ಲದೆ, ಅಪ್ಲೋಡ್ ಮಾಡುವ ಫೈಲ್ 16 ಎಂಬಿಗಿಂತ ಜಾಸ್ತಿ ಇದ್ದರೆ, ಅದನ್ನು ಎಡಿಟ್ ಮಾಡಿ ಸ್ಟೇಟಸ್ಗೆ ಕಳುಹಿಸುವ ಅವಕಾಶ ನೀಡಿತ್ತು. ಆ ಬಳಿಕ ಸ್ಟೇಟಸ್ ಅನ್ನು 30 ಸೆಕೆಂಡ್ಗೆ ಇಳಿಸಲಾಗಿತ್ತು.
ವಾಟ್ಸ್ಆ್ಯಪ್ನಲ್ಲಿ ಹರಿದಾಡುತ್ತಿದ್ದ ನಕಲಿ ಸುದ್ದಿಗಳನ್ನು ನಿಯಂತ್ರಣಕ್ಕೆ ತರಲು ಮತ್ತು ಸರ್ವರ್ ದಟ್ಟನೆಯನ್ನು ಕಡಿಮೆ ಮಾಡಲು ಫೀಚರ್ ಅವಧಿಯನ್ನು ಭಾರತದಲ್ಲಿ 30 ಸೆಕೆಂಡ್ನಿಂದ 15ಕ್ಕೆ ಕೆಲ ತಿಂಗಳುಗಳಿಂದ ಇಳಿಸಲಾಗಿತ್ತು. ಇದೀಗ ಮರಳಿ 30 ಸೆಕೆಂಡ್ಗೆ ಏರಿಸಲಾಗಿದೆ.
ವಾಬೇಟಾಇನ್ಫೋ ನೀಡಿರುವ ಮಾಹಿತಿಯ ಪ್ರಕಾರ ಆಂಡ್ರಾಯ್ಡ್ ಆವೃತ್ತಿ 2.20.166 ಅಪ್ಡೇಟೆಡ್ ವರ್ಸನ್ನಲ್ಲಿ ಈ ಫೀಚರ್ ಲಭ್ಯವಾಗಲಿದ್ದು, ನೀವು ಆದಷ್ಟು ಬೇಗೆ ಫೀಚರ್ ಪಡೆಯಬೇಕಾದರೆ ನಿಮ್ಮ ವಾಟ್ಸ್ಆ್ಯಪ್ಗಳನ್ನು ಆದಷ್ಟು ಬೇಗ ಅಪ್ಡೇಟ್ ಮಾಡಿಕೊಳ್ಳಲು ಸೂಚಿಸಿದೆ. (ಏಜೆನ್ಸೀಸ್)