ಜೈಪುರ: ಕರೊನಾ ಬಿಕ್ಕಟ್ಟಿನ ಮಧ್ಯೆ ರಾಜಸ್ಥಾನ ಸರ್ಕಾರವೂ ಅಸ್ಥಿರಗೊಂಡಿದೆ. ಡಿಸಿಎಂ ಸಚಿನ್ ಪೈಲಟ್ ಅವರು ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ವಿರುದ್ಧ ಬಂಡಾಯ ಎದ್ದು ತಮ್ಮ ಆಪ್ತ ಶಾಸಕರೊಟ್ಟಿಗೆ ದೆಹಲಿಗೆ ತೆರಳಿದ್ದಾರೆ.
ಈ ಮಧ್ಯೆ ಸಚಿನ್ ಪೈಲಟ್ ಅವರಿಗೆ ಜೈಪುರಕ್ಕೆ ಹಿಂತಿರುಗುವಂತೆ ಹೈಕಮಾಂಡ್ ಸೂಚನೆ ನೀಡಿದೆ ಎಂದು ಮೂಲಗಳು ತಿಳಿಸಿವೆ.
ಇದೀಗ ಸಚಿನ್ ಪೈಲಟ್ ಜತೆ ದೆಹಲಿಗೆ ತೆರಳಿದ್ದ ಮೂವರು ಶಾಸಕರು ಸುದ್ದಿಗೋಷ್ಠಿ ನಡೆಸಿದ್ದಲ್ಲದೆ, ಪೂರ್ತಿ ಉಲ್ಟಾ ಹೊಡೆದಿದ್ದಾರೆ.
ಸಚಿನ್ ಪೈಲಟ್ ಅವರ ಆಪ್ತರೆನಿಸಿಕೊಂಡು, ಅವರೊಂದಿಗೆ ದೆಹಲಿಗೆ ಹೋಗಿದ್ದ ಶಾಸಕರಾದ ರೋಹಿತ್ ಬೊಹ್ರಾ, ಚೇತನ್ ದುಡಿ ಮತ್ತು ದಿನೇಶ್ ಅಬ್ರಾರ್ ಅವರು ಇಂದು ಜೈಪುರದಲ್ಲಿರವ ಮುಖ್ಯಮಂತ್ರಿಗಳ ಕಚೇರಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ, ನಾವು ವೈಯಕ್ತಿಕ ಕಾರಣಕ್ಕಾಗಿ ದೆಹಲಿಗೆ ಹೋಗಿದ್ದೆವು ಹೊರತಾಗಿ ಬೇರೇನೂ ಇಲ್ಲ ಎಂದಿದ್ದಾರೆ.
ಬಂಡಾಯ ಎದ್ದು ಸಚಿನ್ ಪೈಲಟ್ ಜತೆ ಹೋಗಿದ್ದೇವೆ..ವಿವಾದ ಸೃಷ್ಟಿಸಿದ್ದೇವೆ ಎಂದು ಮಾಧ್ಯಮಗಳಲ್ಲಿ ವರದಿಯಾಗದರೆ ಅದು ನಮ್ಮ ತಪ್ಪಲ್ಲ ಎಂದೂ ಹೇಳಿದ್ದಾರೆ.
ನಾವು ಕಾಂಗ್ರೆಸ್ನ ಸೈನಿಕರು. ನಮ್ಮ ಕೊನೇ ಉಸಿರು ಇರುವವರೆಗೂ ಈ ಪಕ್ಷದಲ್ಲಿಯೇ ಇರುತ್ತೇವೆ. ಸಚಿನ್ ಪೈಲಟ್ ಅವರು ರಾಜಸ್ಥಾನದ ಕಾಂಗ್ರೆಸ್ ಅಧ್ಯಕ್ಷರು. ಅವರೊಂದಿಗೆ ನಮ್ಮ ಮಾತುಕತೆ, ಕೆಲವು ವಿಚಾರಗಳ ಬಗ್ಗೆ ಚರ್ಚೆ ಯಾವಾಗಲೂ ಇರುತ್ತದೆ ಎಂದು ಮೂವರು ಶಾಸಕರೂ ಹೇಳಿದ್ದಾರೆ.
ನಮ್ಮ ಸರ್ಕಾರವನ್ನು ಅಸ್ಥಿರಗೊಳಿಸಲು ಸಾಧ್ಯವಿಲ್ಲ. ನಾವೆಲ್ಲ ಕೊವಿಡ್-19 ವಿರುದ್ಧ ಹೋರಾಡುತ್ತಿದ್ದರೆ, ಬಿಜೆಪಿ ಅಧಿಕಾರಕ್ಕೋಸ್ಕರ ಮಸಲತ್ತು ಮಾಡುತ್ತಿದೆ ಎಂದು ಬಿಜೆಪಿ ವಿರುದ್ಧ ಹರಿಹಾಯ್ದಿದ್ದಾರೆ. (ಏಜೆನ್ಸೀಸ್)