ಲಖನೌ: ಕಾನ್ಪುರದಲ್ಲಿ ಉತ್ತರ ಪ್ರದೇಶ ಪೊಲೀಸರ ಮೇಲೆ ಗುಂಡಿನ ದಾಳಿ ನಡೆಸಿ, 8 ಸಿಬ್ಬಂದಿಯನ್ನು ಹತ್ಯೆ ಮಾಡಿದ ಸ್ಥಳೀಯ ರೌಡಿ ವಿಕಾಸ್ ದುಬೆ ಹಿಂಬಾಲಕರು ನಕ್ಸಲರ ರೀತಿ ವಿಕೃತಿ ಮೆರೆದಿರುವ ಸಂಗತಿ ಮರಣೋತ್ತರ ಪರೀಕ್ಷೆಯಲ್ಲಿ ಬಹಿರಂಗವಾಗಿದೆ.
ಸತ್ತ ಪೊಲೀಸರ ಶವಗಳ ರುಂಡ-ಮುಂಡವನ್ನು ಕೊಡಲಿಯಿಂದ ಕಡಿದು ಹಾಕಿದ್ದಲ್ಲದೆ, ದೇಹವನ್ನು ಛಿದ್ರಗೊಳಿಸಿ ಕೆಂಪು ಉಗ್ರರ ರೀತಿ ಅಮಾನವೀಯವಾಗಿ ವರ್ತಿಸಿದ್ದಾರೆ ಎಂಬುದು ಮರಣೋತ್ತರ ವರದಿ ಬಹಿರಂಗಪಡಿಸಿದೆ.
ಡಿಎಸ್ಪಿ ದರ್ಜೆಯ ಸರ್ಕಲ್ ಆಫೀಸರ್ ದೇವೇಂದ್ರ ಮಿಶ್ರಾ ಅವರ ತಲೆ ಮತ್ತು ಕಾಲ್ಬೆರಳುಗಳನ್ನು ಕೊಡಲಿಯಿಂದ ಕೊಚ್ಚಿ ತುಂಡರಿಸಲಾಗಿದ್ದರೆ, ದೇಹವನ್ನು ಛಿದ್ರಗೊಳಿಸಲಾಗಿದೆ. ತುಂಬಾ ಹತ್ತಿರದಿಂದ ಗುಂಡಿನ ಸುರಿಮಳೆಗೈದು ಸಬ್ಇನ್ಸ್ಪೆಕ್ಟರ್ ಒಬ್ಬರ ದೇಹಾದ್ಯಂತ ತೂತುಗಳು ಕಾಣುವಂತೆ ಮಾಡಲಾಗಿದೆ. ಪೊಲೀಸರ ಬಳಿಯಿದ್ದ ಎಕೆ-47 ಅನ್ನು ಕಸಿದುಕೊಂಡು, ಅದರಿಂದಲೇ ಗುಂಡು ಸಿಡಿಸಿ ಪೊಲೀಸ್ ಪೇದೆಯನ್ನು ಹತ್ಯೆ ಮಾಡಲಾಗಿದೆ.
ಮರಣೋತ್ತರ ಪರೀಕ್ಷೆ ನಡೆಸುವಾಗ ವೈದ್ಯರು ಸಬ್ಇನ್ಸ್ಪೆಕ್ಟರ್ ಅನೂಪ್ ಸಿಂಗ್ ಅವರ ದೇಹದಿಂದ 7 ಗುಂಡುಗಳನ್ನು ಹೊರತೆಗೆದರೆ, ಶಿವರಾಜ್ಪುರ ಸ್ಟೇಷನ್ ಆಫೀಸರ್ ಮಹೇಶ್ ಯಾದವ್ ಅವರ ಮುಖ, ಎದೆ ಮತ್ತು ಹೆಗಲಿನ ಭಾಗದ ತುಂಬೆಲ್ಲಾ ಗುಂಡುಗಳಿದ್ದವು. ಪೇದೆ ಜಿತೇಂದ್ರ ಪಾಲ್ ದೇಹ ಎಕೆ-47 ಗುಂಡಿನ ದಾಳಿಯಲ್ಲಿ ಛಿದ್ರಛಿದ್ರವಾಗಿದ್ದರೆ, ಪೇದೆಗಳಾದ ರಾಹುಲ್, ಬಬ್ಲು ಮತ್ತು ಸುಲ್ತಾನ್ ಅವರು .315 ಬೋರ್ ರೈಫಲ್ನಿಂದ ಸಿಡಿದ ಗುಂಡುಗಳಿಗೆ ಬಲಿಯಾಗಿದ್ದಾರೆ.
ವಿಕಾಸ್ ದುಬೆಯ 60 ಮಂದಿ ಬಾಲಬಡುಕರು ಪೊಲೀಸರನ್ನು ಸುತ್ತುವರಿದ ರೀತಿ ಕೆಂಪು ಉಗ್ರರ ದಾಳಿಯ ಮಾದರಿಯನ್ನು ಹೋಲುತ್ತದೆ ಎಂದು ಪ್ರಕರಣದ ತನಿಖೆ ಮಾಡುತ್ತಿರುವವರು, ವಿಧಿವಿಜ್ಞಾನ ಪ್ರಯೋಗಾಲಯದವರು ಮತ್ತು ಎಸ್ಟಿಎಫ್ ತಂಡಗಳು ಹೇಳುತ್ತವೆ.
ವಿಕಾಸ್ ದುಬೆ ಬಂಧನಕ್ಕೆ ಆತನ ಮನೆ ಮೇಲೆ ದಾಳಿ ಮಾಡಿದ್ದ ಪೊಲೀಸ್ ತಂಡದ ಮೇಲೆ ಸ್ನೈಪರ್ಗಳು ದಾಳಿ ಮಾಡಿದ್ದಾರೆ ಎನ್ನಲಾಗಿದೆ. ಸ್ನೈಪರ್ಗಳನ್ನು ತನ್ನ ಮನೆಯ ಮೇಲೆ ನೆಲೆಗೊಳಿಸಿ ಪೊಲೀಸ್ ತಂಡದ ಮೇಲೆ ದಾಳಿ ಮಾಡುವ ತಂತ್ರಗಾರಿಕೆಯನ್ನು ದುಬೆ ಅನುಸರಿಸಿದ್ದಾನೆ. ಎತ್ತರದಿಂದ ಗುಂಡಿನ ದಾಳಿ ಮಾಡಿರುವ ಕಾರಣ ಪೊಲೀಸ್ ಸಿಬ್ಬಂದಿಯ ತಲೆ ಮತ್ತು ಭುಜಗಳಲ್ಲಿ ಗುಂಡಿನ ಗಾಯಗಳು ಆಗಿರುವುದಾಗಿ ತನಿಖಾಧಿಕಾರಿಗಳು ತಿಳಿಸಿದ್ದಾರೆ.