ಸಂಕಷ್ಟಗಳು ಬಂದರೆ ಸಾಲುಸಾಲಾಗಿ ಬರುತ್ತವೆ ಎನ್ನುತ್ತಾರಲ್ಲ ಅಕ್ಷರಶಃ ಭಾರತ ಈಗ ಅದೇ ಸ್ಥಿತಿಯನ್ನು ಅನುಭವಿಸುತ್ತಿದೆ. ಕರೊನಾ ಸೋಂಕಿನ ವಿರುದ್ಧವಂತೂ ಹೋರಾಟ ನಡೆದಿದೆ, ಇನ್ನಷ್ಟು ಅವಧಿಗೆ ಅದು ಮುಂದುವರಿಯಲಿರುವುದು ದಿಟ. ಇನ್ನೊಂದೆಡೆ ಲಡಾಖ್ನ ಅಂತಾರಾಷ್ಟ್ರೀಯ ಗಡಿಯಲ್ಲಿ ಸೇನಾಪಡೆ ನಿಯೋಜಿಸಿ, ಯುದ್ಧಸನ್ನದ್ಧ ಸ್ಥಿತಿಯಲ್ಲಿ ಇರುವಂತೆ ತನ್ನ ಯೋಧರಿಗೆ ಕರೆ ಕೊಟ್ಟಿರುವ ಚೀನಾ, ಸುಖಾಸುಮ್ಮನೆ ಗಡಿವಿವಾದವನ್ನು ಕೆದಕಿದೆ. ಈ ಮೂಲಕ ಉದ್ವಿಗ್ನ ಸ್ಥಿತಿ ಸೃಷ್ಟಿಸಲು ಯತ್ನಿಸಿದೆ. ಅದರ ಈ ತಂತ್ರಗಳಿಗೆ ಭಾರತ ಸಮರ್ಥ ಉತ್ತರವನ್ನೇ ನೀಡುತ್ತಿರುವುದರಿಂದ ಚೀನಾ ಸ್ವಲ್ಪ ಮೆದುವಾದಂತಿದೆ. ಆದರೆ, ಜಮ್ಮು-ಕಾಶ್ಮೀರ ಭಾಗದಲ್ಲಿ ಪಾಕಿಸ್ತಾನ ಭಯೋತ್ಪಾದನೆಯ ರಫ್ತನ್ನು ಮುಂದುವರಿಸಿದೆ. ಬೇಸಿಗೆಯಲ್ಲಿ ಹಿಮ ಕರಗಿದ ಸ್ಥಿತಿಯನ್ನು ದುರುಪಯೋಗ ಪಡಿಸಿಕೊಂಡು, ಉಗ್ರರನ್ನು ಭಾರತದ ಗಡಿಯೊಳಕ್ಕೆ ನುಸುಳಿಸಲು ಯತ್ನಿಸಿದೆ. ಹಲವು ಎನ್ಕೌಂಟರ್ಗಳಲ್ಲಿ ಭದ್ರತಾ ಪಡೆಗಳು ಭಯೋತ್ಪಾದಕರನ್ನು ಹೊಡೆದುರಳಿಸಿವೆ. ಆದರೆ, ಗುರುವಾರ ಉಗ್ರರ ದಾಳಿ ಸಂಚು ವಿಫಲಗೊಳಿಸಿರುವ ಭದ್ರತಾ ಪಡೆಗಳಿಗೆ ಭಾರಿ ಯಶಸ್ಸು ಸಿಕ್ಕಿದೆ. ಅಲ್ಲದೆ, ಈ ಪ್ರಶಂಸನೀಯ ಕಾರ್ಯಾಚರಣೆ ನಮ್ಮ ಸೇನೆ, ಸಿಆರ್ಪಿಎಫ್, ಪೊಲೀಸ್ ಪಡೆಯ ದಕ್ಷತೆ, ಶೌರ್ಯಕ್ಕೆ ಸಾಕ್ಷಿ.
2019 ಫೆಬ್ರವರಿ 14ರಂದು ಜೈಶ್-ಎ-ಮೊಹಮ್ಮದ್ ಸಂಘಟನೆ ಪುಲ್ವಾಮಾದಲ್ಲಿ ಸಿಆರ್ಪಿಎಫ್ ಯೋಧರ ವಾಹನದ ಮೇಲೆ ಆತ್ಮಾಹುತಿ ದಾಳಿ ನಡೆಸಿತ್ತು. 350 ಕೆ.ಜಿ. ಸ್ಪೋಟಕ ಬಳಸಿ ನಡೆಸಲಾದ ಈ ಪೈಶಾಚಿಕ ದಾಳಿಯಲ್ಲಿ 44 ಯೋಧರು ಹುತಾತ್ಮರಾದರು. ಪುಲ್ವಾಮಾ ಮಾದರಿಯಲ್ಲಿ ದಾಳಿಯನ್ನು ನಡೆಸಲು ಹಿಜ್ಬುಲ್ ಮುಜಾಹಿದ್ದೀನ್ ಸಂಚು ರೂಪಿಸಿ, ಕಾರಿನಲ್ಲಿ 50 ಕೆಜಿಗಿಂತ ಹೆಚ್ಚು ಸ್ಪೋಟಕ ಸಾಗಿಸಿತ್ತು. ಬುಧವಾರ ಈ ಮಾಹಿತಿ ದೊರೆತೊಡನೆ ಕಾರಿನ ಪತ್ತೆಗೆ ಮುಂದಾದ ಭದ್ರತಾ ಪಡೆಗಳು ಗುರುವಾರ ಬೆಳಗ್ಗೆ ಆ ವಾಹನವನ್ನು ವಶ ಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾದವು. ಸುತ್ತಮುತ್ತಲಿನ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಕಳಿಸಿ, ಬಳಿಕ ಕಾರನ್ನು ಸ್ಪೋಟಿಸುವ ಮೂಲಕ ದೊಡ್ಡ ಅಪಾಯವನ್ನು ತಪ್ಪಿಸಿದ್ದಾರೆ. ‘ಸಿಆರ್ಪಿಎಫ್ನ 400 ಯೋಧರನ್ನು ಬಲಿ ಪಡೆಯುವುದು ಉಗ್ರರ ಸಂಚಾಗಿತ್ತು’ ಎಂದು ಜಮ್ಮು-ಕಾಶ್ಮೀರ ಐಜಿಪಿ ವಿಜಯಕುಮಾರ್ ತಿಳಿಸಿದ್ದಾರೆ.
ಪಾಕಿಸ್ತಾನ ಕೃಪಾಪೋಷಿತ ಭಯೋತ್ಪಾದಕ ಸಂಘಟನೆಗಳು ಮೇಲಿಂದಮೇಲೆ ಇಂಥ ದಾಳಿಗೆ ಯತ್ನಿಸುತ್ತಲೇ ಇವೆ. ಮೇ 3ರಂದು ಹಂದ್ವಾರದಲ್ಲಿ ನಡೆದ ಕಾರ್ಯಾಚರಣೆ ವೇಳೆ ಲಷ್ಕರ್-ಎ-ತೊಯ್ಬಾದ ಟಾಪ್ ಕಮಾಂಡರ್ ಹೈದರ್ ಸೇರಿ ಇಬ್ಬರು ಉಗ್ರರು ಹತರಾದರೆ, ದೇಶ ಐವರು ದಿಟ್ಟ, ಸಾಹಸಿ ಅಧಿಕಾರಿಗಳನ್ನು ಕಳೆದುಕೊಂಡಿತು! ಇದರ ಬೆನ್ನಲ್ಲೇ, ಮೇ 4ರಂದು ಕುಪ್ವಾರಾ ಜಿಲ್ಲೆಯ ಹೆದ್ದಾರಿಯಲ್ಲಿ ಉಗ್ರರ ಗುಂಡಿನ ದಾಳಿಗೆ ಮೂವರು ಸಿಆರ್ಪಿಎಫ್ ಯೋಧರು ಹುತಾತ್ಮರಾದರು. ಶಾಂತಿ ಕದಡುವ, ಹಿಂಸೆ ಹಬ್ಬುವ ಅವಿರತ ಪ್ರಯತ್ನಗಳು ನಡೆಯುತ್ತಿದ್ದರೆ, ಅವುಗಳಿಗೆ ಅಷ್ಟೇ ದಿಟ್ಟ ಉತ್ತರವನ್ನು ಭಾರತ ನೀಡಿದೆ. ಆದರೆ, ಗಡಿಯಲ್ಲಿನ ಈ ತಲ್ಲಣ ಕರಗಲೇಬೇಕು. ಆ ನಿಟ್ಟಿನಲ್ಲಿ ಭಯೋತ್ಪಾದನೆ ವಿರುದ್ಧ ಹೋರಾಟಕ್ಕೆ ಅಂತಾರಾಷ್ಟ್ರೀಯ ವಲಯ ಬಲ ತುಂಬಬೇಕಿದೆ. ಚೀನಾ ಕೂಡ ಗಡಿ ಕ್ಯಾತೆಯನ್ನು ಬದಿಗಿರಿಸಿ, ರಾಜತಾಂತ್ರಿಕ ಸಂಬಂಧಗಳನ್ನು ಗೌರವಿಸಬೇಕಿದೆ. ಮನುಕುಲವೇ ಸಂಕಷ್ಟದಲ್ಲಿ ಇದ್ದರೂ ಕೆಲ ರಾಷ್ಟ್ರಗಳು ಪಾಠ ಕಲಿತಿಲ್ಲ ಎಂಬುದಕ್ಕೆ ಚೀನಾ, ಪಾಕ್ನ ವರ್ತನೆಗಳು ಸಾಕ್ಷಿ.