ನವದೆಹಲಿ: ಬೀದಿನಾಯಿಗಳನ್ನು ಕಂಡರೆ ಭಯ ಪಟ್ಟು ದೂರ ಓಡುವವರ ಮಧ್ಯೆ ಇಲ್ಲೊಂದು ಗುಂಪು ಮಾಡಿರುವ ಕೆಲಸ ನೋಡಿದ್ರೆ ನೀವೂ ಖಂಡಿತವಾಗಿಯೂ ಆಶ್ಚರ್ಯಪಡುತ್ತಿರಾ. ಇವರಿಗೆ ಇರುವ ಪ್ರಾಣಿಗಳ ಪ್ರೀತಿ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.
ಗೆಳೆಯರ ತಂಡವೊಂದು ಬೀದಿ ನಾಯಿಗೆ ಸೀಮಂತ ಮಾಡಿದ್ದು, ಅದರ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿ ಬಿಟ್ಟಿದ್ದಾರೆ. ವೀಡಿಯೋ ನೋಡಿದ ನೆಟ್ಟಿಗರು ಗೆಳೆಯರ ಈ ತಂಡದ ಕಾರ್ಯಕ್ಕೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
ಹುಡುಗ ಹುಡುಗಿಯರಿರುವ ಗೆಳೆಯರ ಬಳಗ ನಾಯಿಗೆ ಹೂವಿನ ಮಾಲೆಯನ್ನು ಹಾಕಿ ಅರಶಿಣ ಕುಂಕುಮ ಹಾಕಿ ಹಳದಿ ಬಣ್ಣದ ಶಾಲನ್ನು ಹೊದಿಸಿ ಅದರಿಷ್ಟದ ಆಹಾರ ನೀಡುತ್ತಾರೆ. ನಂತರ ಅದರೊಂದಿಗೆ ನಿಂತು ಗೆಳೆಯರು ಫೋಟೋ ತೆಗೆಸಿಕೊಂಡಿದ್ದಾರೆ. ಈ ವಿಡಿಯೋಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಬೀದಿನಾಯಿಯೊಂದರ 'ಬೇಬಿ ಶವರ್'ನ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಲೈಕ್ಗಳನ್ನು ಪಡೆಯುತ್ತಿದೆ. ಇನ್ಸ್ಟಾಗ್ರಾಮ್ ಬಳಕೆದಾರ ಭರತ್ ಚಂದ್ರನ್ ಎಂಬ ವ್ಯಕ್ತಿ ಈ ಪೋಸ್ಟ್ ಮಾಡಿದ್ದು, “ಬೀದಿ ನಾಯಿಗಳ ಬಗ್ಗೆ ದ್ವೇಷ, ಅಸಹ್ಯ ಮತ್ತು ತಿರಸ್ಕಾರದಿಂದ ತುಂಬಿರುವ ಜಗತ್ತಿನಲ್ಲಿ, ಇಲ್ಲಿ ನಾವು ಬೇಬಿ ಶವರ್ ಅನ್ನು ಆಚರಿಸುತ್ತಿದ್ದೇವೆ. ಸುರಕ್ಷಿತ ಹೆರಿಗೆಯನ್ನು ಹೊಂದುತ್ತಾಳೆ. ನಾಯಿಮರಿಗಳಿಗೆ ಲಸಿಕೆ ಹಾಕಲಾಗುತ್ತದೆ ಮತ್ತು ದತ್ತು ಪಡೆಯಲು ನೀಡಲಾಗುತ್ತದೆ. ಪ್ರೀ-ಬುಕಿಂಗ್ ಓಪನ್ ಆಗಿದೆ ಎಂದು ಬರೆದುಕೊಂಡಿದ್ದಾರೆ. ನೆಟ್ಟಿಗರು ಈ ವಿಡಿಯೋ ನೋಟಿ ಮೆಚ್ಚುಗೆ ಸೂಚಿಸಿ ಕಾಮೆಂಟ್ ಮಾಡುತ್ತಿದ್ದಾರೆ.