ದುಬೈ: ನಿನ್ನೆ ಆಚರಿಸಿದ 152ನೇ ಗಾಂಧಿ ಜಯಂತಿ ಸಂದರ್ಭಕ್ಕೆ ವಿಶ್ವದ ವಿವಿಧ ನಾಯಕರು ಭಾರತದ ರಾಷ್ಟ್ರಪಿತ ಎಂದು ಕರೆಯಲ್ಪಡುವ ಮಹಾತ್ಮ ಗಾಂಧಿ ಅವರನ್ನು ಸ್ಮರಿಸಿದ್ದಾರೆ. ಇದೇ ಸಂದರ್ಭದಲ್ಲಿ ಜಗತ್ತಿನ ಅತಿಎತ್ತರದ ಕಟ್ಟಡವಾದ ದುಬೈನ ಬುರ್ಜ್ ಖಲೀಫಾದಲ್ಲಿ ಅವರ ಚಿತ್ರಗಳು, ಸಂದೇಶಗಳು ಶೋಭಿಸಿದವು.
ಬುರ್ಜ್ ಖಲೀಫಾದ ಮೇಲೆ ಮೂಡಿಬಂದ ದೀಪಗಳ ಚಿತ್ತಾರದಲ್ಲಿ ಭಾರತದ ಬಾವುಟದೊಂದಿಗೆ ಗಾಂಧಿ ಚಿತ್ರಗಳು ರಾರಾಜಿಸಿದವು. ಗಾಂಧಿಯವರ ಅಹಿಂಸೆಯ ಸಂದೇಶಗಳು, ಅವರ ರೇಖಾ ಚಿತ್ರಗಳು ಮತ್ತು ಚರಕ ಮೂಡಿಬಂದವು. ಈ ದೃಶ್ಯವನ್ನು ಬುರ್ಜ್ ಖಲೀಫಾದ ಅಧಿಕೃತ ಟ್ವಿಟರ್ ಖಾತೆಯಲ್ಲಿ 'ಬೀ ದ ಚೇಂಜ್ ಯು ವಿಶ್ ಟು ಸೀ ಇನ್ ದ ವರ್ಲ್ಡ್' ಎಂಬ ಗಾಂಧೀಜಿ ಮಾತನ್ನು ಸ್ಮರಿಸಿ ಪ್ರಕಟಿಸಿದ್ದಾರೆ. (ಏಜೆನ್ಸೀಸ್)