ನ್ಯೂಯಾರ್ಕ್: ವಾಣಿಜ್ಯ ಉದ್ದೇಶಗಳಿಗಾಗಿ ಗಗನನೌಕೆಗಳನ್ನು ತಯಾರಿಸುವ ಖಾಸಗಿ ಸಂಸ್ಥೆಯೊಂದು ಭಾರತೀಯ ಮೂಲದ ಗಗನಯಾತ್ರಿ ಕಲ್ಪನಾ ಚಾವ್ಲಾ ಹೆಸರನ್ನು ಗಗನನೌಕೆಯೊಂದಕ್ಕೆ ಇರಿಸುವ ಮೂಲಕ ಗೌರವ ಸಲ್ಲಿಸಿದೆ.
ಅಮೆರಿಕದ ಖಾಸಗಿ ವಾಣಿಜ್ಯ ಸರಕು ಸಾಗಣೆ ಸಂಸ್ಥೆ ನಾರ್ಥ್ರಾಪ್ ಗ್ರಮ್ಮನ್ ಈ ಗೌರವ ನೀಡಿದೆ. ಸೆಪ್ಟಂಬರ್ 29ರಂದು ಬಾಹ್ಯಾಕಾಶದಲ್ಲಿರುವ ಅಂತಾರಾಷ್ಟ್ರೀಯ ಕೇಂದ್ರಕ್ಕೆ ತೆರಳುವ ಗಗನನೌಕೆಗೆ ಎಸ್.ಎಸ್. ಕಲ್ಪನಾ ಚಾವ್ಲಾ ಹೆಸರಿಟ್ಟಿರುವುದಾಗಿ ಹೇಳಿದೆ. ನಾಸಾ ಗಗನಯಾನಿಯಾಗಿದ್ದ ಕಲ್ಪನಾ ಚಾವ್ಲಾ ಬಾಹ್ಯಾಕಾಶ ಸಂಶೋಧನೆಗೆ ನೀಡಿದ ಕೊಡುಗೆಯನ್ನು ಪರಿಗಣಿಸಿ ಈ ಗೌರವ ನೀಡಿರುವುದಾಗಿ ತಿಳಿಸಿದೆ.
ಇದನ್ನೂ ಓದಿ; ರಿಲಯನ್ಸ್ಗೆ ಭಾರತದ ದಿಗ್ಗಜ ಕಂಪನಿ ಶ್ರೇಯ; 14.68 ಲಕ್ಷ ಕೋಟಿ ರೂ. ಮಾರುಕಟ್ಟೆ ಬಂಡವಾಳ; ಷೇರು ಬೆಲೆ ಭಾರಿ ಏರಿಕೆ
ಭಾರತದ ಮೊದಲ ಮಹಿಳಾ ಗಗನಯಾನಿಯಾಗಿ ನಾಸಾದಲ್ಲಿ ಇತಿಹಾಸ ಸೃಷ್ಟಿಸಿದ ಕಲ್ಪನಾ ಚಾವ್ಲಾ ಅವರನ್ನು ಈ ಮೂಲಕ ಗೌರವಿಸುತ್ತಿರುವುದಾಗಿ ಸಂಸ್ಥೆ ಟ್ವೀಟ್ ಮಾಡಿದೆ. ಈ ಗಗನನೌಕೆಯು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರಕ್ಕೆ 3,629 ಕೆಜಿಗಳಷ್ಟು ಸರಕನ್ನು ಸಾಗಿಸುತ್ತಿದೆ.
ಹರಿಯಾಣದ ಕರ್ನಾಲ್ನಲ್ಲಿ 1962ರ ಮಾರ್ಚ್ 17ರಂದು ಜನಿಸಿದ ಕಲ್ಪನಾ ಚಾವ್ಲಾ, ಪಂಜಾಬ್ ಇಂಜಿನಿಯರಿಂಗ್ ಕಾಲೇಜಿನಿಂದ ಪದವಿ ಪಡೆದರು. ಬಳಿಕ ಅಮೆರಿಕಕ್ಕೆ ತೆರಳಿ ಟೆಕ್ಸಾಸ್ ವಿವಿಯಿಂದ ವೈಮಾನಿಕ ಕ್ಷೇತ್ರದಲ್ಲಿ ಸ್ನಾತಕೋತ್ತರ ಪದವಿ, ಕೊಲರಾಡೋ ವಿವಿಯಿಂದ ಪಿ.ಎಚ್ಡಿ ಪಡೆದರು. ವಾಣಿಜ್ಯ ವಿಮಾನ ಚಾಲನೆಗೆ ಪರವಾನಗಿಯನ್ನು ಪಡೆದುಕೊಂಡರು. ಸೀಪ್ಲೇನ್ ಹಾಗೂ ಗ್ಲೈಡರ್ಗಳ ಹಾರಾಟದಲ್ಲೂ ಪರಿಣತಿ ಗಳಿಸಿದ್ದರು. 1988ರಲ್ಲಿ ನಾಸಾ ಸೇರಿಸಿಕೊಂಡರು. ಅಮೆರಿಕದ ಪೌರತ್ವ ಪಡೆದ ಬಳಿಕ 1994ರಲ್ಲಿ ನಾಸಾ ಗಗನಯಾನಿಗಳ ತರಬೇತಿಗೆ ಆಯ್ಕೆಯಾದರು
ಇದನ್ನೂ ಓದಿ; ಆಕ್ಸ್ಫರ್ಡ್ ವಿವಿ ಕರೊನಾ ಲಸಿಕೆ ಕ್ಲಿನಿಕಲ್ ಟ್ರಯಲ್ ಸ್ಥಗಿತ; ಲಸಿಕೆ ಪಡೆದ ವ್ಯಕ್ತಿಗೆ ಏನಾಗಿದೆ..?
1996ರಲ್ಲಿ ಮೊದಲ ಬಾರಿಗೆ ಗಗನಯಾನ ಮಾಡಿದರು. 2003ರಲ್ಲಿ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರದಿಂದ ಭೂಮಿಗೆ ಮರಳುತ್ತಿದ್ದ ಗಗನನೌಕೆ ದುರಂತದಲ್ಲಿ ಮೃತಪಟ್ಟರು.