ಬೆಂಗಳೂರು: ಪ್ರಧಾನಿ ನರೇಂದ್ರ ಮೋದಿ ಭ್ರಷ್ಟಾಚಾರವನ್ನು ಯಾವುದೇ ಕಾರಣಕ್ಕೂ ಸಹಿಸುವುದಿಲ್ಲ. ನಿರ್ದಿಷ್ಟ ಪ್ರಕರಣಗಳ ಬಗ್ಗೆ ಆಧಾರ, ಪುರಾವೆ ಸಹಿತ ನೀಡಿದರೆ ಉಗ್ರ ಕ್ರಮಕೈಗೊಳ್ಳುವರು ಎಂದು ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವ ಪಿಯೂಷ್ ಗೋಯಲ್ ಪ್ರತಿಪಾದಿಸಿದರು.
ಬಿಜೆಪಿ ರಾಜ್ಯ ಕಚೇರಿಯಲ್ಲಿ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮೋದಿಯವರು ಭ್ರಷ್ಟಾಚಾರ ಮುಕ್ತ ಆಡಳಿತ ನೀಡುತ್ತಿರುವುದನ್ನು ದೇಶದ ಜನತೆ ಗಮನಿಸುತ್ತಿದ್ದಾರೆ. ಕರ್ನಾಟಕ ಸರ್ಕಾರವು ಪಾರದರ್ಶಕ, ಪ್ರಾಮಾಣಿಕ ಆಡಳಿತ ನೀಡುತ್ತಿದೆ. ಕಾಂಗ್ರೆಸ್ನವರ ಶೇಕಡ 40 ಪರ್ಸೆಂಟ್ ಕಮಿಷನ್ ಆರೋಪದಲ್ಲಿ ಹುರುಳಿಲ್ಲ ಎಂದು ತಳ್ಳಿ ಹಾಕಿದರು.
ಹಣ ಸುರಕ್ಷಿತ
ಅದಾನಿ ಪ್ರಕರಣ ಖಾಸಗಿ ಕಂಪನಿಗೆ ಸಂಬಂಧಿಸಿದ ವಿಷಯ. ಷೇರು, ಸೆಕ್ಯೂರಿಟಿ ಮಾರುಕಟ್ಟೆಗಳಲ್ಲಿ ಏರಿಳಿತ ಸಹಜ. ಎಸ್ಬಿಐ, ಎಲ್ಐಸಿ ಹಣ ಸುರಕ್ಷಿತ. ನಿಯಂತ್ರಣ ಪ್ರಾಧಿಕಾರಗಳು ಸೂಕ್ತ ಕ್ರಮವಹಿಸಲಿವೆ. ಇದೇ ಕಾರಣಕ್ಕಾಗಿ ಸಂಸತ್ತಿನ ಕಲಾಪ ನಡೆಯಲು ಅವಕಾಶ ನೀಡದಿರುವ ಪ್ರತಿಪಕ್ಷಗಳ ಧೋರಣೆ ದುರದೃಷ್ಟಕರ ಎಂದು ಪಿಯೂಷ್ ಗೋಯಲ್ ವಿಷಾದಿಸಿದರು.