ನವದೆಹಲಿ: ಕರೊನಾ ವಿರುದ್ಧ ಸಮರಕ್ಕೆ ಕೈಜೋಡಿಸುವಂತೆ ಕರೆ ನೀಡುತ್ತಿರುವ ಕೇಂದ್ರ ಹಾಗೂ ಸರ್ಕಾರಗಳು ಯಾಕೋ ನಿವೃತ್ತಿಯಾಗುವವರ ವಿಚಾರವಾಗಿ ಮೃದು ಧೋರಣೆ ತಳೆದಂತಿಲ್ಲ. ಅಗತ್ಯ ಸರ್ಕಾರಿ ಸೇವೆಗಳನ್ನು ಹೊರತುಪಡಿಸಿದರೆ ಇನ್ನುಳಿದವರಿಗೆ ಮನೆಯಲ್ಲಿಯೇ ಇರುವಂತೆ ಹೇಳಿವೆ. ಅಧಿಕೃತವಾಗಿ ರಜೆಯನ್ನೂ ಘೋಷಣೆ ಮಾಡಿವೆ. ಈ ಅವಧಿಯಲ್ಲಿ ನಿವೃತ್ತರಾಗಲಿರುವ ಕೇಂದ್ರ ಸರ್ಕಾರಿ ನೌಕರರು ಕಾಯಂ ಆಗಿ ಮನೆಯಲ್ಲಿಯೇ ಉಳಿಯುವಂತಾಗಿದೆ.
ಏಪ್ರಿಲ್ 14ರವರೆಗೆ ದೇಶಾದ್ಯಂತ ಲಾಕ್ಡೌನ್ ಘೋಷಣೆಯಾಗಿರುವ ಕಾರಣ ಈ ಅವಧಿಯಲ್ಲಿ ಕೊನೆಯ ದಿನಾಂಕವಿರುವ, ಮಾನ್ಯತೆ ಅವಧಿ ಪೂರ್ಣಗೊಂಡಿರುವ ದಾಖಲೆಗಳು, ಅರ್ಜಿ ಸಲ್ಲಿಕೆ, ವಿವಿಧ ಪರೀಕ್ಷೆ ಮೊದಲಾದವುಗಳ ಅವಧಿಯನ್ನು ವಿಸ್ತರಿಸಲಾಗಿದೆ. ಆದರೆ, ಇದೇ ಸಂದರ್ಭದಲ್ಲಿ ಸೇವಾವಧಿ ಪೂಣರ್ಗೊಳ್ಳುವ ಕೇಂದ್ರ ಸರ್ಕಾರಿ ನೌಕರರಿಗೆ ಯಾವುದೇ ವಿಸ್ತರಣೆ ಇರುವುದಿಲ್ಲಎಂದು ಸ್ಪಷ್ಟಪಡಿಸಲಾಗಿದೆ.
2020ರ ಮಾರ್ಚ್ 31ರೊಳಗೆ ವಯೋನಿವೃತ್ತಿ ಹೊಂದಿದವರ ಸೇವಾವಧಿಯನ್ನುವಿಸ್ತರಿಸಲಾಗುತ್ತಿಲ್ಲ ಎಂದು ಕೇಂದ್ರ ಸಿಬ್ಬಂದಿ ಸಚಿವಾಲಯ ಸ್ಪಷ್ಟಪಡಿಸಿದೆ. ಪ್ರಸ್ತುತ ಅವರು ರಜೆಯ ಮೇಲಿರಲಿ ಅಥವಾ ಮನೆಯಿಂದಲೇ ಕೆಲಸ ಮಾಡುತ್ತಿರಲಿ ಲಾಕ್ಡೌನ್ ಅಥವಾ ಇನ್ನಾವುದೇ ಕಾರಣಕ್ಕೂ ಕರ್ತವ್ಯದ ಅವಧಿಯನ್ನು ಮುಂದುವರಿಸಲಾಗದು ಎಂದು ಹೇಳಿದೆ.
ಪ್ರಸ್ತುತ ಏಪ್ರಿಲ್ 14ರವರೆಗೂ ಲಾಕ್ಡೌನ್ ಇರಲಿದೆ. ಈ ಅವಧಿಯಲ್ಲಿ ನಿವೃತ್ತಿಯಾಗುವವರಿಗೆ ಮೇಲಿನ ಆದೇಶವೇ ಅನ್ವಯವಾಗುತ್ತಾ ಅಥವಾ ಅಗತ್ಯ ಸೇವೆಯಲ್ಲಿರುವವರನ್ನು ಕರ್ತವ್ಯ ಮುಂದುವರಿಸಲು ಸೂಚಿಸಲಾಗುತ್ತದೇಯೇ ಎಂಬುದು ಸ್ಪಷ್ಟವಾಗಿಲ್ಲ. ಒಟ್ಟಿನಲ್ಲಿ ನಿವೃತ್ತಿ ಅಂಚಿನಲ್ಲಿದ್ದು, ಮನೆಯಲ್ಲಿದ್ದವರು ಮತ್ತೆ ಕಚೇರಿಯಲ್ಲಿ ಕಾರ್ಯ ನಿರ್ವಹಿಸುವ ಭಾಗ್ಯವೇ ಇಲ್ಲವಾಗಿ ಕಾಯಂ ಆಗಿ ಮನೆಯಲ್ಲಿಯೇ ಮುಂದುವರಿಯುವಂತಾಗಿದೆ.